1 ጉ ጋላሳፐ ጉየ፥ የሱሲ ቅፍርናሆማ ስሚድ፥ ሶን ደኤስ ግያ ኦዳይ ስኤትስ። 2 አሳ ኬይ ኤኮና እፅን፥ ሀር አቶሽን ካረይካ ፁማና ጋካናዉ ዳሮ አሳይ ሺቅን፥ የሱሲ ቃላ ታማርስስ። 3 ኦይዱ አሳት እስ ጉንዳ ኡራ ቶክድ እያኮ ኤህዶሶና። 4 አሳይ ዳርዳ ግሾ፥ ኡራ የሱሳኮ ሺሻናዉ ኤንታዉ ዳንዳኤቶና እፅን፥ የሱሲ ደእያ ግናራ ኬ ቃርድ፥ ካራ ቃዉፅድ ኡራ እ ዝንእዳ አልጋራ ዱገ የድድ የሱሳ ስንን ዎስዶሶና። 5 የሱሲ ኤንታ አማኑዋ በእድ፥ ሄ ጉንዳ ኡራ፥ "ታ ናአዉ፥ ነ ናጋራይ አቶ ጌተትስ" ያግስ።

6 ህገ አስታማረታፐ ሄ በሳን ኡትዳ እሶት እሶት ባንታ ዎዛናን፥ 7 "ላ ሀ ኡራይ ሀይሳ መላ ኢታባ ፆሳ ቦላ አይስ ኦዴቲ? ፆሳ ፃላላፐ አትሽን፥ ሀር ኦን ናጋራ አቶ ጋናዉ ዳንዳኢ?" ግድ ቆፕዶሶና።

8 ኤንቲ ባንታ ዎዛናን ሄሳዳ ቆፕዳይሳ የሱሲ ኤለስድ ባ አያናን ኤርድ፥ ኤንታኮ፥ "ህንተ ህንተ ዎዛናን አይስ ሄሳዳ ቆፔቲ? 9 ጉንዳ ኡራ፥ ‘ነ ናጋራይ አቶ ጌተትስ’ ገይስ ማተዬ? ዎይኮ፥ ‘ደንዳ ኤቃዳ ነ አልጋ ቶካዳ ባ’ ገይስ ማቴ? 10 ሽን ታዉ፥ አሳ ናኣስ፥ ሳአ ቦላ ናጋራ አቶ ጋናዉ ማት ደኤይሳ ህንተ ኤራና መላ" ግድ ሄ ጉንዳ ኡራኮ፥ 11 "ነና ጋይስ፥ ደንዳ ኤቃዳ ነ አልጋ ቶካዳ ነ ሶ ባ" ያግስ።

12 ኡራይ ኤለስ ደንድ ኤቅድ፥ ባ አልጋ ቶክድ አሳ ኡባይ በእሽን ብስ። አሳ ኡባይ ማላለትድ፥ "ኑኒ ሀይሳ መላ ማላልስያባ በእ ኤሮኮ" ያግድ ፆሳ ጋላትዶሶና።

13 የሱሲ ቃስ ጋልላ አባ ዶና ስም ብድ፥ ባኮ ይዳ አሳ ኡባ ታማርስስ። 14 ያራ አሸ፥ እልፍዮሳ ናኣ ሌወ ጌተተይስ ቃራፃ ቃንፅስያ በሳን ኡትዳይሳ በእድ፥ "ታና ካላ" ያግስ። ሌወይ ደንድ ኤቅድ እያ ካልስ።

15 የሱሲ ካ ማናዉ ሌወ ሶን ኡትስ። እያ ካልያ አሳይ ዳሮ ግድያ ግሾ፥ ቃራፃ ቃንፅስያ ዳሮ አሳይነ ናጋራንቾት እያራነ እያ ታማረታራ እስፈ ኡትዶሶና። 16 ህገ አስታማረ ግድዳ እስ እስ ፋርሳወት የሱሲ ናጋራንቾታራነ ቃራፃ ቃንፅሰይሳታራ ካ ምሽን በእድ፥ "እ አይስ ናጋራንቾታራነ ቃራፃ ቃንፅሰይሳታራ ካ ሚ?" ያግድ፥ እያ ታማረታ ኦይችዶሶና።

17 የሱሲ ኤንቲ ገይሳ ስእድ፥ "ሀርጋንቾታፐ አትሽን፥ ፓፃታስ አክመ ኮሸና። ታኒ ናጋራንቾታ ፄጋናዉ ያስፐ አትሽን፥ ፅሎታ ፄጋናዉ ያቢከ" ያግድ ኤንታዉ ዛርስ።

18 ፃማቅያ ዮሃንሳ ታማረትነ ፋርሳወት ፆሞሶና። እስ እስ አሳት የሱሳኮ ይድ፥ "ዮሃንሳ ታማረትነ ፋርሳወታ ታማረት ፆሞሶና፥ ሽን ነ ታማረት አይስ ፆሞኮና?" ያግዶሶና።

19 የሱሲ ኤንታኮ፥ "ያጋኑዋ ይዳ አሳት ማችዉ ኤከይስ ኤንታራ ደእሽን፥ ፆማናዉ ዳንዳኦና? ማችዉ ኤከይስ ኤንታራ ደእሽን፥ ፆማናዉ ዳንዳኦኮና። 20 ሽን ማችዉ ኤከይስ ኤንታ ማታፐ ኤከታና ዎደይ ያና፥ ኤንቲ ሄ ዎደ ፆማና።

21 "ጋልአ ማኦ ቦላ ኦራ ጫርቀ ዎድ ስክያ አስ ባዋ። ዎድ ስክኮ፥ ኦራይ ጬጋ ማኡዋ ዳኬስ፤ ዳከይካ ካሰይሳፈ ዳሬስ። 22 ቃስ ማልአንቶ ዎይነ ጬጋ ኦጎሮን ቆልያ አስ ባዋ። ሽን ቆልኮ፥ ሄ ዎይነይ ኦጎሩዋ ዳኬስ፥ ባዉካ ጉኬስ፥ ኦጎሮይካ ኢቴስ። ሽን ማልአንቶ ዎይነይ ኦራ ኦጎሮን ቆለቴስ" ያግስ።

23 የሱሲ እስ ሳምባታ ጋላስ ባንጋ ጋደ ግዶራ አሽን፥ እያ ታማረት እያራ ብሸ ባንጋ ትያ ሽርክድ ሞሶና።✝ 24 ፋርሳወት የሱሳኮ፥ "ሄኮ፥ ነ ታማረት ሳምባታ ጋላስ ዎጋ ግዶናባ አይስ ኦና?" ያግዶሶና።

25 የሱሲ ኤንታኮ፥ "ዳዊቲ ኮሻትድ፥ ምያባ ኮይዳ ዎደ፥ ባራ ደኤይሳታራ ኦዳይሳ ናባብበከቲ?✝ 26 አብያታር ካህነ ሀላቃ ግድድ ደእያ ዎደ ዳዊቲ ፆሳ ኬ ገልድ፥ ካህነታ ፃላል ማናፐ አትሽን፥ ኦንካ ማናዉ ዎጋ ግዶናይሳ ጎዳ ስንን ዎዳ ዳቡዋ ምስ፥ ባራ ደኤይስታስካ እሚስ" ያግስ።✝

27 ቃስካ የሱሲ ኤንታኮ፥ "ሳምባት አሳ ናአ ጎአስ መትስፐ አትሽን፥ አስ ሳምባታስ መትቤና። 28 ሄሳ ግሾ፥ አሳ ናአይ፥ ሀር አቶሽን ሳምባታስካ ጎዳ" ያግስ።