እሳያሳ ማፃፋ 62

ፅዮነ ኦራ ሱን

1 ፅዮነ ግሾ፥ ታኒ ስእ ጊከ፤

የሩሳላመ ፅሎተይ ፖኦዳ፥

እ አቶተይ ዎንታ ፃልቀዳ ከያና ጋካናዉ

ታኒ ስእ ጊከ።

2 ካዎተት ነ ፅሎተ፥

ካዎት ኡባይ ነ ቦንቹዋ በአና።

ጎዳይ ሱንያ ኦራ ሱንን

ኔኒ ፄገታና።

3 ኔኒ ጎዳ ኩሸን ሎእዳ

ካዎተ ካላቻ ግዳና።

4 ኔኒ፥ "ዶገትዳሮ" ጌተታካ፤

ነ ቢትያ፥ "ን" ጌተቱኩ።

ሽን ኔኒ፥ "ታ ኡፋይሳይ እን ደእያሮ"፥

ነ ቢትያ፥ "አዝና ገልዳሮ" ጌተታና።

ጎዳይ ነናን ኡፋይታና፤

ነ ቢትያካ አዝን ደእያሮ ግዳና።

5 ፓን ጌላኦ ኤከይሳዳ፥

ነ ናይት ነና ማቻና።

ኤከይስ ገልያርን ኡፋይተይሳዳ፥

ነ ፆሳይ ነናን ኡፋይታና።

6 ነኖ የሩሳላመ፥ ነ ድርሳ ግምብያ ቦላ

ዎቸይሳታ ታኒ ዎስ፤

ኤንቲ ጋላስነ ቃማ ስእ ጎኮና።

7 ህንተኖ፥ ጎዳ ቆፍሰይሳቶ፥

እ፥ የሩሳላመ ኬፃና ጋካናዉነ

ቢታ ኡባን ናሸትዳ ካታማ ኦና ጋካናዉ

ህንተካ ሸምፖፕተ፤ እያካ ሸምፕሶፕተ።

8 ጎዳይ ባ ኡሻቻ ኩሽያንነ

ባ ዎልቃማ ቀስያን ሀይሳዳ ያግድ ጫቅስ፦

"ታኒ ናምአን ህንተ ካ

ህንተ ሞርከት ማና መላ ኦከ።

ህንተ ዳቡርዳ ህንተ ዎይነ ኡሻ

አላጋት ኡዮኮና።

9 ሽን ባንታ ካ ጫክዳይሳት

ምድ ጎዳ ጋላታና፤

ዎይነ ማፀይሳት ታ ኬ ዳባባን ኡያና።

10 አተ! ፐንገራ ከይድ ቢተ!

አሳስ ኦገ ጊግስተ! ዎጋ ኦገ ከስተ።

ሹቻ ድግተ፤

ካዎተት ኦግያ ደማና መላ ማላ ኤስተ።

11 ጎዳይ ሳአ ጋፃስ

ሀይሳዳ ያግድ አዋጅስ:✝62:11 እሳ 40:10፤ ቆን 22:12.

‘ፅዮነ አሳስ ሀይሳዳ ያግተ፤

ሄኮ፥ ህንተና አሸይስ ጋክስ!

እያ ጋተይ እያራ ደኤስ፤

እ እምያ ዎይቶይ እያ ስንን ደኤስ’

ያግተ።

12 ህንተ፥ ‘ጎዳይ ዎዝዳ ጌሻ አሳታ’

ጌተትድ ፄገታና።

የሩሳላመይ፥ ‘ኮየትያሮነ

የገታ አታቦና ካታምዉ’ " ጌተታና።