1 አሞፀ ናአይ እሳያስ ይሁዳባነ የሩሳላመባ በእዳይስ ሀይሳ።

2 ዉርሰ ጋላሳታን ጎዳ ኬይ ኬፀትዳ ዙማይ፥ ዙማታ ኡባፈ ቁ ግድ በንታና፤ ዙማ ኡባፈ ቦላራ ቁ ጋና። ካዎተት ኡባይ እያኮ ባና። 3 ህገይ ፅዮነፐ፥ ጎዳ ቃላይ የሩሳላመፐ ከይያ ግሾ፥ ዳሮ አሳይ ይድ፥ "አነ ሃይተ! ጎዳ ዙማኮ፥ ያይቆባ ፆሳ ኬኮ ከዮስ። ኑኒ እያ ኦግያን ባና መላ እ ኑና ባ ኦግያ ታማርሳና" ያጋና። 4 እ ካዎተታ ግዶን ፕርዳና፤ ዳሮ አሳታ ፓላማ ሻካና። ኤንቲ ባንታ ማሻ ማራሻ፥ ባንታ ቶራ ባጫ ከሳና። ካዎተት ካዎተታ ቦላ ማሻ ደንኮና፤ ህዛፐ ኤንቲ ኦላ ትምርተ ታማሮኮና።✝

5 ህንተኖ፥ ያይቆባ ኮቻቶ፥ ሃይተ! አነ ጎዳ ፖኡዋን ሄመቶስ።

6 ጎዳዉ፥ ነ አሳ፥ ያይቆባ ኮቻታ አጋዳሳ። ኤንቲ ዶሎሀ ባጋ አሳ ብታንነ ፍልስፄመ አሳ ሙሩኑዋን ኩምዶሶና፤ አላጋ አሳራ እስፍዶሶና። 7 ኤንታ ቢታን ብርነ ዎርቀይ ኩምስ፤ ኤንታ ሚሽያስ ዛው ባዋ። ኤንታ ቢታን ፓር ኩምስ፤ ኤንታ ፓራ ጋርያስ ዛው ባዋ። 8 ኤንታ ቢታን ኤቅ ኩምዶሶና፤ ኤንቲ ባንታ ኩሸ ኦሱዋ ጎይኖሶና።

9 ሄሳ ግሾ፥ አሳ ኡባይ ቶሸታናነ ካዉያና። ኤንታ ናጋራ አቶ ጎፓ።

10 ጎዳ ዳጋንዋፈነ ያሽያ ቦንቹዋፈ አታናዉ ዛላኮ ቢተ፤ ቢታ ግዶን ቆሰትተ! 11 ኦቶራንቾት ካዉያና፤ ጬቀተይሳት ጉፃና፤ ሄ ጋላስ ጎዳ ፃላል ቁ ቁ ጋና። 12 ኡባፈ ዎልቃማ ጎዳይ፥ እስ ጋላስ ኦቶራንቾታ፥ ጬቀተይሳታነ ባንታና ቁ ቁ ኦይሳታ ካዉሻና። 13 አዱሳ ልባኖሰ ዝጋታነ ባሳና ዎላ ኡባ ይሳና፤ 14 ቃ ደረታነ ዙማታ ደምባያና። 15 ካታማ ናግያ አዱሳ ሻኮታነ ምኖ ድርሳ ግምበታ ዝቅ ኦና። 16 ጎዳይ ግታነ ሎኦ ማርካበታ ሃን ምትሳና። 17 አሳ ኦቶሮይ ዝቅ ጋና፤ እያ ጬቀተይ ያና። ሄ ጋላስ ጎዳ ፃላል ቁ ቁ ጋና። 18 ኤቃ ኡባይ ፖሎ ያና።

19 ጎዳይ ቢታ ቃናዉ ደንድያ ዎደ እያ ዳጋንዋፈነ እያ ያሽያ ቦንቹዋፈ አታናዉ አሳይ ሹቻ ጎንጎሎንነ ቢታ ኦላን ቆሰታና። 20 ሄ ጋላሳይ አሳይ ጎይናናዉ መዳ ባንታ ብራ ምስለታነ ባንታ ዎርቃ ምስለታ ግሮታስነ ሽርሽቆታስ የጋና። 21 ጎዳይ ቢታ ቃናዉ ደንድያ ዎደ እያ ዳጋንዋፈነ እያ ያሽያ ቦንቹዋፈ አታናዉ ኤንቲ ጎንጎሎ ግዶነ ሹቻ ዛኦ ግዶ ባቃታና።

22 ህዛ ሸምፖይ ሲን ደእያ፥ ሀ ሀይቅያ አሳን አማነቶፍተ። አስ አይ ማዲ?