1 ነኖ ፅዮነ፥ ባርካ፤ ባርካ፥
ምኖተ አፍላዳ ማአ።
ነኖ ጌሻ ካታመ፥ የሩሳላመ፥
ነ ቦንቾ ማኡዋ ማአ።52:1 ቆን 21:2፥ 27.
ህዛፐ ጉየ ቃፃረቶናይነ
ቱን ነ ግዶ ገለና።
2 ነኖ፥ ድኤትዳ የሩሳላመ፥ ነ ባና ቆቆፋ፤
ደንዳዳ ነ አራታ ቦላ ኡታ።
ነኖ ፅዮነ አሳዉ፥
ነ ቆን ቃሸትዳ ሳንላታ ብርሻ።
3 ኡባ ሃርያ ጎዳይ ሀይሳዳ ያጌስ፦
"ህንተ ካሰ ጋተይ ባይና ባይዘትደታ፤
ሀእ ቃስ ሚሸ እሞና ጮ ዎዘታና።
4 ጎዳይ ሀይሳዳ ያጌስ፦
ታ አሳይ ኮይሮ በተ አስ ግድድ ግብፀ ብስ፤
ጉየፐ አሶረት ታ አሳ ጮ ኡንኤዶሶና።
5 ፆሳይ ሀይሳዳ ያግድ ኦዴስ፦
ታ አሳይ ጋተይ ባይና ጮ ድኤትድ ብን፥
ታዉ ሀይሳን አይበ ደኤይ?
ኤንታ ሃረይሳት ቶቾሶና፤
ታ ሱንይ ኡባ ዎደ ጫየቴስ።52:5 ሮመ 2:24.
6 ሄሳ ግሾ፥ ታ አሳይ ታ ሱን ኤራና፤
ሄ ጋላስ ሀይሳ ኦደይ ታና ግደይሳ ኤንቲ ኤራና፤
ኤ፥ እ ታና" ያጌስ ኡባ ሃርያ ጎዳይ።
7 ሎኦ ምሽራቾ ኤህያ፥
ሳሮተ አዋጅያ፥ አቶተ ኦድያ፥
ፅዮነኮ፥ "ነ ፆሳይ ካዎትስ" ያግሸ
ደርያ ቦላራ ያ ቶሆት ዋን ሎኦና።
8 ነ ካታማ ናገይሳት ባንታ ቃላ ቁ ኦድ፥
ኡፋይሳን እስፈ የፆሶና።
ጎዳይ ፅዮነ ስምያ ዎደ
ኤንቲ ባንታ አይፈን በአና።
9 ህንተኖ የሩሳላመን ላለትዳ በሳቶ፥
እስፈ ኡፋይሳን የፅተ፤
ጎዳይ ባ አሳ ምንስ፤
የሩሳላመ ዎዝስ።
10 ጎዳይ ባ ጌሻ ቀስያ
ካዎተታ ኡባ ስንን ቆንጭስስ።
ቢታ ጋፃ ጋካናዉ ደእያ
አሳ ኡባይ ኑ ፆሳ አቶተ በአና።
11 ህንተኖ ጎዳ ሚሽያ ቶከይሳቶ፥ ሻከትተ፥
ሻከትተ፥ ያፐ ከይተ።
ቱናባ ቦቾፍተ፤ እያ ግዶፈ ከይተ፤
ህንተና ጌሽተ።
12 ሽን ህንተ ከይሸ ኤሶን ከየከታ፤
ዎይኮ ጎደትድ ቤከታ።
ጎዳይ ህንተፈ ስን አድ ካለና፤
እስራኤለ ፆሳይ ጉየራ ግድድ ህንተና ናጋና።
ዋየ ኤክያ አይለ
13 "ሄኮ፥ ታ አይለይ አኬካን ኦና፤
እ ቦንቸትድ፥ ቁ ቁ ጋና፤ ዳሮ ግታታና።
14 እያ ሶምኦይ አሳ ኡባፈ፥
እያ መይ አሳ ናይታፐ አድ ቆሄትስ፤
እያ በእድ ዳሮ አሳይ ዳጋምዶሶና።
15 ሽን ሀእ ዳሮ ካዎተት ኡባይ
እያባን ማላለታና፤
እያ ጋሶን፥ ዳሮ ካዎት ባንታ ዶና ኦይካና።
ኤንቲ ባንታዉ ኦደትቦናባ በአና፤
ስእቦናባ አኬካና" ያጌስ።