ባብሎነፐ ይዳ አሳታ
(2 ካዎ 20:12-19)
1 ሄ ዎደ፥ ባልዳና ናአይ፥ ባብሎነ ካዎይ ማርዶክ-ባልዳን፥ ህዝቅያስ ሀርግድ ፓፅዳይሳ ስእዳ ግሾ፥ ዳብዳበነ እሞታ ህዝቅያሳስ የድስ። 2 ህዝቅያስ ኪተትድ ይዳ አሳታ ሞክስ። ባ ሻሉዋ ምንጅያ ኬን ደእያ ብራ፥ ዎርቃ፥ ሳዉዋ፥ ሎኦ ዛይተ፥ ባ ኦላ ሚሸታነ ባ ሻሉዋ ምንጅያ ኬን ደእያባ ኡባ ኤንታ በስስ። ባ ሶን ዎይኮ ባ ጋዋን ደእያባ ኡባፈ ህዝቅያስ ኤንታ በሶና አግዳባይ ባዋ።
3 ናበይ እሳያስ ካዋ ህዝቅያሳኮ ብድ፥ "ሀ አሳት ዎይግዶና? አዉፐ ይዶና?" ያግድ ኦይችስ።
ህዝቅያስ፥ "ኤንቲ ታኮ፥ ሃሆ ቢታ ባብሎነፐ ይዶሶና" ያግስ።
4 እሳያስ ዛሪድ፥ "ኤንቲ ነ ሶን አይ አይ በእዶና?" ያግድ ኦይችስ።
ህዝቅያስ፥ "ኤንቲ ታ ጋን ደእያ ኡባባ በእዶሶና፤ ታ ሻሉዋ ምንጃ ኬን ደእያባፐ ታኒ ኤንታ በሶናባይ ባዋ" ያግስ።
5 ያትን፥ እሳያስ ህዝቅያሳኮ፥ "ኡባፈ ዎልቃማ ጎዳይ ግያባ ስአ። 6 ‘ኔኒ፥ ካዎ ጋን ደእያባ ኡባይነ ነ ማይዛት ሀች ጋካናዉ ሺሽዳባ ኡባይ ኩም ድኤትድ፥ ባብሎነ ቢታ ባና ዎደይ ያና፤ አይብካ አተና። 7 ቃስ ኔፐ የለትዳ ነ አሾነ ነ ሱ ግድዳ ነ ኮቻት ድኤትድ ባና፤ ባብሎነን ካዎ ጋን ሹፋ ግድድ ኦና’ ያጌስ"39:7 ዳነ 1:1-7፤ 2 ካዎ 24:10-16፤ 2 ታር 36:10. ያግስ።
8 ህዝቅያስ ዛሪድ፥ "ኔኒ ኦድዳ ጎዳ ቃላይ ሎኦ። ሽን ታ ላይን ሳሮነ ዎፓ ግዶ" ያግድ ቆፕስ።