የሱሳ የለተ
(ማቶ 1:18-25)
1 ሄ ዎደ ሮመ ቢታን ደእያ አሳ ኡባይ ታይበታና መላነ ሱንይ ፃፈታና መላ ካዎይ አዉግስፆስ ኪትስ። 2 ሄስካ ቀረኖስ ሶረ ቢታ አይስያ ዎደ ኦሰትዳ ኮይሮ ታይቡዋ። 3 ሄሳ ግሾ፥ እስ እስ አስ ባ ሱን ፃፈታናዉ ባ የለትዳ ቢታ ብስ።
4 ዮሰፍካ ዳዊታ ኬፈነ ያራፐ ግድዳ ግሾ፥ ጋልላ ናዝረተ ካታማፐ ደንድድ ዳዊታ ካታማ ግድዳ ይሁዳ ቤተለመ ብስ። 5 ብሸ፥ የላናዉ ዎደይ ዉርዳ እ ኦይች ዎዳ፥ ማይራምራ ዎላ ፃፈታናዉ ብስ። 6 ኤንቲ ያን ደእሽን እዉ የሎ ዎደይ ጋክስ። 7 ባ ባይራ ናኣ የላሱ። ጩርቃራ ፃፃዳ እማ አቅያ ኬን በሲ ይዳ ግሾ ዳራን መሄ ሙዝያ ጎንገን ዝንእሳሱ።
ሄንንቾታነ ኪታንቾታ
8 ሄ ጋድያን ቃማ ዶርሳ ዉድያ ናግሸ ካረን አቅያ ሄንንቾት ደኦሶና። 9 ጎዳ ኪታንቾይ ሀሳዮና ይድ ኤንታ ማታን ኤቅስ። ጎዳ ቦንቾይ ኤንታ ዩሹዋን ፖእስ፤ ኤንትካ ዎልቃማ ያሽ ያይዶሶና። 10 ሽን ኪታንቾይ፥ "ያዮፍተ! ሄኮ፥ አሳ ኡባስ ግድያ ግታ ኡፋይሳ ምሽራቹዋ ኤካዳ ያስ። 11 ሄስካ፥ ዳዊታ ካታማን አሸይስ ህንተዉ ሀች የለትስ። እ ጎዳ ክርስቶሳ። 12 ዞቃለ ናእ ጩርቃራ ፃፀትድ ጎንገን ዝንእዳይሳ ህንተ ደማና፤ ሄስካ ህንተዉ ማላ ግዶ" ያግስ።
13 ቆፖና ዳሮ ሳሎ ኪታንቾት ኪታንቹዋራ እስፈ ቆንጭድ፥
14 "ቦንቾይ ፆሳስ ቃ ሳሉዋን፥
ሳሮይ ቢታ ቦላ ፆሳይ ዶስያ አሳስ ግዶ"
ያግድ ጋላትዶሶና።
15 ኪታንቾት ኤንታፈ ሻከትድ ሳሉዋ ከይዳፐ ጉየ ሄንንቾት፥ "አነ ጎዳይ ኑስ ቆንጭስዳባነ ሀንዳባ በአናዉ ቤተለመ ቦስ" ያግዶሶና።
16 ኤንትካ ኤለስድ ብዶሶና። ማይራሞ፥ ዮሰፋነ ዞቃለ ናኣ ጎንገን ዝንእዳይሳ በእዶሶና። 17 በእ ስሚድ ናአባ ኤንታዉ ኦደቶይሳ፥ ቆንጭስድ ሄ በሳን ደእያ አሳስ ማርካትዶሶና። 18 ሄሳ ስእዳ ኡባይ ሄንንቾት ኦድዳይሳን ማላለትዶሶና። 19 ማይራማ ሀንዳባ ኡባ ባ ዎዛናን ቆፓሸ ደአሱ። 20 ሄንንቾት ኤንታዉ ኦደትዳይሳዳ ሀንን በእዶሶና። ሄሳ ግሾ፥ ባንታ ስእዳባስነ በእዳባ ኡባስ ፆሳ ቦንችሸነ ጋላትሸ ስምዶሶና።
የሱሳ ፆሳ ኬ ኤፍዶሶና
21 ሆስፑን ቃማን፥ ቃፃሮ ዎደይ ጋክን፥ እ ቃንታናፐ ስን ኪታንቾይ ዎዳ ሱንን የሱሳ ጌተትስ።2:21 ሌወ 12:3፤ ሉቃ 1:3. 22 ሙሰ ዎጋ መላ ኤንታ ጌሻተ ዎደይ ፖለትዳፐ ጉየ ዮሰፋራነ ማይራምራ ዮጋ ናኣ ባንታ ጎዳስ እማናዉ የሩሳላመ ብዶሶና። 23 ሄስካ፥ ጎዳ ዎጋን፥ "አደ ግድዳ ባይራ ናእ ኡባይ ጎዳስ ዱማትዳይሳ ግዶ" ጌተትድ ፃፈትዳይሳ ፖላናሳ።2:23 ከሳ 13:2፥ 12. 24 ቃስ ጎዳ ዎጋን፥ ናምኡ ኩራቾ ዎይኮ ሆለ ያርሻናዉ ኤፍዶሶና። 25 ሄ ዎደ ጌሽነ አማኖራ ምኖ ግድዳ ስሞና ጌተትያ አስ የሩሳላመን ደኤስ። እ እስራኤለታ አቶተ ናግሸ ደኤስ። ጌሻ አያናይካ እያ ቦላ ደኤስ። 26 ቃስ ክርስቶሳ በኦና ሀይቆናይሳ ጌሻ አያናይ እያዉ ቆንጭስን ኤርድ ደኤስ። 27 እ ሄ ጋላስ አያናይ ካለን ፆሳ ኬ ብስ። ናኣ አየራነ አዋራ ዎጋ ፖላናዉ ዮጋ ናኣ የሱሳ ኤክድ ገልዳ ዎደ፥ 28 ስሞን ሞክ ኤክድ ናኣ እድምድ፥
29 "ጎዳዉ ነ ታዉ ገልዳ ቃላ መላ፥
ሀእ ነ አይልያ ሳሮን ሞይዛ።
30 ታ አይፈይ አሳ ኡባ ስንን ነ ጊግስዳ፥
31 ነ አሹዋ በእስ።
32 ሄስካ ካዎተታ ኡባስ፥
ፆሳ ኦግያ ቆንጭስያ ፖኦ፥
ነ አሳ እስራኤለስካ ቦንቾ"
ያግድ ፆሳ ጋላትስ።2:32 እሳ 42:6፤ 49:6፤ 52:10.
33 ዮሰፋራነ ማይራምራ እያዉ ኦደትዳባን ማላለትዶሶና። 34 ስሞን ኤንታ አንጅስ። አየ ማይራምኮ፥ "ሄኮ ዳሮ አሳ ዎዛና ቆፋይ ቆንጫና መላ፥ እስራኤለን ደእያ ዳሮታስ ኤንታ ኩንደስነ ደንዱዋስ ፆሳን ዶረትስ። 35 ቃስ ኤቀተይሳታስ ማላ ግዳና። ነ ሸምፑዋራካ ቃስ ማሽ አና" ያግስ። 36 ቃስ አሴራ ያራፐ ግድዳ ፋኑኤላ ናእያ ሃና ጌተትያ ናበይ ደአዉሱ። እያ ዳሮ ጭማሱ፤ እያ ባ ኮይሮ አዝናራ ላፑን ላይ ደአሱ። 37 እ አዝናይ ሀይቅን ሆስፑን ታማነ ኦይዱ ላይ ግዳና ጋካናዉ ቃማነ ጋላስ ፓጨይ ባይና ዎሳንነ ፆማን ፆሳ ኬን ሀጋዛሱ። 38 እያ ሄ ሳትያን ባዳ ፆሳ ጋላታሱ፤ የሩሳላመ ዎዘተ ናግያ ኡባስ ዮጋ ናአባ ማርካታሱ። 39 ዮሰፋራነ ማይራምራ ጎዳ ህግያን ኪተትዳ ዎጋ ኡባ ፖልዳፐ ጉየ ጋልላ ቢታን ደእያ ባንታ ካታማ ናዝረተ ስምዶሶና።2:39 ማቶ 2:23. 40 ናአይ ድጭሸነ ምንሸ ብስ። ጭንጫተን ኩምስ፤ ፆሳ አ ኬሀተይ እያ ቦላ ደኤስ።
የሱሲ ፆሳ ኬን
41 ዮሰፋራነ ማይራምራ ፓስካ ባኣለ ቦንቻናዉ ላይን ላይን የሩሳላመ ቦሶና።2:41 ከሳ 12:1-27፤ ዛረ 16:1-8. 42 የሱሳስ ታማነ ናምኡ ላይ ግድያ ዎደ ካሰ ሜዘትዳይሳዳ ባኣለ ቦንቻናዉ ብዶሶና። 43 ባልያ ቦንችዳፐ ጉየ ሶ ስምያ ዎደ ናአይ የሱሲ የሩሳላመን አትስ። ሽን ዮሰፋራነ ማይራምራ እ የሩሳላመን አቶይሳ ኤርቦኮና። 44 እ ሶ ስምያ አሳራ ዎላ ደእያ ዳንን ኤንቲ እስ ጋላሳ ኦገ ብዶሶና። እ ባይናይሳ ኤርዳፐ ጉየ ባንታ ዳቦታነ ላገታ ማታን ኮይዶሶና። 45 እ ያን ይን ኮይሸ ጉየ የሩሳላመ ጋካናዉ ብዶሶና።
46 ሄ ጋላሳፐ ጉየ ፆሳ ኬን አስታማረታ ግዶን ኡትድ ኤንታባ ስእሸነ ኤንታ ኦይችሸ ደእሽን ደምዶሶና። 47 እያ ስእያ ኡባይ እያ አኬካንነ ዛሩዋን ማላለትዶሶና።
48 ሶ አሳይ እያ ደምዳ ዎደ ማላለትዶሶና። እያ አያካ፥ "ታ ናአዉ፥ አይስ ኑና ሀይሳዳ ኦዲ? ነ አዋራነ ታራ ነና ኮይሸ ኡንኤትዳ" ያጋሱ።
49 የሱሲ ኤንታኮ፥ "ታና አይስ ኮዬቲ? ታ፥ ታ አዋ ኬን ዳናዉ በሰይሳ ኤረከት" ያግስ። 50 ሽን እ ኤንታኮ ግዳባ ኤንቲ አኬክቦኮና።
51 ሄሳፈ ጉየ፥ ኤንታራ እስፈ ናዝረተ ካታማ ብስ። ኤንታዉ ኪተትሸ ደእስ። እያ አይያ ሄ ኡባ ባ ዎዛናን ዎዳ ናጋሱ። 52 የሱሲ፥ ጭንጫተን፥ ጌሳንነ ቴማን ፆሳ ስንንነ አሳ ስንን ድጭስ።2:52 1 ሳሜ 2:26፤ ሌም 3:4.