እሳያሳ ማፃፋ 22

የሩሳላመስ ኦደትዳ ትንብተ

1 "ቆንጨ ዛንጋራ" ጌተትያ በሳባ ጎዳይ ኦድዳ ቃላ። ህንተና ኡባ አይብ ኡንኤን ፖቀ ኬ ቦላ ከይደቲ? 2 ነኖ ዋሶይ፥ ድርጎይነ ዎጫም ኩምዳ ካታማዉ፥ ነ ግዶን ሀይቅዳ አሳት ማሻን ዎይኮ ኦላን ሀይቅቦኮና። 3 ህንተ ሀላቃት ኡባይ እስፈ ባቃትዶሶና፤ ኤንቲ ዶንገይ ባይና ጮ ድኤትዶሶና። ኤንቲ ሃክድ ባቃትኮካ በትዳ ኡባይ ኦይከትዶሶና። 4 ሄሳ ግሾ፥ "ታና አጋግተ፤ ታ አሳስ ምሻ ዬሆ አፉፃዳ ዬካና፤ ታ አሳ ዩዋስ ታና ምንፕተ" ያጋስ። 5 ጎዳይ፥ ኡባፈ ዎልቃማ ፆሳይ ቆንጨ ዛንጋራን ዳጋማ፥ የተነ ኡንአ ጋላስ ኦስ፤ ቃስ ግምበት ዎድያ ጋላስነ ደረታኮ ማዴስ ዋስያ ጋላስ ኦስ።

6 ኤላም ባ ፓራ ጋረታራነ ፓራ አሳታራ ባ ዶንግያ ኦይክድ ይስ፤ ቂራ ዎታዳረት ባንታ ጎንዳለታ ጊግስዶሶና። 7 ህንተ ሎኦ ዛንጋራት ፓራ ጋረታን ኩምዶሶና፤ ፓራ አሳት የሩሳላመ ፐንግያ ስንን ኤቅዶሶና። 8 እ ይሁዳ ሚፃታ ቃርስ። ሄ ጋላስ ዎራ ኬን ደእያ ካዋ ኦላ ሚሸታ በእደታ። 9 ዳዊታ ካታማ ግዶን ላለ ዶርያ በእደታ፤ ጋርሳ ባጋን ደእያ ኦላን ሃ ኩንደታ። 10 የሩሳላመን ደእያ ኬታ ታይብደታ፤ ድርሳ ዛሪድ ግምባናዉ ኬታ ላልደታ። 11 ካሰ ጋልአ ዜሩዋን ደእያ ሃ ዛሪድ፥ ናምኡ ግምበታፐ ግዱዋን ኦላ ጊግስደታ። ሽን ህንተ ሄሳ መዳ ፆሳ አኬክበከታ፤ ዎይኮ ዳሮ ዎደፐ ስን ሄሳ ሀልችዳይሳ ሀሳይበከታ።

12 ሄ ጋላስ ጎዳይ፥ ኡባፈ ዎልቃማ ፆሳይ፥ ህንተና ዬሆስነ ዘለልሳስ፥ ሁጰ ቡሉሳናዉነ ካዮ ማኦ ማአናዉ ፄግስ። 13 ሽን ህንተ ሄሳ አግድ ኡፋይተታነ የፄታ፤ ቦሩነ ዶርሰ ሹኬታ፤ አሹዋ ሜታ፤ ዎይነ ኡዬታ። ኑኒ "ዎንቶ ሀይቃናዉ ደእያ ግሾ፥ ሀች ማናነ ኡያና" ያጌታ።

14 ኡባፈ ዎልቃማ ጎዳይ ሀይሳ ታዉ ቆንጭስስ፤ "ህንተ ሀይቃና ጋካናዉ ሀ ናጋራይ ህንተዉ አቶ ጌተተና። ታኒ ጎዳይ፥ ኡባፈ ዎልቃማ ፆሳይ ሀይሳ ኦዳይስ" ያግስ።

15 ጎዳይ፥ ኡባፈ ዎልቃማ ፆሳይ፥ "ባዳ ካዎ ጋን ሹመትዳ ሳምናሳኮ ሀይሳዳ ያጋ፤ 16 ኔኒ ሀይሳን አይ ኦይ? ኔኒ ሀይሳን፥ ዛላ ዎጫዳ ዱፎ ጊግሳና መላ፥ ቃ በሳን ነዉ ዱፎ ቦካና መላነ ዛላ ዎጫዳ ነዉ ሸምፖ በሲ ኦና መላ ኦና ኦይቻዲ? 17 ነኖ ምኖ አድያዉ፥ ነና ጎዳይ ምንድ ኦይካና፤ ጩጩምድ ዎራ ሆላና። 18 ኮሰዳ ነና ዩሽድ ዳልጋ ቢታን ሆላና። ነኖ ነ ጎዳ ኬስ ዬላ ግድዳ አድያዉ ኔኒ ያን ሀይቃና፤ ነ ቦንቾ ፓራ ጋረት ያን አታና። 19 ታኒ ነና ነ ኦሱዋፐ ከሳና፤ ነ ሹማተፈ ሻራና። 20 ሄ ጋላስ ታኒ ካልቀ ናኣ፥ ታ አይልያ ኤልያቄመ ፄጋና። 21 ታኒ ነ ማኡዋ እያ ማይዛና፤ ነ ዳንጩዋ እያ ዳንጭሳና፤ ነ ሹማተ እያዉ እማና። እ፥ የሩሳላመንነ ይሁዳን ደእያ አሳስ አዋ ግዳና። 22 ታኒ ዳዊተ ኬ ቁልፕያ እያዉ እማና፤ እ ዶይን ኦንካ ጎርደና፤ እ ጎርድን ኦንካ ዶየና። 23 ታኒ እያ አማንያ በሳን ሸዳ ቶላና፤ እ ባ አዋ ኬስ ቦንቾ አራታ ግዳና። 24 ቃንዳፈ ኦቶ ጋካናዉ ደእያ ሶ ሚሸታ፥ ኮጫን ካቀይሳዳ፥ እያ አዋ ኬ ቦንቹዋ፥ ናይታነ፥ ናይታ ናይታ ኡባ እያ ቦላ ካቃና" ያግስ።

25 ኡባፈ ዎልቃማ ጎዳይ ሀይሳዳ ያጌስ፦ "ሄ ጋላስ አማንያ በሳን ሽዳ ቶለይ ክቻና፤ ቃንፀታናነ ኩንዳና። እያ ቦላ ካቀትዳ ቶሆ ኡባይ ዱፅድ ዎና" ያጌስ። ጎዳይ ሀይሳ ኦድስ።