እሳያሳ ማፃፋ 48

ስሞና እፅዳ እስራኤለ

1 "ህንተኖ፥ ያይቆባ ሶ አሳዉ፥

እስራኤለ ሱንን ፄገትዳይሳቶ፥

ይሁዳ ኮቻፈ ይዳይሳቶ፥ ሀይሳ ስእተ።

ህንተ ጎዳ ሱንን ጫቀታ፤

እስራኤለ ፆሳ ፄገታ፤

ሽን ቱማተንነ ፅሎተን ግደና።

2 ህንተ፥ ‘ኑኒ ጌሻ ካታማን ደኦስ፤

እስራኤለ ፆሳን ዘምፖስ፤

እያ ሱንይ ኡባፈ ዎልቃማ ጎዳ’ "

ያግድ ጬቀተታ።

3 ታኒ ስንፈ ሀናናባታ ዳሮ ዎደፐ ካሰ ኦዳስ።

ታ ዶናፐ ኤንቲ ከይን፥

ኤንቲ ኤሶን ፖለታና መላ ኦስ።

4 ኔኒ ኦድን ስኦናይሳ፥

ነ ሞርገይ ብራታ መላ ግደይሳ

ነ ሶምኦይ ናሰ ብራታዳ

ሌቃሞናይሳ ታኒ ኤራይስ።

5 ሄሳ ግሾ፥ ኔኒ፥ "ሀይሳ ታ ኤቃይ ኦስ፤

ታ ማሰትዳ ምስለት፥ ታ ሼሻዳ ኦዳ ምስለት ኦዶሶና" ጎናዳ፥

ታኒ ሄሳ ነዉ በንፐ ዶማዳ ኦዳስ።

ኤንቲ ሀናናፐ ስን ታኒ ኤንታ ነዉ ኤርሳስ።

6 "ታ ካሰ ኦድዳይሳ ነ ስአዳሳ፤

እ ፖለትዳይሳ በአዳሳ፥

ያትን እያ ቱማተ ኤክኪ?

ህዛፐ ነ ኤሮና ኦራባታ ታ ነዉ ኦዳና።

7 ኤንቲ በን መትዳባ ግዶናሽን

ሀእ መትዶሶና።

ኔኒ፥ ‘ታኒ ኤንታ ኤራይስ’ ጎናዳ

ሀይሳፈ ካሰ ኔኒ ኤንታባ ስአባካ።

8 ኔኒ ስአባካ፤ ኤራባካ፤

ነ ሀይይ በንፐካ ዶየትቤና።

ኔኒ አይ ጭምያ አሴኮ ታኒ ኤራይስ፤

ኔኒ የለቶሳፐ ጌላ ጌተታዳ ፄገተይሳ ኤራይስ።

9 ታ ሱን ግሾ፥ ታኒ ታ ሀንቁዋ ዛራና፤

ታ ቦንቹዋ ግሾ ነና ይሶና መላ

ታ ሀንቁዋ ተቃና።

10 ታኒ ነና ፓጫስ፤

ብራዳ ግዶናሽን

ታኒ ነና መቶ ታማን ፓጫስ።

11 ታኒ ታ ግሾ፥ ሀይሳ ኦና፤

ታ ሱንይ ቶሸታና መላ ኮይከ፤

ታኒ ታ ቦንቹዋ ሀራስ እምከ።"

ባብሎነፐ ከስ

12 "ነኖ ያይቆባ፥ ታኒ ፄግዳ እስራኤለ፥

ታኒ ኦድያባ ስአ፤

ታኒ እያ፤ ኮይሮይካ ታና፤ ዉርሰይካ ታና።✝48:12 እሳ 44:6፤ ቆን 1:17፤ 22:13.

13 ታ ኩሸይ ቢታ ባሱዋ መስ፤

ታ ኡሻቻ ኩሸይ ሳሎታ ምጭስ።

ታኒ ኤንታ ፄግያ ዎደ

ኤንቲ እስፈ ኤቆሶና።

14 "ህንተ ኡባይ እስፈ ሺቅድ ስእተ፤

ኤቃታፐ ሀይስ ሀናናይሳ ስንትድ ኦድዳይ ኦኔ?

ጎዳይ ዶርዳይስ እያ ቆፋ ባብሎነ ቦላ ፖላና፤

እያ ቀሰይካ ባብሎነ ቢታ ቦላ ግዳና።

15 ታኒ፥ ታ ሁጰን እያዉ ኦዳስ፤ እያ ፄጋስ፤

ታ እያ ኤሀና፤ እ ኦያባ ኡባይ እያዉ ፖለታና።

16 "ታኮ ሃ ሺቅድ ሀይሳ ስእተ፤

"ታኒ ኮይሮፐ ዶማዳ ጌማን ኦዳብከ፤

ሄስ ሀንዳ ዎደፐ ዶማዳ ታኒ ያን ደአይስ" ያጌስ።

ሀእካ ኡባ ሃርያ ጎዳይነ

እያ አያናይ ታና ኪትዶሶና።

17 ነና ዎዝያ ጎዳይ፥

እስራኤለ ጌሻይ ሀይሳዳ ያጌስ፦

"ነና ማድያባ ታማርሰይ

ነ ባናዉ በሲያ ኦግያ ነ ካለይ፥

ታና ነ ጎዳ፥ ነ ፆሳ።

18 ኔኒ ታ ኪታ ስእዳባ ግድያኮ፥

ነ ሳሮተይ ሻፋ ሃዳ ጎጋናሽን፤

ነ ፅሎተይ አባ ቤታዳ ሀናናሽን።

19 ነ ኮቻይ አባ ሻፈዳ፥

ነ ናይት ታይበቶና ባና መላ ዳራናሽን፤

ኤንታ ሱንይ ታ ስንፈ የና፤ ክቸናሽን" ያጌስ።

20 ባብሎነ ቢታፈ ከይተ፤✝48:20 ቆን 18:4.

ባብሎነፐ ባቃትተ!

ቃላ ቁ ኦድ፥

ኡፋይሳን ሀይሳዳ ያግድ ዋስተ።

ሳኣ ጋፃፐ ጋፃ ጋካናዉ ሀይሳ ኪትተ፤

"ጎዳይ ባ አይልያ ያይቆባ ዎዝስ" ያግድ ኦድተ።

21 እ ኤንታ መላ ቢታራ ካለዳ ዎደ

ሳሞትቦኮና።

ዛላፈ ሃ ኤንታዉ ፑልትስ፤

እ ዛላ ጳልቅን ሃ ቅስ። 22 "ኢታታስ ሳሮይ ባዋ" ያጌስ ጎዳይ።✝48:22 እሳ 57:21.