እሳያሳ ማፃፋ 42

ፆሳ አይለ

1 "ታኒ ካትሳዳ ኦይክዳ ታ አይለይ፥

ታ እያን ኡፋይተይስ፥

ታኒ ዶርዳይስ ሀይሳ።

ታኒ ታ አያና እያ ቦላ ዎስ፤

እ ካዎተታስ ሱረ ፕርዳ ኤሀና።✝42:1 ማቶ 3:17፤ 17:5፤ ማር 1:11፤ ሉቃ 3:22፤ 9:35.

2 እ ዋሰና፤

ባ ቃላ ቁ ኦና

ባ ቃላ ኦገን ስሰና።

3 ድንጨትዳ ማይርያ እ መንና፤

ሊእ ሊእድ ኤፅያ ሙቃዳ እ ቶይሰና፤

አማነተን እ ሱረ ፕርዳ ኤሀና።

4 እ ቢታን ሱረ ፕርዳ ኤሰና ጋካናዉ

አርጋጨና ዎይኮ ጉየ ጌና።

ዩሾይ አባን ተቀትዳ ቢታን ደእያ አሳይ

እያ ህግያ ስአናዉ ናጌስ።

5 ሳሎታ መዳይነ ኤንታ ምጭዳይ፥

ሳኣነ ሳአ ቦላ ደእያባ መዳይ፥

ሳአን ደእያ አሳስ ሸምፖ እምዳይ፥

እያን ሄመትያ ኡባስ ደኦ እምዳይ፥

ጎዳ ፆሳይ ሀይሳዳ ያጌስ።

6 ታኒ ጎዳይ ነና ፅሎተን ፄጋስ፤

ነ ኩሽያ ኦይካዳ ነና ናጋና።

ታኒ ነና አሳስ ጫቆ ኦና፤

ካዎተታስ ፖኦ ኦዳ እማና።✝42:6 እሳ 49:6፤ ሉቃ 2:32፤ ሀዋ 13:47፤ 26:23.

7 ኔኒ ቆቀ አይፈታ ዶያና፤

ማ ኦላን፥ ቃሾ ኬን ደኤይሳታ ከሳና።

8 ታኒ ጎዳ፤ ሄስ ታ ሱን፤

ታ ቦንቹዋ ታኒ ሀራስ እምከ፤

ታ ጋላታ ኤቃታስ እምከ።

9 ሄኮ ታኒ ካሰ ኦድዳባ ኡባይ ፖለትዶሶና፤

ሀእ ታኒ ኦራባ አዋጃይስ፤

ኤንቲ ሀናናፐ ስን ታኒ ህንተዉ ኦዳይስ" ያጌስ።

ፆሳይ ጋላተቶ

10 ጎዳስ ኦራ ማዝሙረ የፅተ፤

ቢታ ጋፃፐ ጋፃ ጋካናዉ እያ ጋላታ የፅተ።

አባ ግዶራ በይሳትነ እያን ደኤይሳት፥

ዩሾይ አባን ተቀትዳ ቢታትነ እያን ደእያ ኡባይ የፆ።

11 መላ ቢታን ደእያ ካታማት፥

ቀዳረ አሳይ ደእያ ጉታት

ባንታ ቃላ ቁ ኦና።

ሰላአ ካታማን ደኤይሳት ኡፋይሳን የፆ፤

ደርያ ሁጰን ባንታ እልልሳ ስሶ።

12 ኤንቲ ቦንቾ ጎዳስ እሞ፤

እያ ጋላታ ዩሾይ አባን ተቀትዳ ቢታታን ኦዶ።

13 ጎዳይ ምኖ አሳዳ ከያና፤

ባ ቃላ ቁ ኦድ ኦላ አዋጃና።

ባ ቃላ ቁ ኦድ ገሬራና፤

ባ ሞርከታ ፆናና።

14 ዳሮ ዎደ ስእ ጋዳ ጋምአስ፤

ስእ ጋዳ ዳንዳአስ።

ሽን ሀእ እቀ ኦይክዳ ማጫሳዳ ታ ዋሳና፤

ቶካ ሸምፓናነ ፔኑቃና።

15 ደረታነ ዙማታ ላላና፤

ኤንታ ቦላ ዶልዳባ ኡባ መልሳና።

ሻፋታ ዩሾይ አባን ተቀትዳ ቢታ ከሳና፤

ኤለ ሃታ መልሳና።

16 ታኒ ቆቀታ ኤንቲ ኤሮና ኦግያራ ካለና፤

ኤንቲ ኤሮና ሆሮጋራ ኤፋና።

ኤንታ ስንን ማ ፖኦ ከሳና፤

ኤንታ ስንን ደእያ ኦግያ ባሳና።

ሀ ኡባ ታኒ ኤንታዉ ኦና፤

ታኒ ኤንታ ኦና አግከ።

17 "ሽን ኤቃ ምስለታን አማነተይሳት፥

ምስለታ፥ ‘ህንተ ኑ ፆሳታ’ ያገይሳት፥

ዬላን ጉየ ስማና።

18 ህንተ ቱለት፥ ስእተ፤

ህንተ ቆቀት፥ ፄልተ፥

ሎይድ በእተ።

19 ታ አይልያፈ ሀር ቆቀይ ኦኔ?

ታ ኪትዳይሳፈ ሀር ቱለይ ኦኔ?

ባና ጎዳስ አድ እምዳ ኡራፐ

ጎዳ አይልያፈ ሀር ቆቀይ ኦኔ?

20 ዳሮባ በአዳሳ፥ ሽን አኬካካ፤

ነ ሀይይ ዶያ፥ ሽን ስአካ" ያጌስ።

21 ጎዳይ ባ ፅሎተ ግሾ፥

ባ ህግያ ግታያናዉነ ቦንቻናዉ ዶስስ።

22 ሽን ሀ አሳይ ቦንቀትስ፤

ደእያባ ኤከትስ።

ኦላ ግዶን ፅሄን ኦይከትስ፥

ቃሾ ኬን ኤንታ ቦላ ጎርደትስ።

ኤንቲ ቦንቀትዶሶና፥ ሽን ኤንታ አሸይ ባዋ፤

ድኤትዶሶና፥ ሽን ኦንካ "ኤንታ ጉየ ዛራ"

ግያ አስ ባዋ።

23 ህንተ ግዶፈ ሀይሳ ስኤይ ኦኔ?

ስንፈ ያና ዎድያባ ቆፐይ ኦኔ?

24 ያይቆባ ድኤተስ፥

እስራኤለ ቦንቄስ አድ እምዳይ ኦኔ?

ናጋራ ኦድ ኑ ቆህዳ፥

እያ ኦግያ ካላናዉነ፥ እያ ህግያ ኪተታናዉ

ኑኒ እፅዳ ጎዳ ግደነዬ?

25 ሄሳ ግሾ፥ እ ኤንታ ቦላ ባ ኤፅያ ሀንቁዋ ጉስስ፤

ኤንታ ዩሹዋ ታማ ላጮን ተቅስ፥

ሽን ኤንቲ ኤርቦኮና፤

እ ኤንታ ፁግስ፥

ሽን ኤንቲ አኬክቦኮና።