1 ቤላ ጌተትያ ባብሎነ ኤቃይ ሆክስ፤

ነቦ ጌተትያ ኤቃይ ጉፋንስ።

ኤንታ ምስለት ጫና መሄ ቦላ ጫነትዶሶና፤

ዳቡርዳ መሄታስ ዴፆ ቶሆ ግድዶሶና።

2 ዴፁዋፐ ደንድዳይሳን ጫና መሄት፥

ጫናራ እስፈ ኩንድዶሶና።

ኤቃት ባንታና አሻናዉ ዳንዳኦና ግሾ

ባንታዉ ድኤትድ ብዶሶና።

3 ህንተኖ፥ እስራኤለፐ አትዳይሳቶ፥ ያይቆባ ኮቻቶ፥

ህንተ ቃንትዳ ዎደፐ ዶማዳ ናግዳይ፥

ህንተ የለትዳ ዎደፐ ዶማዳ ቶክዳይ፥

ታኒ ኦደይሳ ስእተ።

4 ህንተ ጭማና ጋካናዉ፥

ፑሉማና ጋካናዉ ታኒ ታና፤

ታ ህንተና ማዳና።

ታኒ ህንተና መስ፤ ታ ህንተና ናጋና፤

ታ ህንተና ቶካናነ አሻና።

5 ታና ኦደራ ጋደዬቲ?

ዎይኮ ኦደራ ልክሴቲ?

ኤንቲ ዎል ዳኔስ ጋናዉ

ታና ኦደራ ግናየቲ?

6 አሳይ ዎርቃነ ብራ ባንታ ቃርፂታፐ ቆልድ፥

ፆሰ ኦድ መና መላ ዎርቃ ሼሸይሳስ እሞሶና።

እ ኦድ ስምን

ኤንቲ ኤቃ ስንን ጉፋንድ ጎይኖሶና።

7 ኤንቲ እያ ደንድ፥ ባንታ ሀሽያን ቶክድ፥

እያ በሳን እያ ዎን፥ እ ሄ በሳን ኤቅ አጌስ።

ባ ደእያ በሳፈ ቃፀና፤

አስ እያኮ ዋስኮ እያዉ ዛሮ እመና፤

እያ መቱዋፐ እያ አሸና።

8 ህንተኖ ናጋራንቾቶ፥

ሀይሳ ሀሳይተ፤ ቆፕተ፤

ህንተ ዎዛናን ዎተ።

9 በን ዎደ ሀንዳባታ ሀሳይተ፤

ታፐ አትሽን፥ ሀራ ፆሲ ባዋ፤ ታኒ ፆሰ፤

ታ መል ኦንካ ባዋ።

10 ታ ቆፋይ ምናና፤

ታኒ ታ ሀልቹዋ ኡባ ፖላና።

ዉርሰን ሀናናባ ዶመን፥

ስንፈ ሀናናባ ኮይሮታዳ ኤርሳይስ።

11 ዶሎሀ ባጋፈ ቦንቅያ ካፎ፥

ሃሆ ቢታፈ ታ ቆፋ ፖልያ አስ ፄጋና።

ታኒ ቆፕዳባ ፖላና፤

ታኒ ሀልችዳባ ኦና።

12 ህንተኖ ዎዛን ሙምዳይሳቶ፥

ፅሎተፈ ሃክዳይሳቶ ታና ስእተ።

13 ታኒ ታ ፅሎተ ማታያና፤

እካ ሃሆና ግደና።

ታ አቶተይ ጋምኤና፤ ታ አቶተ ፅዮነስ፥

ታ ቦንቹዋ እስራኤለስ እማና" ያጌስ።