ሳናክሬማ ማንደ
(2 ካዎ 18:13-27፤ 2 ታር 32:1-19)
1 ህዝቅያስ ካዎትዳ ታማነ ኦይዳን ላይን፥ አሶረ ካዎይ ሳናክሬም ዩሾይ ግምበትዳ ይሁዳ ካታማታ ኦልድ ኦይክስ። 2 ሄሳፈ ጉየ፥ አሶረ ካዎይ ላክሶ ካታማፐ እስ ቶራ ሞጮና ዳሮ ኦላንቾታራ ካዋ ህዝቅያሳኮ የሩሳላመ የድስ። እ፥ ብድ ማኦ ሜጭያ ጋድያኮ ኤፍያ ኦግያፐ ቆሞ ባጋራ ደእያ ኤልዳ ሃይ ጎግያ ዋ ማታን ኤቅስ። 3 ካዎ ጋ አይስያ አልቃ ናአይ ኤልያቄም፥ ፃፈይ ሼብነ፥ ታርከ ፃፈይ፥ አሳፋ ናአይ፥ ዮኣስ እያኮ ካረ ከይዶሶና።
4 አሶረ ቶራ ሞጮናይ ኤንታኮ፥ "ህዝቅያሳስ ሀይሳዳ ያግድ ኦድተ፦ ‘ዎልቃማ አሶረ ካዎይ፥ ኔኮ ሀይሳዳ’ ያጌስ፦ ኔኒ ሀይሳ መላ ምናናዉ አይብን አማነታዲ? 5 ኔኒ ጮ ቃላን፥ ኦላ ኦለታናዉ ታዉ ጭንጫተነ ዎልቅ ደኤስ ያጋሳ። ሽን ኔኒ ኦናን አማነታዳ ታ ቦላ ሀይሳዳ ማካላይ? 6 ኔኒ ‘ግብፀ ካዎይ ታና ማዳና’ ጋዳ ቆፕዳባ ግድኮ መቅዳ ማይረ ፃምአ ጉፈትያ አሳ መላ። ፃምአይ መቅን ፕንጮይ ኩሽያ ጫደስነ ማዱንፅሴስ። ግብፀ ካዎይ ባናን አማነትያ አሳ ኡባስ ሄሳ መላ።36:6 ህዝ 29:6-7. 7 ሽን ኔኒ፥ ‘ኑኒ ጎዳን፥ ኑ ፆሳን፥ አማነቶስ’ ያግኮ፥ ህዝቅያስ ይሁዳነ የሩሳላመ አሳ፥ ‘ህንተ የሩሳላመን ደእያ ያርሾ በሳን ጎይናናዉ ኮሼስ’ ግድ፥ ፆሳ ጎይንያ ቃ በሳታነ ያርሾ በሳታ ድግዳይ እያ ግደኔ?
8 "አነ ሀእ ሃያ! ታ ጎዳ አሶረ ካዉዋራ ጌዳረታ። ቶጋናዉ ዳንዳእያ አስ ነ ደምኮ፥ ናምኡ ሙኩሉ ፓራታ ታ ነዉ እማና። 9 ኔኒ፥ ‘ግብፀት ፓራ አሳታነ ፓራ ጋረታ ታዉ የዳና’ ጋዳ አማንኮ፥ ታ ጎዳ ቶራ ሞጮናታፐ እስ ላፋካ ዛራናዉ ዳንዳአካ። 10 ሄሳ ቦላካ፥ ታኒ ሀ ቢታ ይሳናዉ ቱማ ጎዳ ሸነይ ባይና ከያድና? ጎዳይ ባ ሁጰን ታና ‘ባዳ ሀ ቢታ ኦላዳ ይሳ’ ያግድ ኪትስ" ያግስ።
11 ሄሳፈ ጉየ ኤልያቄም፥ ሼብነ ዮኣስ አሶረ ሀላቃኮ፥ "ኑኒ ኤርያ አራምከ ዶናራ ኑስ ነ አይለታስ ኦዳፐ አትሽን፥ ግምበ ድርሳ ቦላ ደእያ አሳይ ስአና መላ እብራወ ዶናን ኦዶፓ" ያግዶሶና።
12 ሽን ሀላቃይ ዛሪድ፥ "ሀ ኪታ ታኒ ህንተዉነ ህንተ ጎዳ ፃላላስ ኦዳና መላ ታና ታ ጎዳይ ኪትቤና። ህንተራ እስፈ ባንታ ሽአ ማናዉነ ባንታ ሼሻ ኡያናዉ ደእያ፥ ሀ ግምበ ድርሳ ቦላ ደእያ አሳ ኡባስ ኦዳና መላ ኪትስ" ያግስ።
13 አሶረ ሀላቃይ ደንድ ኤቅድ፥ ባ ቃላ ቁ ኦድ፥ እብራወ ዶናን ሀይሳዳ ያግስ፦ "ዎልቃማ ግድዳ አሶረ ካዎይ ግያባ ስእተ! 14 ካዎይ ህንተኮ ሀይሳዳ ያጌስ፤ ‘ህዝቅያስ ህንተና ጭሞፎ’ እ ህንተና ታ ኩሸፐ አሻናዉ ዳንዳኤና። 15 ህዝቅያስ ህንተና፥ ‘ቱማ ጎዳይ ኑና አሻና፤ ሀ ካታማይካ አሶረ ካዋ ኩሸን ገለና’ ያግድ፥ ህንተ ጎዳን አማነታና መላ ኦፎ።
16 "ህንተ ህዝቅያስ ኦድያባ ስኦፕተ። አሶረ ካዎይ ህንተና፥ ‘ታራ ስገትተ፤ ሃ ታኮ ዪተ። ሄሳ ህንተ ኦኮ፥ ህንተ ኡባይ ህንተ ዎይነፐነ ህንተ ባላሰፐ ማና፤ ህንተ ቦክዳ ኦላፈካ ሃ ኡያና። 17 ታኒ ያዳ፥ ህንተና ህንተ ቢታ ዳንያ ቢታ ኤካዳ ኤፋና። ሄ ቢታይ ካነ ዎይነይ ኩምዳ ቢታ’ " ያግስ።
18 "ህዝቅያስ፥ ‘ጎዳይ ህንተና አሻና’ ያግድ ጭሞናዳ ናገትተ። ሀራ ካዎተታ ፆሳታፐ ባ ቢታ አሶረ ካዋ ኩሸፐ አሽዳ ፆሲ ደእዬ? 19 ሀማታ ፆሳትነ አርፋዳ ፆሳት አዉን ደኦና? ሳፋርዋይማ ፆሳት አዉ ብዶና? ኤንቲ ሳማርያ ታ ኩሸፐ ዎ ኤክዶና? 20 ሀ ቢታታ ፆሳታፐ ባ ቢታ ታ ኩሸፐ አሽድ ኤክዳይ ደኢ? ያትን ህንተ፥ ‘ጎዳይ የሩሳላመ ታ ኩሸፐ አሻና’ ያግድ ቆፔቲ?" ያግስ።
21 ሽን ካዎይ ኤንታኮ፥ "እያዉ አይ ዛሮካ እሞፕተ" ያግድ ዞርዳ ግሾ፥ አሳይ እስ ቃላካ እያዉ ዛሮና ስእ ግዶሶና። 22 ሄሳፈ ጉየ ካዎ ጋ አይስያ ካልቀ ናአይ ኤልያቄም፥ ፃፈይ ሼብነ ታርከ ፃፈይ አሳፋ ናአይ ዮኣስ ባንታ ማኡዋ ፔዶሶና። ህዝቅያሳኮ ብድ አሶረ ሀላቃይ ግዳባ ኡባ እያዉ ኦድዶሶና።