1 የሱሲ ፆሳ ኬፈ ከይሽን፥ እያ ታማረታፐ እሶይ፥ "አስታማርያዉ፥ ሀ ሎኦ ሹቻነ ሀ ሎኦ ሹቻ ኬ በአይ!" ያግስ።

2 የሱሲ ዛሪድ፥ "ሀ ግታ ሹቻ ኬ በአይ? ሀ ኬይ ሹች ሹቻ ቦላ ግምበትዳ መላ ላለቶና አተና፤ እስ ሹችካ አቶና ኡባይ ላለታና" ያግስ።

3 የሱሲ ፆሳ ኬፈ ህን ባጋራ ሻማሆ ዙማ ቦላ ኡትዳሽን፥ ጰፅሮስ፥ ያይቆብ፥ ዮሃንስነ እንድርያስ ባንታርካ እያኮ ይድ፥ 4 "ሀይስ አዉደ ሀናኔኮ፥ ኑስ ኦዳ፤ ሀ ኡባይ ፖለታና ዎድያ ኤርስያ ማላታይ አይቤ?" ያግድ ኦይችዶሶና።

5 የሱሲ ቃስ ኤንታኮ ሀይሳዳ ያግድ ኦድስ። "ህንተና ኦንካ ባለና መላ ናገትተ። 6 ዳሮ አሳት ታ ሱንን፥ ‘ታኒ ክርስቶሳ’ ያግድ ታማርስሸ ይድ፥ ዳሮ አሳ ባለና። 7 ማታን ደእያ ኦላነ ሃሆን ደእያ ኦላ ዎረ ህንተ ስእያ ዎደ ህርጎፍተ። ሄሳ መላባይ ሀናናዉ በሴስ፥ ሽን ዉርሰይ ቡሮና። 8 እስ ቢታ አሳይ ሀራ ቢታ አሳራ ኦለታና፤ ቃስ እስ ካዎተይ ሀራ ካዎተታራ ኦለታና፤ ቢታ ቃፆይ ኡባ በሳን ሀናና፤ ኮሻይ ዳና፥ ሽን ሄስ ኡባይ የሎ እቀስ ዞከ መላ።

9 "ሽን ህንተ፥ ህንተ ሁጰን ናገትተ። አይስ ጊኮ፥ አስ ህንተና ኦይክድ፥ ፕርዳ ኬስ አድ እማና፤ ቃስ አይሁደ ዎሳ ኬታንካ ህንተና ልሶን ጋራፋና፤ ደርያ ሃረይሳታ ስንንነ ካዎታ ስንን ታ ግሾ ህንተ ማርካታናዉ ኤቃና።✝ 10 ዉርሰይ ጋካናፐ ስን ዎንገላይ ኮይሮ ደረ ኡባስ ኦደታናዉ በሴስ። 11 ኤንቲ ህንተና ፕርዳ ኬ ኤህያ ዎደነ አድ እምያ ዎደ፥ ዎይግድ ኦዳነኮ ኮይሮ ህርጎፍተ፤ ሄ ሳትያን ፆሳይ ህንተዉ እምያባ ኦድተ። ህንተናን ጌሻ አያናይ ኦደቴስፐ አትሽን፥ ህንተና ግደከታ።

12 "እሻይ ባ እሻ፥ አዋይ ባ ናኣ ዎሳና። ናይት ባንታና የልዳይሳታ ቦላ ደንድድ፥ ኤንታ ዎሳና። 13 አሳ ኡባይ ህንተና ታ ሱን ግሾ እፃና፥ ሽን ዉርሰ ጋካናዉ ምንዳይ አታና።✝

14 "ሽን ዮ ቱናተይ ኤቃናዉ በሶና በሳን ኤቅዳሽን ህንተ በአና።" (አኬክሶ፦ ሄስ ዎይ ጉሰኮ ናባበይስ አኬኮ!) "ይሁዳ ቢታን ሄ ዎደ ደኤይሳት ደርያኮ ባቃቶ።✝ 15 ኬ ሁጰን ደእያ ኡራይካ እስባ ኤካናዉ ዱገ ዎድ፥ ባ ሶ ገሎፖ።✝ 16 ጋደን ደኤይስ ባ ማኡዋ ኤካናዉ ጉየ ስሞፎ። 17 ሄ ዎደ ቃንትዳ ማጫሳታስነ ንያ ማጫሳታስ ዳሮ ኡንአ ግዳና። 18 ሽን ሀይስ ኡባይ ሀንያ ዎደይ ባልጎ ግዶና መላ፥ ፆሳ ዎስተ። 19 አይስ ጊኮ፥ ፆሳይ አላምያ መዳ ዎድያፐ ዶምድ፥ ሀእ ጋካናዉ ሀንቦና መቶይነ ስንፈካ ሀኖና መቶይ አሳ ቦላ ሄ ዎደ ሀናና።✝ 20 ጎዳይ ሄ ጋላሳታ ታይቡዋ ጉናኮ፥ አሰ ግድዳይ ኦንካ አተና። ሽን እ ባ ዶርዳ አሳ ግሾ፥ ሄ ጋላሳታ ታይቡዋ ጉስ።

21 "ሄ ዎደ ኦንካ ህንተና፥ ‘ሄኮ፥ ክርስቶስ ሀይሳን ደኤስ ዎይኮ ክርስቶስ ህንን ደኤስ’ ያግኮ፥ ሄሳ አማኖፕተ። 22 ዎርዳንቾ ክርስቶሳትነ ዎርዶ ናበት ደንድድ ባንታዉ ዳንዳኤትኮ፥ ሀር አቶሽን ፆሳይ ዶርዳይሳታካ ባለናዉ ማላታታነ ማላልስያባታ በሳና። 23 ሽን ህንተ ናገትተ፤ ታኒ ህንተዉ ኡባባ ካሰታዳ ኦዳስ።

24 "ሽን ሄ ዎደ ሄ ዋያፐ ጉየ፥

አዋይ ማና፤

አጌናይ ፖኡዋ አጋና።✝

25 ፆልንቶት ሳሎፐ ኩንዳና፤

ቃስ ሳሎን ደእያ ዎልቃትካ ቃፃና።✝

26 ሄ ዎደ አሳ ናአይ፥ ግታ ዎልቃራነ ቦንቹዋራ ሻራ ግዶራ ይሽን ኤንቲ በአና።✝ 27 ሄ ዎደ ታኒ ኪታንቾታ ሳአ ኦይዱ ባጋ ኪታና፤ ሳአ ጋፃፐ ሳሎ ጋፃ ጋካናዉ፥ ፆሳይ ዶርዳ አሳ ሺሻና።

28 "ሌምሱዋ ባላሰ ምፈ አኬክተ፤ ባላስያ አጭያ ዎደነ እ ሀይይ ጭልእያ ዎደ፥ ቶርቸይ ማታትዳይሳ ህንተ ኤሬታ። 29 ሄሳዳካ፥ ህንተ ሄ ኡባባይ ሀነይሳ በእያ ዎደ፥ እ ማትድ ፐንገ ጋክዳይሳ ኤርተ። 30 ታኒ ህንተዉ ቱማ ኦዳይስ፤ ሀ ኡባባይ ሀናና ጋካናዉ ሀይሳን ደእያ አሳ ኡባይ ሀይቀና። 31 ሳሎይነ ሳእ አና፥ ሽን ታ ቃላይ አና።

32 "ሽን ሄ ጋላሳነ ሄ ሳትያ አዋ ፃላላፐ አትሽን፥ ሀር አቶሽን ሳሎን ደእያ ኪታንቾታ ግድን ዎይኮ ናኣ ግድን ኦንካ ኤረይ ባዋ።✝ 33 ሄ ዎደይ አዉደ ግዳኔኮ፥ ህንተ ኤሮና ግሾ፥ ናገትተነ ምንተ። 34 ታ ዩሳይ፥ ባ ኬ አግድ፥ ኦገ ብያ አሳ መላ። ኡራይ ባ አይለታስ ሁጰን ሁጰን ኦሶ እምድ ኤንታ ባ ኦሱዋ ቦላ አዋ ኦስ፤ ቃስ ናገይስ ምንድ ናጋና መላ ኪትስ።✝

35 "ሄሳ ግሾ፥ ምንተ። አይስ ጊኮ፥ ጎዳይ ኦማርስ ግድን ዎይኮ ግድ ብላሄ ግድን ዎይኮ ኩቶ ዋሶ ግድን ዎይኮ ዎንት ማ ግድን አዉደ ያነኮ፥ ህንተ ኤረከታ። 36 ህንተ አኬኮና እ ይድ ህንተ ስክድ ደእሽን ደሞና መላ ምንተ። 37 ታኒ ህንተዉ ኦደይሳ አሳ ኡባስ ኦዳይስ፤ ምንተ" ያግስ።