እሳያሳ ማፃፋ 5

ዎይነ ጋደ ሌምሶ

1 ታ ዶስያ አድያ ዎይነ ጋድያባ፥

ሲቆ የ የፃና።

ታኒ ዶስያ አድያስ፥

አራዳ ዙማ ቦላ እያዉ ዎይነ ጋደይ ደኤስ።

2 ቢታ ቦክድ፥ ሹቻ ቆር ከስድ፥

ሎኦ ዎይነ ቶክስ።

ናጎ ሻኮ እያ ግዶን ሻክስ፤

ዎይንያ ጉምእያ በሳ ጊግስስ።

ሄሳፈ ጉየ፥ ሎኦ አይፈ አይፋና ግድ ናግስ፤

ሽን ጫላ አይፈ አይፍስ።

3 "ህንተኖ፥ የሩሳላመን ደኤይሳቶ፥

ህንተኖ ይሁዳ አሳዉ፥

ታፐነ ታ ዎይነ ጋድያ ግዶን

ደእያ ኦዳ አነ ፕርድተ።

4 ታኒ ታ ዎይነ ጋድያስ ኦዳይሳፈ

ሀራ አይ ኦናባይ አትዴ?

ሎኦ አይፈ አይፋና ጋዳ ናጋስ፥

ሽን አይስ ጫላ አይፈ አይፍዴ?

5 ሀእ ታኒ ታ ዎይነ ጋድያ ቦላ

ኦናባ ህንተዉ ኦዳና።

ታኒ እያ ድርሳ ድጋና፤

ዎይነይ ያናዳ ኦና።

ታኒ ግምብያ ላላና፤

ዎይነ ጋደይ የታና።

6 ታኒ ሄ ጋድያ ቁኤ ኦና፤

ዎይነይ ፅንተተና፥ ሀርመተና።

ሄ በሳን ክንቾተይነ አጉን ዶላና፤

እር እያ ቦላ ቡኮና መላ

ታኒ ሻራ ኪታና" ያግስ።

7 ኡባፈ ዎልቃማ ጎዳ

ዎይነ ጋደይ እስራኤለ አሳ።

እ፥ ኡፋይትያ አታክልተ በሳይ ይሁዳ አሳ።

ኤንታ ሱረ ፕርዶሶና ግድ ናግስ፤

ሽን ሱ ጉስዶሶና።

ፅሎተ ኦሶና ግድ ናግስ፤

ሽን ኡንአ ዋሶይ ዳራና መላ ኦዶሶና።

ኢታታ አየ!

8 በሲ ይን፥ ህንተ ፃላላ ቢታ ቦላ ዳና ጋካናዉ፥

ኬ ኬ ቦላ፥ ጋደ ጋደ ቦላ፥

ጉጀይሳቶ ህንተና አየ!

9 ኡባፈ ዎልቃማ ጎዳይ ሀይሳዳ ግድ ጫቅሽን ታ ስአስ።

"ሄ ግታ ኬት ካይሳታና፤

ሄ ሎኦ ኬታን ዳናዉ አስ ያና።

10 ታሙ ዋፃን ቶክዳ ዎይንያፐ፥

እስ ኦቶ ጉምኤ ዎይነ ፃላላ ኤካና።

ሆስፑን ታሙ ክሎ ግራመ ዘርዳ ጋደፐ፥

ታማነ ሆስፑን ክሎ ግራመ ፃላላ ኤካና" ያግስ።

11 ማያ ኡሻ ኮያናዉ

ዎንታ ጉራ ደንደይሳታነ

ዎይነ ኡሻይ ፁጋና ጋካናዉ፥

ያን ቃምስያ አሳ አየ!

12 ኤንታ እማቱዋን ማስንቆይ፥

ዲ፥ ካራቦይ፥ ሱሱልኤይነ

ዎይነ ኡሽ ደኤስ።

ሽን ኤንቲ ጎዳ ኦሱዋ በእቦኮና፤

እያ ኩሸ ኦሱዋ አኬኮኮና።

13 ህዛ ታ አሳይ አኬካ ይዳ ግሾ፥ ድኤታና፤

አይሰይሳት ኮሻን ሀይቃና፤ አሳይ ሳሞን ፁገታና።

14 ዱፎይ ባ ጎምፓ ዳልግስስ፤

ባ ዶና ዛው ባይና ዶይስ።

የሩሳላመን ደእያ ግታ አሳ፥ ዳሮ አሳ፥

ዎጫመይሳታነ ኡፋይተይሳታ ምታና።

15 አስ ቶሸታና፤ አሳ ኮቸ ኡባይ ካዉያና፤ ኦቶርትያ ኡባይ ጉፃና። 16 ሽን ኡባፈ ዎልቃማ ጎዳይ፥ ባ ሱረ ፕርዳን ቁ ቁ ጋና፤ ፆሳ ጌሻተይ እያ ፅሎተን ቆንጫና። 17 ሄ ዎደ ዶርሳት ሄ በሳን ሄመታና፤ ዶርሳ ኡርገት ላለትዳ ኬ በሳታን ማና።

18 ጭሞ ዎዶሮን ናጋራ፥ ጋረ ዎዶሮን ኢታተ ጎቸይሳታ አየ! 19 "አነ ፆሳይ ኤለሶ! ኑኒ በአና መላ ባ ኦሱዋ ኤሶዮ! ኑኒ ኤራና መላ እስራኤለ ጌሻይ ቆፕዳ ቆፋ ፖሎ" ያገይሳታ አየ!

20 ኢታ ሎኦ፥ ሎኡዋ ኢታ፤ ማ ፖኦ፥ ፖኡዋ ማ፤ ጫሙዋ ማልኦ፥ ማልኡዋ ጫሞ ገይሳታ አየ!

21 ባንታና ጭንጫነ ቃራ ገይሳታ አየ!

22 ዎይነ ኡሻን ኤረትዳ አሳነ ማይያ ኡሹ ዋላካናዉ ዎዛን ምኖ ግድዳ አሳ አየ! 23 ቆህዳ ኡራ ፅልሳናዉ ዎፈ ኤክድ፥ ፅሎ አሳ ሱረ ፕርዳ ጌላየይሳታ አየ! 24 ኤንቲ ኡባፈ ዎልቃማ ጎዳ ህግያ እፅዳ ግሾነ እስራኤለ ጌሻ ቃላ ካዳ ግሾ ታማ ላጮይ ካለ ኦይከይሳዳነ ቡረይ ታማን ሜተትድ የይሳዳ ኤንታ ፃጶይ ዎቃና። ኤንታ ጪሻይ ባናዳ ላለትድ ያና። 25 ሄሳ ግሾ፥ ጎዳ ሀንቆይ እያ አሳ ቦላ ኤፅስ፤ እያ ኩሸይ ደንድድ፥ ኤንታ ይስስ። ደረት ቃፅዶሶና፤ ሀይቅዳ አሳ አሀይ ኦገ ቦላ ቡረዳ ሀንስ። ሄ ኡባንካ እያ ሀንቆይ ስምቤና፤ እያ ኩሸይ ሀእካ ደንድዳ በሳን ደኤስ።

26 ጎዳይ ሃሆ ሶን ደእያ ካዎተታስ ማላ ቃን ኤስስ፤ ሳኣ ጋፃን ደእያ አሳ ሱይቅድ ፄግስ፤ ኤንቲ ድርግሸ ፑቱ ጎሶና። 27 ኤንታ ግዶን ዳቡረይነ በተይ ባዋ፤ ኤንታፈ እሶይካ ስከና ዎይኮ ዝንኤና። ፄሳን ዳንጭዳ ሳቀይ ብርሸተና፤ ኤንታ ጫማ ዎዶሮይ ዱፀና። 28 ኤንታ ቶራይ ቃራ፤ ኤንታ ዶንገይካ ዋፀትድ ደኤስ። ኤንታ ፓራታ ቶሆይ ቃራ ሹቻ መላ፤ ኤንታ ፓራ ጋረታ ገርቶይ ጎተ መላ። 29 ኤንቲ ጋሞ መላ ጉሞሶና፤ ዎዳላ ጋሞ መላ ጉዶሶና። ኤንቲ ሳርቡቅሸ ምያባ ኦይክድ፥ ቶክ ኤክድ ቦሶና፤ ኤንታፈ ዎድ ኤከይ ኦንካ ባዋ።

30 ሄ ዎደ ኤንቲ ግታ አባ ጉንዳ እስራኤለ ቦላ ጉማና። እስ አስ ሄ ቢታ ፄልያ ዎደ ምነ ዋየይ በአና፤ ፖኦይ ሻራን ምተታና።