እሳያሳ ማፃፋ 21

ባብሎነ ቦላ ኦደትዳ ትንብተ

1 አባ ማታን ደእያ ባዙዋስ ኦደትዳ ቃላ።

ናገበ ጎተይ መንረሸ የይሳዳ ኦላንቾይ ባዞፈ፥ ዮ ቢታፈ ዬስ።

2 ታኒ እስ ያሽያ ቆንጨ በአስ፤ አድ እመይስ አድ እሜስ፤ ድኤይስ ድኤስ። ኤላማ ከያ! ሜዶና ካታማ ኦይካ! ባብሎነይ ጋዳ ዋይያ ታኒ ድጋና።

3 ሄሳ ግሾ ታ አሳተይ ሳከትስ፤ ማጫስ ኤቀተይሳዳ ታኒ ኡንኤታስ። ታኒ ስእያባይ ታና ኮኮርስስ፤ ታኒ በእያባይ ታና ዳጋንስ። 4 ታና ቢጮዬስ፤ ያሻን ኮኮራስ፤ ታኒ ኡፋይስ ዎዳ ኦማርሳይ ኡንአን ላመትስ።

5 ግብራ ጊግስዶሶና፤ ኡትያ ሶ ጊግስዶሶና፤ ማናዉነ ኡያናዉ ኡትዶሶና። ህንተኖ ሀላቃቶ፥ ደንድተ! ህንተ ጎንዳልያ ቁችተ!

6 ጎዳይ ታኮ ሀይሳዳ ያግስ፦ "ባዳ ሀንያባ ዎችድ ነዉ ኦድያ አስ ዎ። 7 ፓራት ጋረ ጎችያ ዎደ፥ ሀረነ ግማለ ቶገይሳታ በእያ ዎደ፥ ሎይድ ፄሎ፤ አኬክድ በኦ" ያግስ።

8 ዎቸይስ፥ "ጎዳዉ፥ ጋላስነ ቃማ ፓጭ ባይና ታ ሻኩዋ ቦላ ኡታዳ ናጋይስ። 9 ሄኮ፥ ናምአ ናምአ ግድድ ፓራ ጋረ ቶግዳ አሳት ዮሶና" ያግስ። እ ቃስካ፥ "ባብሎነይ ኩንድስ፤ እያ ፆሳታ ምስለት ሳአን ኩንድድ ጋጨትዶሶና" ያግድ ዋስስ። 10 ህንተኖ፥ ዉዱማን ጋጨትዳ ታ አሳዉ፥ ኡባፈ ዎልቃማ ጎዳፐ፥ እስራኤለ ፆሳፈ ስእዳባ ታኒ ህንተዉ ኦዳይስ።

ኤዶመ ቦላ ኦደትዳ ትንብተ

11 ኤዶመባ ጎዳይ ሀይሳዳ ያግስ፦ "እስ አስ ሳይረፐ ታና ፄግድ፥ ናገይሶ፥ ሳእ ዎንታናዉ አይ ማል አትዴ? ናገይሶ፥ ሳእ ጌያናዉ አይ ማል አትዴ?" ያጌስ። 12 ናገይስ ዛሪድ፥ "ሳእ ዎንታና ሀኔስ፤ ሽን ዛር ቃማና። ህንተ ኦይቻናዉ ኮይኮ ኦይችተ፤ ስም ይድ ኦይችተ" ያግስ።

አራበ ቦላ ኦደትዳ ትንብተ

13 አራበ ባ ጎዳይ ሀይሳዳ ያጌስ፦ "ህንተኖ ዳዳና ዛልአንቾቶ፥ ህንተ፥ ህንተ ጫና ግማለታራ አራበ መላ ቢታን አቃና። 14 ህንተኖ፥ ቴማን ቢታን ደእያ አሳዉ፥ ሳሞትዳይሳታስ ሃ ኤህተ፤ ኮሻትዳይሳታስ ካ እምተ። 15 ኤንቲ ማሻፈ፥ ሾሆፔ ሾደትዳ ማሻፈ፥ ዳፈትዳ ዶንገፈነ ምኖ ኦላፐ ባቃቶሶና" ያጌስ።

16 ጎዳይ ታኮ ሀይሳዳ ያግስ፦ "ኡነ ኦሳንቾ ዎደይ ዉረይሳዳ፥ እስ ላይ ግዶን ቀዳረ ቦንቾ ኡባይ ዉራና። 17 ቀዳረን ደእያ ዶንገን ዱክያ ዎልቃማ ኦላንቾታፐ ጉት አታና፤ ጎዳይ እስራኤለ ፆሳይ ሄሳ ኦድስ" ያግስ።