ፅሎተ ኩምዳ ካዎተ
1 ሄኮ፥ ካዎይ ፅሎተን ካዎታና፤ ሃረይሳት ሱረተን ሃራና። 2 እስ እስ አስ ባ ሁጰን ጫርኮፈ ጌምያ በሲ፥ ጎተፐ ቆሰትድ አትያ በሲ ግዳና። መላ ቢታን ጎግያ ሃ መላነ ሳሞ ቢታን ግታ ዛላ ኩያ መላ ግዳና። 3 ፄልያ አሳታ አይፈይ ቅልምኤና፤ ስእያ አሳታ ሀይይ ሀይዝድ ስአና። 4 ኤሶትያ አሳ ዎዛናይ ኤራናነ አኬካና። ደዶትያ አሳ እንፃርሳይ ብለታና፤ ጌሽድ ኦደታና። 5 ህዛፐ ጉየ ኤይ አስ ኤራንቾ ጌተተና፤ ኢታ አስ ቦንቸተና። 6 ኤያይ ኤያተ ኦደቴስ፤ እያ ዎዛናይ ናጋራ ቆፔስ። ጎዳ ቦላ ምኖባ ኦደቴስ፤ እያ ቦላ ኢታባ ማቀቴስ፦ ኮሻትዳይሳስ ካ እመና፤ ሳሞትዳይሳ ሃ ድጌስ። 7 ገነ አሳ ቆፋይ ኢታ፤ ማንቆት ሱረባ ኦደትኮካ ኤንታ ይሳናዉ ዎርዶን ኢታ ቆፋ ቆፔስ። 8 ሎኦ አስ ሎኦባ ሀልቼስ፤ ሄ ሎኦ ሀልቹዋን ምንድ ደኤስ።
የሩሳላመ ማጫሳ
9 ህንተኖ ቆፍ ባይና ደእያ ማጫሳዉ፥ ደንድተ፤ ታ ኦደይሳ ስእተ፤ ህንተኖ አማነትድ ደእያ ማጫ ናይቶ፥ ታ ህንተዉ ኦደይሳ ስእተ። 10 ላይ ኩሞና ህንተ አማነትድ ደኤይሳት ኮኮራና፤ ዎይነ እያ ዎድያን ማፀከታ፤ ቶክዳባፐ አይፈ ሺሸከታ። 11 ህንተኖ እንጀትን ደእያ ማጫሳዉ ኮኮርተ። ህንተኖ አማነትድ ደእያ ማጫ ናይቶ ያይተ። ህንተ ማኡዋ ቃርድ ካዮ ማኦ ህንተ ፄሳን ዳንጭተ። 12 ሎኦ ጋደን አይፍያ ዎይነይ ይዳ ግሾ፥ አዛንድ ህንተ ትራ ቆፅተ። 13 አጉንነ ክንቾተይ ታ አሳ ጋድያን ዶልስ። አሳይ ኡፋይትድ ደእዳ ኬታስነ ካታማስ ዬክተ። 14 ካዎ ኬይነ ዳሮ አሳይ ደእያ ካታማይ ባይሳታና፤ ሚፃትነ ግምበ ሻኮት መርናዉ ላለታና፤ ዎራ ሀረት ኡፋይትያ በስነ ዶርሳ ዉደይ ሄመትያ በሲ ግዳና።
15 ሄስ ሀናናይ፥ አያናይ ኑ ቦላ ጉካና ጋካናዉ፥ መላ ቢታይ አራዳና ጋካናዉነ አራዳ ቢታይ ዎራ ግዳና ጋካናሳ። 16 ሄሳፈ ጉየ፥ መላ ቢታን ሱረ ፕርድ፥ አራዳ ቢታን ፅሎተ ዳና። 17 ፅሎተ ሳሮተ ኤሀና፥ ዎፓተነ አማነተ መርናዉ ቢታ ኩማና። 18 ታ አሳይ ሳሮይ ኩምዳ ኬን፥ አማንያ በሳንነ ዎፑ ግዳ ሶን ሸምፕድ ዳና። 19 ሻች ቡክድ ዎራ ይስያኮካ፥ ቃስ ካታማይ ኩም ላለትያኮካ፥ 20 ሻፋታ ጋፃን ህንተ ካ ዘርድ፥ ህንተ መህያስነ ህንተ ሀረታስ ሄን በሲ ደመይሳት ህንተ አንጀታና።