1 የሱሲ እያርኮ ገልድ አስ። 2 ያን ዛክዮሳ ጌተትያ ቃራፃ ቃንፅሰይሳታ ሀላቃይ ደኤስ። እ ዳሮ ዱረ። 3 እ የሱሲ ኦነኮ በአናዉ ኮይስ። እ ቃን ግድያ ግሾ አሳ ዳሮተፈ ደንዶይሳን የሱሳ በአናዉ ዳንዳእቤና። 4 የሱሳ በአናዉ ኮይድ እ ብያ ኦግያስ ስን ዎፅ ብድ እስ ቦባ ም ቦላ ከይስ።

5 የሱሲ ሄ በሳ ጋክሸ ቁ ግድ በእድ፥ "ዛክዮሳ፥ ሀች ታ ነ ሶን ፔአናዉ በሲያ ግሾ ኤለ ዎ" ያግስ። 6 እ ኤለስ ዎድ ኡፋይሳን የሱሳ ሞክስ።

7 ሄ በሳን ደእያ አሳ ኡባይ ሄሳ በእድ፥ "ናጋራንቹዋ ሶ ገልድ ሞከታንዉ ሀኔስ" ያግድ ዙዙምዶሶና። 8 ግዶሽን፥ ዛክዮስ ኤቅድ ጎዳኮ፥ "ጎዳዉ፥ ሄኮ ታዉ ደእያ ሻሎ ኡባፈ ባጋ ማንቆታስ እማና። አሳፐ አይባካ ዎርዶን ባለዳ ኤክዳባ ግድኮ ኦይዱ ኩሸ ዛራና" ያግስ።

9 የሱሲ ቃስ፥ "ሀ ኡራይ አብራሃመ ናአ ግድዳ ግሾ ሀች አቶተይ ሀ ሶ ይስ። 10 አሳ ናአይ ይዳይ ይዳይሳ ኮያናሳነ አሻናሳ" ያግስ።✝

11 አሳይ ሄሳ ስእያ ዎደ፥ የሱሲ የሩሳላመ ማታትዳ ግሾነ ፆሳ ካዎተይ ሀእ ማታራ ቆንጫና ዳንዳ ግሾ ኤንታዉ ሌምሶ ኦድስ።✝ 12 ሄሳ ግሾ፥ የሱሲ፥ "እስ ግታ አስ ደኤይስ ባዉ ካዎተ ኤክድ ያናዉ ሀራ ቢታ ብስ። 13 እያዉ ኦያ አይለታፐ ታማታ ፄግድ እሱዋስ እሱዋስ ታሙ ምናነ* እምድ ‘ታ ስማዳ ያና ጋካናዉ ሀ ሚሽያራ ዛልእተ’ ያግስ።

14 "ሄ ቢታ አሳይ እያ እፅያ ግሾ፥ ሀ ኡራይ ኑ ቦላ ካዎታና መላ ኑ ኮዮኮ ያግድ አሰ እያ ጉየራ ኪትዶሶና።

15 "ግዶሽን፥ ሄ ኡራይ ካዎ ግድድ ባ ቢታ ስምስ። ሄ ታሙ አይለት እ እምዳ ሚሽያን አይ መላ ዛልእድ ዎስዳኮ ኤራናዉ ኮይድ ኤንታና ፄግስስ።

16 "ኮይሮይስ ይድ፥ ‘ጎዳዉ፥ ነ ታዉ እምዳ ሚሸይ ሀራ ታማ ዎስ’ ያግስ።

17 "እያ ጎዳይ፥ ‘ነኖ አማነትዳ አይልያዉ ሎኦ ኦዳሳ። ኔኒ ጉባን አማነትዳ ግሾ ነዉ ታሙ ካታማታ ቦላ ማታ እማስ’ ያግስ።

18 "ናምአንይ ይድ፥ ‘ጎዳዉ፥ ነ ታዉ እምዳ ሚሸይ ሀራ እቻሻ ዎስ’ ያግስ።

19 "ጎዳይ እያኮ፥ ‘ነዉካ ቃስ እቻሹ ካታማታ ቦላ ማታ እማስ’ ያግስ።

20 "ሄኮ ሄንይ ይድ፥ ‘ጎዳዉ፥ ታ ጩርቃን ፃፃዳ ናግዳ ነ ሚሽያ ሀናሹ። 21 አይስ ጊኮ፥ ኔኒ ነባ ግዶናባ ኤከይሳነ ነ ዘሮናባ ጫክያ ኢታ አስ ግድያ ግሾ ነዉ ያያስ’ ያግስ።

22 "እያ ጎዳይ ዛሪድ፥ ‘ነኖ ኢታ አይልያዉ ነ ዶና ታ ነና ፕርዳና። ታ ዎናባ ኤከይሳነ ዘሮናባ ጫክያ አስ ግደይሳ ነ ኤርኮ፥ 23 ታ ያዳ ታ ሚሽያ ዎራ ኤካና መላ ዛልእያ አሳስ አይስ እማብኪ?’

24 "እያ ጎዳይ ሄ በሳን ኤቅዳይሳታኮ፥ ‘እያራ ደእያ ሚሽያ ኤክድ ታማ ዎስዳይሳስ እምተ’ ያግስ።

25 "ኤንቲ፥ ‘ጎዳዉ፥ እያዉ ካሰካ ታሙ ምናነይ ደኤስ’ ያግዶሶና።

26 "ጎዳይ፥ ታ ህንተዉ ኦዳይስ፤ ‘ደእያ ኡባስ ሀር ጉዠታና፥ ሽን ባይናይሳፈ ሀራይ አቶ እያዉ ደእያራካ ኤከታና።✝ 27 ግዶሽን፥ ታ ኤንታ ቦላ ካዎቶና መላ ኮይዳይሳታ ሄ ታ ሞርከታ ሀ ታ ስን ኤህድ ጎራዕተ’ ግስ" ያግስ።✝

28 የሱሲ ሄሳ ኦድዳፐ ጉየ፥ ኤንታፈ ስን ሄመትድ የሩሳላመ ብስ። 29 ሻማሆ ዙማ* ቦላ ደእያ ቤተፋገነ ብታነ ማትዳ ዎደ ባ ታማረታፐ ናምአታ ኪትድ፥ 30 "ህንተ ስንን ደእያ ጉታ ቢተ፥ ህንተ ያ ጋክያ ዎደ ኦንካ ቶጎና ቃሸትድ ደእያ ሀረ ማር ደማና። እያ ብልድ ሃ ኤክ ዪተ። 31 ኦንካ፥ ‘አይስ ብሌቲ?’ ግድ ኦይችኮ፥ ‘ጎዳይ እያ ኮዬስ’ ያግተ" ያግስ።

32 ኪተትዳይሳት ብድ እ ግዳይሳዳ ሀንን በእዶሶና። 33 ኤንቲ ሀረ ማራ ብልሽን ጎዳት በእድ፥ "ሀረ ማራ አይስ ብሌቲ?" ያግዶሶና።

34 ኤንቲ ዛሪድ፥ "ጎዳይ እያ ኮዬስ" ያግዶሶና።

35 ያፐ ሀረ ማራ የሱሳኮ ኤህዶሶና። ባንታ ማኡዋ ሀረ ማራ ዞኮን የግድ የሱሳ ሀረ ማራ ቦላ ኡትስዶሶና። 36 አሳይካ እ ብያ ኦግያ ቦላ ባንታ ማኡዋ ሂፅዶሶና።

37 ሻማሆ ዙማ ዱገ ዎስያ ኦግያኮ ማትያ ዎደ፥ ታይቦን ኬህ ዳሮ አሳይ ኤንቲ በእዳ ማላልስያባን ኡፋይትድ ባንታ ቃላ ቁ ኦድ፥

38 "ጎዳ ሱንን ያ ካዎይ አንጀትዳይሳ

ሳሉዋን ሳሮይ

ኡባፈ ቃ ሳሉዋን ቦንቾይ

ፆሳስ ግዶ"

ያግድ ፆሳ ጋላትዶሶና።✝

39 አሳ ግዶፈ እስ እስ ፋርሳወት የሱሳኮ፥ "አስታማርያዉ፥ ነ ታማረታ ሀይዝተ ጋዳ ሀንቀታ" ያግዶሶና።

40 እ ኤንታኮ፥ "ኤንቲ ስእ ጊኮ ሹቻት ዋሳና" ያግስ።

41 የሱሲ የሩሳላመ ማትሸ ካታማ በእድ እያዉ ዬክስ። 42 "ነዉ ሳሮ ግዳናይሳ ሀች ነ ኤርዳባ ግድያኮሽን፥ ሀእ ነ አይፍያፐ ጌምስ። 43 ነ ሞርከት ነ ዩሹዋ ድርድ ዱማ ዱማ ኦግያራ ነና ተቅድ ኡንኤያ ዎደይ ያና። 44 ነናነ ነ ድርሳ ጋርሳን ደእያ ነ ናይታ ይሳና። እስ እስ ሹቹ ደንድ ላላና፥ አይስ ጊኮ ፆሳይ ነና አሻናዉ ያ ዎድያ ኤራባካ" ያግድ እዉ ዬክስ።

45 ሄሳፈ ጉየ፥ የሱሲ ፆሳ ኬ ገልድ ዛልኤይሳታ ያፐ ጎድስ። 46 ቃስ፥ " ‘ታ ኬይ ፆሳ ዎስያ ኬ ግዳና’ ግድ ፃፈትስ፥ ሽን ህንተ ታ ኬ ፓንጋታ ጎንጎሎ ኦደታ" ያግስ።✝

47 ጋላስ ጋላስ ፆሳ ኬን ታማርሴስ። ካህነታ ሀላቃት፥ ህገ አስታማረትነ ደርያ ጭማት እያ ዎናዉ ኦገ ኮዮሶና።✝ 48 ግዶሽን፥ አሳ ኡባይ እያ ትምርትያ ባንታ ዎዛና የግድ ስእያ ግሾ፥ ኤንታዉ ኦናባይ ይስ።