አምኤ ሙፃታ
(ማር 12:41-44)
1 ዱረ አሳይ ፆሳ ኬን ሙፃታ ሳፅንያን የግሽን የሱሲ ቁ ግድ አሳ በእስ። 2 ቃስ እስ ማንቆ አምእያ ናምኡ ስክና የግሽን በእድ፥ 3 "ታ ህንተዉ ቱማ ኦዳይስ፤ ሀ ማንቆ አምእያ ኡባፈ አዳ እማሱ። 4 አይስ ጊኮ፥ ሀ አሳ ኡባይ ባንታዉ ደእያባፐ እምዶሶና፥ ሽን እያ ባ ፓጫፐ፥ ባዉ ደእያ አቁዋ ኡባ እማሱ" ያግስ።
ዎደ ዉርሰ ማላታታ
(ማቶ 24:3-14፤ ማር 13:3-23)
5 የሱሳ ታማረታፐ እሶት እሶት ፆሳ ኬይ ዳሮ ሎእያ ሹቻንነ አሳይ ፆሳስ እምዳ እሞታን ሎእዳይሳ ኦደቶሶና። 6 ሽን የሱሲ፥ "ሀ ህንተ በእያባይ ኡባይ ላለቶና፥ ሹች ሹቻ ቦላ ግምበትዳ መላ አቶና ዎደይ ያና" ያግስ።
7 ኤንትካ፥ "አስታማርያዉ፥ ሀ ኡባይ ሀናናይ አዉዴ? ቃስ ሀይስ ሀናናይሳስ ማላታይ አይቤ?" ያግድ ኦይችዶሶና።
8 የሱሲ ያግድ ኤንታዉ ዛሮ እሚስ፦ "ባለቶና መላ ናገትተ። ዳሮት፥ ‘ታኒ ክርስቶሳ፥ ዎደይ ማታትስ’ ያግሸ ታ ሱንን ያና፥ ሽን ህንተ ኤንታ ካሎፍተ። 9 ህንተ ኦላባነ አሳ ጌላተ ስእያ ዎደ ዳጋሞፍተ። ሄስ ስንትድ ሀናናይስ አቶናባ ግድያ ግሾ ዎድያ ዉርሰይ ኤለስድ ዬና" ያግስ።
10 ካልድካ፥ "ደረይ ደርያ ቦላ፥ ካዎተይ ካዎተ ቦላ ደንዳና። 11 ግታ ቢታ ቃፆይ ሀናና፥ ኮሻይነ ጋዶይ ዱማ ዱማ በሳን ዳራና፥ ያሽያባይነ ግታ ማላታት ሳሎፐ ቆንጫና። 12 ሽን ሀ ኡባይ ሀናናፐ ስን ታ ሱን ግሾ ግድ አሳይ ህንተና ጎዳናነ ኦይካና። አይሁደ ዎሳ ኬንነ ቃሾ ኬን ህንተና የጋና። ካዎታ ስንነ ደርያ ሃረይሳታ ስን ህንተና ኤፋና። 13 ሄስካ ታባ ህንተ ኤንታዉ ማርካታናዉ ሎኦ ኦገ ግዳና። 14 ሄሳ ግሾ፥ ህንተ ኦይሸትያ ዎደ ዎይግድ ዛሮ እማነ ግድ ህንተ ዎዛናን ኡንኤቶና መላ አኬክተ።21:14 ሉቃ 12:11-12. 15 አይስ ጊኮ፥ ህንተ ሞርከት ህንተራ ኤቀታናዉነ ፓላማናዉ ዳንዳኦና ዶናነ ጭንጫተ ታ ህንተዉ እማና። 16 ሀር አቶሽን፥ ህንተና የልዳይሳት፥ ህንተ እሻት፥ ህንተ ዳቦትነ ላገት ህንተና አድ እማና። ህንተ ግዶፈ እሶታ እሶታ ዎና። 17 ታ ሱን ግሾ አሳ ኡባ ስንን ህንተ እፀትዳይሳታ ግዳና። 18 ሽን ሀር አቶሽን፥ ህንተ ብናናፐ እሶይካ የና። 19 ፖሎ ዳንዳአን ህንተ፥ ህንተ ሸምፑዋ አሻና።"
20 "የሩሳላመ ካታማይ ዎታዳረን ድረትድ ኡትዳሽን ህንተ በእኮ እያዉ ዮይ ማታትዳይሳ ኤርተ። 21 ሄ ዎደ ይሁዳን ደእያ ኡባይ ደርያኮ ባቃቶ፥ ካታማን ደኤይሳት ያፐ ከዮ፥ ጋፃርያን ደኤይሳት ካታማ ገሎፖ። 22 አይስ ጊኮ፥ ሀ ፃፈትዳባይ ፖለታና መላ ሄስ ፆሳይ ኩሸ ዛርያ ዎደ።21:22 ሆሰ 9:7. 23 ሳአ ቦላ ግታ መቶይ ያና፥ ሄሳንካ አሳ ቦላ ፆሳ ሀንቆይ ያና። ሄሳ ግሾ፥ ቃንትዳይሳታነ ንይሳታ አየ! 24 ኤንቲ ማሻን ሀይቃና፥ አሳ ኡባይ አላጋ ቢታ ድኤታና። አይሁደ ግዶና አሳ ዎደይ ፖለታና ጋካናዉ የሩሳላመይ ኤንታናን የትዳይሳ ግዳና።
25 "አዋን፥ አጌናንነ፥ ፆልንቶታ ቦላ ማላታት ሀንድ በንታና። አባፈነ ዙልያ ደሹዋፐ ደንዶይሳን ቢታን ደእያ አሳይ ኡንኤታናነ ያርካና።21:25 እሳ 13:10፤ ህዝ 32:7፤ ኤርም 2:31፤ ቆን 6:12. 26 ሳሉዋ ዎልቃት ቡቀታና ግሾ አሳይ ያሻንነ ቢታ ቦላ አይብ ሀናንደሻ ግድ ናጎን ባንታና ባለታና። 27 ሄ ዎደ አሳ ናአይ ዎልቃንነ ግታ ቦንቾን ሻራራ ይሽን ኤንቲ በአና።21:27 ዳነ 7:13፤ ቆን 1:7. 28 ህንተ አቶተይ ማታትዳ ግሾ ሀ ሀኖት ፖለተ ኦይክያ ዎደ ጊገት ኤቅተ፥ ህንተ ሁጵያ ቁ ኦድ ፄልተ" ያግስ።
29 ካልድካ፥ ሀይሳዳ ግድ ሌምሶ ኦድስ፤ "ባላሰ ምነ ሀራ ምታ ኡባ በእተ። 30 ኤንቲ አጭያ ዎደ ቶርቸይ ማታትዳይሳ ህንተ ኤሬታ። 31 ሄሳዳ ሀ ሀኖት ፖለትሽን ህንተ በእኮ ፆሳ ካዎተይ ማታትዳይሳ ኤርተ።
32 "ታ ህንተዉ ቱማ ኦዳይስ፤ ሀ ኡባይ ፖለታና ጋካናዉ ሀ የለተይ አና። 33 ሳሎይነ ሳእ አና፥ ሽን ታ ቃላይ አና።
34 "ህዛ፥ ስ ባይና ደኦን፥ ኡሻ ዳሮንነ ዱሳባስ ኡንኤተን ህንተ ዎዛናይ ኦይከቶና መላነ ሄ ቃማይ አኬኮና ፅሄዳ ህንተ ቦላ ጋኮና መላ ናገትተ። 35 ሄ ቃማይ ቢታ ኩመን ደእያ ኡባ ቦላ ጋካና። 36 ሄሳ ግሾ፥ ያ ኢታፐ አታናዉነ አሳ ናአ ስንን ኤቃናዉ ዳንዳአና መላ ኡባ ዎደ ምንድ ዎስተ" ያግስ።
37 ጋላስ ጋላስ የሱሲ ፆሳ ኬን ታማርስሸ፥ ቃማ ቃማ ሻማሆ ዙማ ቦላ ከይድ አቄስ።21:37 ሉቃ 19:47. 38 አሳ ኡባይ እያ ስአናዉ ዎንታ ጉራ እያኮ ፆሳ ኬ ዮሶና።