ዎዘትዳ ደርያ ኡፋይሳ
1 ባይሳ ቢታይነ መላ ቢታይ ኡፋይታና፤ አይኮይ ባይና መላ ቢታይ ኡፋይታናነ ጪያና። 2 መላ ቢታይ ጪሸ ማአና፤ ኡፋይሳ ማዝሙረ የፃና። ልባኖሰ ቦንቹዋ ማአና፤ ቃርመሎሳነ ሳሮና ግታተይ እመታና፤ ኤንቲ ጎዳ ቦንቹዋነ ኑ ፆሳ ግታተ በአና።
3 ዳቡርዳ ኩሸታነ አርጋጭዳ ጉልባታታ ምንተ። 4 ያሻ ዎዛን ደኤይሳታኮ፥ "ምንተ! ያዮፍተ! ሄኮ፥ ህንተ ፆሳይ ሀሎ ከያናዉነ ባ ፆሳተን ኩሸ ዛራናዉ ይድ ህንተና አሻና" ያግተ።
5 ሄ ዎደ፥ ቆቀታ አይፈይ ዶየታና፤ ቱለታ ሀይይ ስአና። 6 ዎበት ገንኤዳ ጉፓና፤ ደዶት ኡፋይሳን የፃና፤ መላ ቢታን ሃ ጎጋና፤ መላ በሳን ፑልቶይ ቃና። 7 ፁግያ ሻፈይ ኤለ ሃ ግዳና፤ መላ ቢታይ ሃ ፑልታና፤ ዎርካናት አላትያ በሳን ማትነ ማይረይነ ማቅ ዶላና።
8 ያራ ዎጋ ኦገይ ከያና፤ እካ "ጌሻተ ኦገ" ጌተታና። ቱናት ሄ ኦግያራ ቦኮና፤ ኤያት ያን ስመረቶኮና፤ ሽን ጌሻታስ ግዳና። 9 ጋሞይ ዎይኮ ያሽያ ዶአት ያራ ካንኮና፤ ያን በንቶኮና፤ ሽን ዎዘትዳይሳታ ፃላል ሄመታና። 10 ጎዳይ ዎዝዳይሳት ስማና፤ የፅሽ፥ ፅዮነ ገላና፤ መርና ኡፋይሳይ ኤንታ ሁጵያን ኡታና። ኤንቲ ኡፋይታናነ ሀሹ ጋና፤ አዛኖይነ ኦለይ ኤንታፈ ሃካና።