ናህመ ማፃፋ 12

ካህነታነ ሌወታ

1 ሳላትያላ ናኣ ዛሩባበላራነ ካህነ ሀላቃ እያሱራ ድኦፔ ስምዳ ካህነትነ ሌወት ሀይሳታ፦

ሳራያ፥ ኤርምያሳ፥ እዝራ፥ 2 አማረ፥ ማሉካ፥ ሀፁሳ፥ 3 ሳካና፥ ረሁማ፥ ማረሞታ፥ 4 እዳ፥ ግነቶና፥ አብያ፥ 5 ምያምና፥ ማአዳ፥ በልጋ፥ 6 ሻማአ፥ ዮያርባ፥ ያዳያ፥ 7 ሳላ፥ አሞካ፥ ህልቅያነ ያዳያ። ሀይሳቲ እያሱ ላይን ካህነታስነ ያራታስ ሀላቃ ግድዳይሳታ።

8 ኤንታራ እስፈ ስምዳ ሌወት እያሱ፥ ብኑያ፥ ቃድምኤላ፥ ሳራባ፥ ይሁዳነ ጋላታ ማዝሙረ ዛማረይሳታ ሀላቃ ግድዳ ማታና። 9 ኤንታራ እስፈ ዛማርያ ባቅቡቀይነ ኡኖይ ኤንታፈ ስንራ ሃ ስም ኤቅድ የፆሶና።

10 እያሱይ ዮያቅማ የልስ፤ ዮያቅም ኤልያሴባ የልስ፤ ኤልያሴብ ዮያዳ የልስ፤ 11 ዮያድ ዮናታና የልስ፤ ዮናታን ያዱአ የልስ። 12 ዮያቅም ካህነ ሀላቃ ግድድ ደእያ ላይ፥ ሀይሳፈ ካልድ ፃፈትዳይሳት ካህነታ ያራታ ሀላቃታ።

ሳራያ ያራ ሀላቃይ ማራያ።

ኤርምያሳ ያራ ሀላቃይ ሀናንያ።

13 እዝራ ያራ ሀላቃይ ማሱላማ።

አማረ ያራ ሀላቃይ የሆሀናና።

14 ማሉካ ያራ ሀላቃይ ዮናታና።

ሳባና ያራ ሀላቃይ ዮሰፋ።

15 ሀርማ ያራ ሀላቃይ አድና።

ማራዮታ ያራ ሀላቃይ ህልቃያ።

16 እዶ ያራ ሀላቃይ ዛካርያሳ።

ግነቶና ያራ ሀላቃይ ማሱላማ።

17 አብያ ያራ ሀላቃይ ዝክራ።

ምንያምናነ ማአዳ ያራ ሀላቃይ ፕልፃያ።

18 ብልጋ ያራ ሀላቃይ ሳሙአ።

ሻማያ ያራ ሀላቃይ ዮናታና።

19 ዮያርባ ያራ ሀላቃይ ማታናያ።

ያዳያ ያራ ሀላቃይ ኦዛ።

20 ሳላያ ያራ ሀላቃይ ቃላያ።

አሞካ ያራ ሀላቃይ ኤቤራ።

21 ከልቀ ያራ ሀላቃይ ሀሳባያ።

ያዳያ ያራ ሀላቃይ ናትናኤላ።

22 ሌወታ ሀላቃት ኤልያሴብ፥ ዮያዳ፥ ዮሃንነ ያዱእ ካህነ ሀላቃ ግድዳ ዱማ ዱማ ላይን ኤንቲ ፃፈትዶሶና። ሄ ማዝጋበይ ጊግዳይ ፋርሰ ቢታ ካዋ ዳርዮሳ ላይና። 23 ግዶሽን፥ ሌወታ ያራታ ሀላቃት ማዝጋበን ፃፈትዳይ ኤልያሴባ ናኣ ናአ ግድዳ ዮሃን ሀይቃና ጋካናዉ ደእያ ዎደ ፃላላና።

24 ሌወታ ሀላቃት ሀሳባያ፥ ሳራባነ ቃድምኤላ ናኣ እያሱ። ኤንቲ ፆሳ አስ ግድዳ ካዎይ ዳዊቲ ኪትዳይሳዳ፥ ናምአን ሻከት ኤቅድ፥ ታራን ታራን ፆሳ ቦንቾሶናነ ጋላታ ማዝሙረ የፆሶና።

25 ፆሳ ኬ ግምበ ድርሳ ፐንግያ ማታን ኬፀትዳ ዱማ ዱማ ሚሸ ዎያ ኬ ናገይሳት ማታና፥ ባቅቡቃ፥ አብድዩ፥ ማሱላማ፥ ፃልሞናነ አቁባ። 26 ሀይሳቲ ዮፀደቃ ናኣ ናኣ ግዳዳ እያሱ ናኣ ዮያቅመይ፥ ቢታ አይስያ ናህመይነ ካህነነ ፃፈ ግድዳ እዝር ደእዳ ላይን ኦዶሶና።

የሩሳላመ ግምበ ድርሳ አንጅሶ ባኣለ

27 የሩሳላመ ግምበ ድርሳይ ግምበትድ ዉርዳ ባኣለ ቦንችያ ዎደ ሌወት ባንታ ደእያ በሳፈ ኮየትድ፥ ዳላን፥ ዲን፥ ማስንቆን፥ ጋላታ ማዝሙረ የፅሸ ኡፋይሳን ባኣለ ቦንቻናዉ የሩሳላመ ይዶሶና። 28 ሀ ባልያ ቦንቻናዉ ዛማረት የሩሳላመ ሄራን ደእያ ናፆፋታ ጉታታፐ፥ 29 ቤት-ገልጋላፐ፥ ግብአፐነ አዝማወታፐ ሺቅዶሶና። ኤንቲ የሩሳላመ ሄራን ባንታዉ ጉታታ ኬፅዶሶና። 30 ካህነትነ ሌወት ባንታና ዎጋዳ ጌሽዳፐ ጉየ አሳ፥ ፐንገታነ ግምበ ድርሳ ጌሽዶሶና።

31 ታኒ ይሁዳ ሀላቃታ ግምበ ድርሳ ቦላ ከሳስ። ናምኡ ግታ ማዝሙረ ኮይረታ ጋላታ ማዝሙረ የፃና መላ ኦስ። እስ ኮይረይ ግምብያ ሁጰሶራ ኡሻች ስሚድ፥ ፕቶ ፐንገ ባጋ ብስ። 32 ሆሻያነ ይሁዳ ሀላቃታፐ ባጋት ኤንታና ካልዶሶና። 33 ኤንታራ ደእያ ሀራት አዛራ፥ እዝራ፥ ማሱላማ፥ 34 ይሁዳ፥ ብንያመ፥ ሻማእያ፥ ኤርምያስነ 35 ሞይዘ ፑንያ ጉ ካህነት ካልዶሶና። ኤንታና ካልድ ይዳይ ዛካርያሳ፤ ዛካርያስ ዮናታና ናአ፤ ዮናታን ሻማአ ናአ፤ ሻማእ ማታና ናአ፤ ማታን ምካያ ናአ፤ ምካየይ ዛኩራ ናአ፤ ዛኩር አሳፋ ናአ። 36 ዛካርያሳ ያራ ግድዳ ሻማኤይ፥ አዛርኤል፥ ምላላ፥ ግላላይ፥ ማአየይ፥ ናትናኤል፥ ይሁድነ ሀናን ፆሳ አስ ግድዳ ዳዊቲ ዛማርያ ዎደ ጎኤትያ ማዝሙረ ሚሽያ ኡባ ኤክድ፥ ዛካርያሳ ካልዶሶና። ኤንታ ካለይ ፃፍያ እዝራ። 37 ፑልቶ ፐንግያ ጋክዳፐ ጉየ ዳዊታ ካታማኮ ስሚድ፥ ግምብያ ቦላ ከይድ፥ ዳዊታ ኬፈ ፑደ ባጋራ አድ፥ ዶሎሀ ባጋራ ደእያ ሃ ፐንግያኮ ብዶሶና።

38 ናምአን ኮይረይ ግምብያ ሁጵያ ኦይክድ ሀድርስ ስሚድ ብስ። ታኒ አሳፐ ባጋራ ግዳዳ ኤንታፈ ጉየራ ካላስ። እቶነ አዱሳ ግምብያ አድ፥ ዳልጋ ግምብያ በሳ ጋክዳ። 39 ያፐ ስሚድ፥ ኤፍሬማ ፐንግያ፥ የሻና ፐንግያ፥ ሞሎ ፐንግያ፥ ሀናንኤላ አዱሳ ግምብያነ ፄታታ አዱሳ ግምብያ ጋካናዉ ብዳ። ዉርሰን ዶርሳ ፐንግያ ማታራ አድ ናገይሳታ ፐንግያ ጋክድ ኤቅዳ።

40 ጋላታ ማዝሙረ የፅያ ናምኡ ኮይረት ፆሳ ኬን ባንታ በሰ በሰ ኦይክዶሶና። ቃስ ታካ ታራ ደእያ ሀላቃታራ ያ ጋካስ። 41 ሄሳዳካ፥ ካህነት ኤልያቄም፥ ማእሰይ፥ ምንያምን፥ ምካየይ፥ ኤልዮአን፥ ዛካርያስነ ሀናን ባንታ ሞይዝያ ኦይክድ፥ 42 ማእሰይ፥ ሻማየይ፥ አላዛር፥ ኡዝ፥ የሆሀናን፥ ማልክየይ፥ ኤላምነ ኤፀር ባንታ በሳ በሳ ኦይክዶሶና። ይዝራ ኤንታ ካለን ባንታ ቃላ ቁ ኦድ ማዝሙረ የፅዶሶና።

43 ሄ ጋላስ ዳሮ ያርሾ ያርሽዶሶና። ፆሳይ ኤንታዉ ግታ ኡፋይስ እምዳ ግሾ ዳሮ ኡፋይትዶሶና። ማጫሳይ ናይት ኡባይ ኡፋይትዶሶና። የሩሳላመን አሳይ ኡፋይትያ ኡፋይሳ ኮሽንቻይ ሃሆን ስኤቴስ።

44 ሄ ጋላስ አሳይ እምያ እሞታታ፥ አስራታነ ላይን ካፅያ ካ አይፍያፐ ኮይሩዋ ሺሽድ ዎያ ኬ ናግያ ሀላቃታ ዶርዶሶና። ሀ ዶረትዳ አሳት ዱማ ዱማ ካታማታን ደእያ ጎሻታፐ ህገይ ኪተይሳዳ ካህነታስነ ሌወታስ በሲያ ካ ሺሾሶና። አይስ ጊኮ፥ ይሁዳ አሳይ ካህነትነ ሌወት ኦያ ኦሱዋን ዳሮ ኡፋይትዶሶና። 45 ኤንቲ ፆሳይ ኪትዳይሳ ኦዶሶና፤ ጌሾ ዎጋ ፖልዶሶና። ኤንታ ፃላላ ግዶናሽን ዛማረትነ ናገይሳት ዳዊቲነ እያ ናኣ ሶሎሞነይ ኪትዳ ኦሱዋ ፖልዶሶና። 46 በን ዳዊታ ዎደነ አሳፋ ዎደ ዛማረትነ ፆሳስ ሺቅያ ጋላታ ማዝሙረታ ካለያ ሀላቃት ደኦሶና። 47 ዛሩባበላ ላይንነ ናህመ ላይን እስራኤለ አሳ ኡባይ ዛማረታስነ ናገይሳታስ በሲያ ካ ጋላስ ጋላስ እሞሶና። ሌወታስካ በሲያ ካ እሞሶና። ሌወት ቃስ አሮና ያራ ግድዳ ካህነታስ በሲያ ካ እሞሶና።