1 የሱሲ ዛሪድ ጋልላ አባ ማታን ታማርሴስ። ዳሮ አሳይ እያ ማታን ዩሹዋን ሺቅን፥ አባን ደእያ ዎጎሉዋ ግዶ ገልድ ኡትስ፥ አሳ ኡባይ አባ ማታን ደኤስ።✝ 2 እ ኤንታ ዳሮባ ሌምሶን ታማርስስ። ታማርስሸ ሀይሳዳ ያግስ፦

3 "ስእተ! እስ ኡራይ ዘረ ዘራናዉ ከይስ። 4 እ ዘርሽን፥ እስ እስ ዘረይ ኦገ ጋፃን ዎስ፤ ካፎት ይድ ምዶሶና። 5 እስ እስ ዘረይ ጋርሳን ሻሎይ ደእያ ቢታ ቦላ ዎስ። ዳሮ ቢት ባይና ግሾ፥ ሄ ዘረይ ኤለስድ ዶልስ። 6 ሽን አው ከይዳ ዎደ ሹልስ። ሎይድ ፃጶ የድቦና ግሾ፥ ኤለስ መልስ። 7 እስ እስ ዘረይ አጉን ግዶን ዎስ። ዶልዳይሳ አጉንይ ድጭድ ጩልዳ ግሾ አይፈ አይፎና አትስ። 8 እስ እስ ዘረይ አራዳ ቢታን ዎድ ዶልስ። ድጭድ እሶይ ሀስታማ፥ እሶይ ኡሱፑን ታማ እሶይ ፄታ አይፍስ" ያግስ። 9 "ስእያ ሀይ ደእያ ኦንካ ስኦ" ያግስ።

10 የሱሲ ኦድዳይሳ ስእዳ እስ እስ አሳትነ ታማነ ናምኡ ታማረት የሱሲ ባርካ ደእሽን፥ እያኮ ሺቅድ ሄ ሌምሱዋ ብርሸ ኦይችዶሶና። 11 የሱሲ ኤንታኮ ሀይሳዳ ያግስ፦ "ህንተዉ ፆሳ ካዎተ ፁራ ኤሮይ እመትስ። ሽን ሀራታስ ካዎተፈ ካረን ደኤይሳታስ ኡባባይ ሌምሶን ኦደቴስ። 12 ጋሶይካ፥

" ‘ኤንቲ ፄሎሶና፥ ሽን ደሞኮና።

ስኦሶና፥ ሽን አኬኮኮና።

ኤንቲ ደምያኮነ አኬክያኮ፥

ፆሳኮ ስማና

እካ ኤንታ ማራናሽን’ "✝

ያግስ። 13 የሱሲ ኤንታኮ፥ "ሀ ሌምሶይ ህንተዉ ገለኔ? ያትን፥ ሌምሶ ኡባ ህንተ ዋት አኬካኔ? 14 ዘረይስ ፆሳ ቃላ ዘሬስ። 15 ቃላይ ዘረትያ ዎደ ኦገ ጋፃን ዎዳይሳት ቃላ ስእዳይሳታ። ሽን ፃላሄይ ኤለስድ፥ ይድ ኤንታ ዎዛናን ዘረትዳ ቃላ ማፅ ድጌስ። 16 ሄሳዳካ፥ ጋርሳን ሻሎይ ደእያ ቢታን ዘረትዳይስ ቃላ ስእድ፥ ኤለስድ ኡፋይሳን ኤከይሳ። 17 ሽን እያዉ ምኖ ፃጶይ ባይና ግሾ ሀእሳፈ አትሽን፥ ጋምኦኮና። ጉ ዎደፐ ጉየ ቃላ ጋሶን ዋየይ ዎይኮ ጎድ ጋክያ ዎደ ኤለስድ በቶሶና። 18 አጉን ግዶን ዘረትዳይስ ቃላ ስኤይሳታ። 19 ሽን ሀ ሳአ ደኡዋስ ህርጎይ፥ ዱረተ ዶሶይነ ሀራባ አሞተይስ እያ ዎዛናን ገልድ ቃላ ጩልያ ግሾ አይፈ አይፎና አትስ። 20 ሽን አራዳ ቢታን ዘረትዳይሳት ቃላ ስእድ ኤከይሳታ። ኤንቲ እሶይ ሀስታማ፥ እሶይ ኡሱፑን ታማ እሶይ ፄታ አይፍስ" ያግስ።

21 የሱሲ ጉጅድ፥ "ፆምፐ ኤክድ፥ ዳቾፈ ዎይኮ አልጋፈ ጋርሳን ዎያ አስ ደኢ? ቃ በሳን ዎነዬ?✝ 22 ህዛ፥ ቆሰትዳባይ ኡባይ ቆንጨ ከያና፤ ጌምዳባይ ኡባይ ኤረቶና አተና።✝ 23 ስእያ ሀይ ደእያ ኦንካ ስኦ" ያግስ።

24 ቃስ ኤንታኮ፥ "ህንተ ስእያባ አኬክድ ስእተ! ፆሳ ቃላ ህንተ ስኤይሳ መላ እ ህንተዉ አኬካ እማና። ኡባካ ህንተዉ ዳርስድ እማና። 25 እስባይ ደእያ ኡራስ ጉጅ እመታና፥ ባይናይሳፈ ሀር አቶሽን፥ እያዉ ደእያ ሄ ጉያካ ኤከታና" ያግስ።✝

26 የሱሲ ዛሪድ፥ "ፆሳ ካዎተይ ባ ጋደን ዘረ ዘርያ አሳ መላ። 27 ሄ ኡራይ ቃማ ስኬስ፤ ዎንታ ደንዴስ። እ ባ ሁጰን ዋንያኮ ኤሮና ደእሽን ሄ ዘረይ ዶሌስነ ድጬስ። 28 ቢታይ ካ ባርካ እሜስ። ኮይሮ ዶልድ ድጬስ፥ ካልድ አይፋናዉ ጋምቡፄስ፥ ዉርሰን ኩመ አይፈ አይፌስ። 29 ሽን ካይ ጋክያ ዎደ ኡራይ ኤለስድ ባጫራ ገል አጌስ" ያግስ።✝

30 የሱሲ፥ "ኑኒ ፆሳ ካዎተ አይ ዳኔስ ጋኔ? ዎይኮ አይብራ ሌምሳኔ? 31 ፆሳ ካዎተይ አይፈ ጉ ም ዳኔስ። ሄ ም አይፍያ ዘርያ ዎደ ሳአን ደእያ ም አይፈ ኡባፈ ጉፄስ። 32 ዘርን ዶልድ አታክልተ ኡባፈ ግታቴስ፤ ዳሮ ዳሽ ዳዬስ። ካፎት እያ ታሽያ ቦላ ኬፅድ ኡታና ጋካናዉ ዳዬስ" ያግስ።

33 የሱሲ ሀይሳ መላ ዳሮ ሌምሶን አሳይ አኬካናዉ ዳንዳኤይሳ መላ ቃላ ኦድስ። 34 አሳስ ሌምሶይ ባይና ኦደና። ሽን የሱሲ ባ ታማረታ ፃላላራ ደእያ ዎደ፥ ኤንታዉ ኡባባ ብርሽድ ኦድስ።

35 ሄ ጋላስ ሳእ ኦማርስን፥ የሱሲ ባ ታማረታኮ፥ "አባፈ ሄፍን ፕኖስ" ያግስ። 36 እያ ታማረት ዳሮ አሳ የግ አግድ፥ የሱሲ ካሰ ገል ኡትዳ ዎጎሉዋን ገልድ የሱሳ ባንታራ ኤፍዶሶና። ሀራ ዎጎሎትካ ያን ደኦሶና። 37 ዎልቃማ ጎተይ ደንድድ፥ ሆበይ ዎጎሉዋ ሾጭን፥ ኩማና ጋካናዉ ዎጎሉዋ ግዶ ሃ ገልስ። 38 ሄ ዎደ የሱሲ ዎጎሉዋን ጉየ ባጋራ ቦርኮትድ ስክስ። እያ ታማረት እያ ደንድ፥ "አስታማርያዉ፥ ኑኒ ይያ ዎደ ነ ስእ ጋዳ ፄላይ?" ያግዶሶና።

39 ያትን፥ እ ባርክድ ጎትያ፥ "ስእ ጋ" ግድ፥ አባካ፥ "ዎፑ ጋ" ግስ። ጎተይካ ስእ ግን ኡባባይ ዎፑ ግስ። 40 የሱሲ ባ ታማረታኮ፥ "አይስ ሀይሳዳ ባበቲ? ህንተዉ አማኖይ ዋንድ ይዴ?" ያግስ።

41 ኤንቲ ዳሮ ባብድ ባንታ ግዶን፥ "ሀይስ ሀር አቶሽን፥ ጎተይነ አባይ ኪተተይስ ኦኔ?" ያግዶሶና።