1 ሽን ታ አይልያ ያይቆባ፥ ታ ዶርዳ እስራኤለ፥

ሀእካ ስአ።

2 ነና መዳ፥ ነ አየ ኡሎን ነና ጊግስዳ

ጎዳይ ሀይሳዳ ያጌስ።

ታ አይልያ ያይቆባ፥

ታኒ ዶርዳ ይሹሩና፥ ያዮፋ።

3 ታኒ ሳሞትዳ ቢታን ሃ ጉሳና፤

መላ ቢታ ቦላ ሻፋ ጎግሳና።

ታ አያና ነ ናይታ ቦላ፥

ታ አንጁዋ ነ ኮቻ ቦላ ጉሳና።

4 ኤንቲ ሃ ዶናን ዶልዳ ማታዳ፥

ሻፋ ላንቀን ደእያ ምዳ አጫና።

5 እሶይ ባና፥ ታኒ ጎዳባ ያጋና፤

ሀንኮይ ባና ያይቆባ ሱንን ፄጋና፤

ሀራይ ባ ኩሽያ ቦላ፥ "ታኒ ጎዳባ" ያግድ ጫዳና፤

እ እስራኤለ እያ ሱንን ፄገታና።

6 ጎዳይ፥ እስራኤለ ካዎይነ እያ ዎዝዳይ፥

ኡባፈ ዎልቃማ ጎዳይ ሀይሳዳ ያጌስ፦

"ኮይሮይ ታና፤ ዉርሰይ ታና፤

ታፐ ሀራ ፆሲ ባዋ።✝

7 ታ መል ኦኔ? ደእኮ አነ አዋጆ፤

አነ ታ ስንን ኤቅድ ኦዶ።

በንፐ ዶምድ፥ ሀንዳባ ኦዶ፤

ስንፈ ሀናናባ ቆንጭሶ።

8 ያዮፍተ፤ ዳጋሞፕተ፤

ታኒ ሀይሳ በንፐ ዶማዳ ኦዳብክና?

ካሰታዳ ኤርሳብክና?

ሄሳስ ህንተ ታዉ ማርካ።

ታፐ አትሽን፥ ሀራ ፆሲ ደኢ?

ሀራ ዛል ባዋ፤

ኦንካ ባይናይሳ ታ ኤራይስ" ያጌስ።

9 ኤቃ ምስለታ መያ ኡባይ ሀዳ፤

እያን ኡፋይትያባት ኤንታ ጎኦኮና።

ኤንታ ማርካት ቆቀታ ኤንታዉ ኤር ባዋ፤

ኤንቲ ዬላታና።

10 ባና ጎኦና ኤቃ

ፆሳ ኦድ ጊግስዳይ ኦኔ?

11 ኤቃ መይ አሰፐ አትሽን፥ ሀራ ግደና፤

እነ እያ ላገት ዬላታና፤

ኡባት እስፈ ሺቅድ ኤቆ፥ ያዮ፥ ዬላቶ።

12 ብራታ ቆፀይስ ኤቃ ኦናዉ

ባ ብራታ ታማን ሴርስድ ማላ እማናዉ

ባ ምኖ ኩሽያን ናርቃን ቆፄስ።

ሄሳ ጊግስሸ ኮሻቴስ፤

እያ ዎልቃይ ዉሬስ፤

ሳሞተስነ ላባኔስ።

13 አናፀይ ዎዶሮን ልክድ

እርሳሰን እያ ቦላ ማላ ዎስ፤

ሊቅስያ ሚሸን ሊቅሴስ።

ሎኦ አሳ ማላን መድ

ባ ኤቃ ኬን ዎስ።

14 እ ሄሳ ኦናዉ ዝጋ ቃንፄስ፤

ዎላ ዎይኮ ፂዳ ዎራ ግዶፈ ዶርድ

ድጫና መላ ኦስ።

ዎይኮ ዝጋ ቶክድ

እራን ድጫና መላ ናጌስ።

15 እያፐ ባጋ ኤናዉ ጎኤቴስ፤

እያፐ ባጋ ኤክድ፥ ኤድ ካዬስ፤

ባጋ ኤድ ካ ካስ።

አትዳይሳ ኤክድ ፆሰ ኦድ እያዉ ጎይኔስ፤

ኤቃ መድ እያ ስንን ጉፋኔስ።

16 እያፐ ባጋ ኤድ ካ ካስ፤

ባጋን አሾ ጫጭድ ካልድ ሜስ።

ቃስ ታማ ካይሸ፥ "ኤሮሾ፥ ታማ ጎፓ፤

ዋን ሆእ" ያጌስ።

17 ቃስ አትዳ ም ማስድ፥

ጎይንያ ፆሳ ምስለ ከሴስ።

ሄ ምስልያ ስንን ጉፋንድ፥ እያዉ ጎይኔስ፤

"ኔኒ ታዉ ፆሰ ግድያ ግሾ፥

ታና አሻ" ያግድ ዎሴስ።

18 ኤንቲ አይኮካ ኤሮኮና፤ አይኮካ አኬኮኮና፤

ኤንቲ በኦና መላ ኤንታ አይፈይ ጎዘትስ፤

አኬኮና መላ ኤንታ ዎዛናይ ጎርደትስ።

19 ኤቃ ኦያ አሳ ግዶፈ ባ ዎዛናን፥

"እያፐ ባጋ ታማን ኤስ፤

እያ ቦንቁዋን ካ ካስ፤

እያን አሾ ጫጫዳ ማስ።

እያፐ አትዳይሳ እፀትዳ ኤቃ ኦዳ መ?

አትዳ ጩገ ምስ ጉፋናዳ ጎይኖ?"

ያግድ ቆፕያ ዎይኮ አኬክያ አስ ባዋ።

20 እ ብዶ ሜስ፤ እያ ጭመትዳ ዎዛናይ

እያ ሀራ ሶ ካለስ።

እ ባ ሸምፑዋ አሻናዉ ዳንዳኤና፤

"ሀይስ ታ ኡሻቻ ኩሸን ደኤይ ዎርዶ ግደና"

ጋናዉ ዳንዳኤና።

21 ጎዳይ ሀይሳዳ ያጌስ፦

"ያይቆባ፥ ሀይሳ አኬካ፤

እስራኤለ፥ ኔኒ ታ አይለ ግድያ ግሾ ሀይሳ ሀሳያ።

ታኒ ነና መስ፤ ኔኒ ታ አይለ፤

ነኖ እስራኤለ፥ ታኒ ነና ዶግከ።

22 ታኒ ነ ናጋራ ፕታዳ ድጋስ፥

ነ ናቁዋ ጫጋናዳ ቁቻስ።

ታኒ ነና ዎዝዳ ግሾ፥

ታኮ ስማ" ያጌስ።

23 "ህንተኖ ሳሎቶ፥ ጎዳይ ሀይሳ ኦዳ ግሾ፥

ኡፋይሳን የፅተ፤ ነኖ ቢታዉ፥ እልላ።

ህንተኖ ደረቶ፥ ዎራዉነ

እያ ግዶን ደእያ ም ኡባይ ማዝሙረ የፅተ።

ጎዳይ ያይቆባ ዎዝስ፤

እስራኤለ ግዶን ቦንቸትስ።

24 ነ አየ ኡሎን ነና መዳይስ፥

ነና ዎዝዳይስ ጎዳይ ሀይሳዳ ያጌስ፦

ኡባባ መዳይ፥ ሳሎታ ታርካ ምጭዳይ፤

ሳኣካ ታርካ ሂፅዳይ፥ ታኒ ጎዳ።

25 ታኒ ዎርዶ ናበታ ትንብትያ ሀዳ ኦስ፤

ማሮታ ካዮዋ ኤያተ ከሳስ።

ታኒ ጭንጫታ ጭንጫተ ሽራ የጋስ፤

ኤንታ ኤራ ኤያ ኦስ።

26 ታኒ ታ አይለታ ቃላ ምንና፤

ታ ናበታ ትንብትያ ፖላና።

ታኒ የሩሳላመ ካታማ፥

‘ኔኒ አሳይ ደእያ በሲ ግዳና’ ያጋስ፤

ይሁዳ ካታማታ፥

‘ህንተ ስሚድ ኬፀታና፤ ህንተ ግምበይ ኦራፃና’ ያጋስ።

27 ታኒ ጎግያ ሃታ መልሳና ግሾ

ጪሞ ሃ፥ ‘ነ መላ’ ያጋና።

28 ቅሮሳኮ፥ ‘ኔኒ ታ አሳ ሄመይሳ፤

ኔኒ ታ ሀልቹዋ ፖለይሳ’ ያጋና።

እ፥ የሩሳላመ ካታማ፥ ‘ኔኒ ስማዳ ኬፀታና’፤

ፆሳ ኬ፥ ‘ነ ባሶይ የገታና’ " ያጋና።