ናህመ ማፃፋ 13

ናህመይ ኤህዳ ላመ

1 ሄ ጋላስ አሳ ኡባይ ስእሽን፥ ሙሰ ማፃፋይ ናባበትስ፤ ሄ ዎደ ኤንቲ፥ "ሞአበ አሳይነ አሞነ አሳይ ፆሳ አሳራ መርናዉ ጋሄታናዉ በሰና" ግያ በሳ ማፃፋን ደምዶሶና። 2 አይስ ጊኮ፥ እስራኤለ አሳይ ግብፀፈ ከይድ፥ ካናነ ብያ ዎደ ሞአበነ አሞነ ቢታ አሳይ ኤንታዉ ካነ ሃ እምድ ሞካናይሳ አግድ፥ እስራኤለ አሳ ባዳና መላ ባላማስ ሚሸ እምድ ሻምዶሶና። ግዶሽን፥ ኑ ፆሳይ ባደ አንጆን ላምስ። 3 ሄ ህግያ እስራኤለ አሳይ ስእዳ ዎደ አላጋ አሳ ባንታ ግዶፈ ሻክዶሶና።

4 ሄሳፈ ካሰ ፆሳ ኬ ሚሸታ ዎያ ኬስ ሀላቃ ግድዳ ካህነይ፥ ኤልያሴብ ፆባራ ዳቦተ መስ። 5 ሄሳፈ ጋሶን ኤልያሴብ፥ ካ እሞታታ፥ እፃነ፥ ፆሳ ኬ ጌሻ ሚሸታ፥ ካ ዎይንያነ ዛይትያ፥ ሌወታስ፥ ዛማረታስነ ናገይሳታስ እምያ አስራታነ ካህነታስ እምያ ካ ዎያ ዎጋ ክፍልያን ፆበይ ዳና መላ እሚስ።

6 ሀ ኡባይ ሀንያ ዎደ ታ የሩሳላመን ደእከ። አርፀክስሰይ ባብሎነ ቢታን ካዎትዳ ሀስታማነ ናምአን ላይን ታኒ ስማዳ ባብሎነ ቢታ ካዋኮ ባስ። ግዶሽን፥ ጉ ዎደፐ ጉየ ካዋ ኦይቻዳ፥ 7 የሩሳላመ ስማዳ ያስ። ፆሳ ኬ ዛባን ኤልያሴብ ፆቢያስ ዳና ክፍለ ጊግስድ ዎዳ ኢታባ ስአስ። 8 ዳሮ ይሎታዳ፥ ፆቢያ ሶ ሚሸ ኡባ ክፍልያፐ ከሳዳ ካረ ሆላስ። 9 ክፍልያ ዎጋዳ ጌሻና መላ ኪታስ። ፆሳ ኬ ሚሸታ፥ ካ፥ እሞታታነ እፃንያ ዛራዳ ኬ ገልሳስ።

10 ቃስ አሳይ ሌወታስ በሲያ ካ እምቦና ግሾ ሌወትነ ዛማረት ባንታ ፆሳ ኬ ኦሱዋ አግድ ጎሻስ ጉየ ብዳይሳ በአስ። 11 ሄሳ ግሾ፥ ታኒ ሀላቃታኮ፥ "ፆሳ ኬ ኦሱዋ አይስ የግ አግደቲ?" ያጋዳ ሀንቀታስ። ሄሳፈ ጉየ፥ ሌወታ ፄጋዳ ኡባ ኤንታ ኦሱዋን ኦሱዋን ዛራስ። 12 ያትን ይሁዳ አሳይ ካፈ፥ ዎይንያፐ፥ ዛይትያፐ እምያ አስራታ ዎያ ኬ ዛሪድ ኤሆ ዶምስ። 13 ታኒ ካህንያ ሳላማ፥ ፃፍያ ሳዶቃነ ሌውያ ፓዳያ ሚሸ ዎያ ኬስ ሀላቃ ኦዳ ሹማስ። ቃስ ማታና ናኣ ናኣ ዛኩራ ናአይ ሀናን ኤንታ ማደይሳ። ሀይሳቲ ኡባይ ኮሽያባ ኡባ ባንታ እሻታስ ሻክ ሻክ እሞን አማነትዳይሳታ ግድዶሶና።

14 "ታ ፆሳዉ ታና ቆፓ፤ ቃስ ነ ኬ ኦሶይ ጊጋና መላ ታኒ ኦዳ ሎኦ ኦሱዋ ዶጎፓ" ያጋስ።

15 ሄ ዎደ ታኒ ይሁዳን ደእያ አሳይ ሳምባታ ጋላስ ዎይነ ጉምእሽን በአስ፤ ሀራት ካ፥ ዎይነ ኡሻ፥ ዎይነ አይፍያ፥ ባላሰ አይፍያነ ሀራባታ ባንታ ሀረን ጫንድ፥ ሳምባታ ጋላስ የሩሳላመ ኤህሽን በአስ። ሄሳ ግሾ፥ ኤንቲ ሳምባታ ጋላሳ ዛልኦናዳ ታኒ ኤንታዉ ምንዳ ኦዳስ። 16 ሄሳ ቦላ ቃስ የሩሳላመን ደእያ ፅሮሳ አሳይ ሞሎነ ሀራ እስ እስ ዛልኤ ሚሸታ ኤህድ ሳምባታ ጋላስ ይሁዳ አሳስነ የሩሳላመን ባይዞሶና። 17 ታኒ ይሁዳ ሀላቃታ፥ "ሀይሳ መላ ኢታ ኦሶ ኦድ ሳምባታ አይስ ቱንሴቲ? 18 ፆሳይ ኑ ቦላነ ኑ ካታማ ቦላ ሀይሳ መላ መቶ ኤህዳይ፥ ካሰ ህንተ አዋት ሄሳ መላ ኢታባ ኦዳ ግሾ ግደኔ? ሀእ ህንተ ሳምባታ ቱንስድ፥ እስራኤለ አሳ ቦላ ሀራ ሀንቆ ኤሀናዉ ሀኔታ" ያጋዳ ሀንቀታስ።

19 ሄሳፈ ጉየ፥ ሳምባት ገላናፐ ስን የሩሳላመ ግምብያ ፐንገት ጎርደታናዳነ ሳምባት አናሽን ዶየቶና መላ ኪታስ። ቃስ ሳምባታ ጋላሳን አይባ ቶሆይካ ገሎናዳ ናጋና መላ ታ ኦሳንቾታፐ እሶታ እሶታ ግምበ ፐንግያ ቦላ ኤሳስ። 20 ሄሳ ግሾ፥ ዱማ ዱማ ዛልኤ ሚሸታ ኤህያ ዛልአንቾት እስ ቶሆ ዎይኮ ናምኡ ቶሆ የሩሳላመ ግምብያፈ ካረ ባጋራ አቅዶሶና። 21 ሽን ታኒ ኤንታኮ፥ "ግምብያፈ ካረራ ዋናናዉ አቄቲ? ህንተ ናምአን ሀይሳዳ ኦኮ ታኒ ዎልቃን ህንተና ተቃና" ያጋዳ ሀንቀታስ። ሄ ጋላሳፐ ስምን ናምአን ሳምባታ ጋላስ ይቦኮና። 22 ታኒ ሌወት ባንታ ሁጵያ ጌሻና መላ፥ ፐንገታ ናጋና መላነ ሳምባታ ጋላሳ ጌሽ ኦና መላ ኪታስ።

"ታ ፆሳዉ፥ ሀ ኡባ ግሾ ታና ቆፓ፤ ነ መርና ሲቁዋ ግሾ ታዉ ቃታ" ያጋዳ ዎሳስ።

23 ሄ ዎደ ታኒ ይሁዳ አደ አሳፐ እሶት እሶት አሽዶዳ፥ አሞነነ ሞአበ ቢታፈ ማቾ ኤክዳይሳ በአስ። 24 ኤንታ ናይታፐ ባጋይ አሽዶዳ ቢታ ዎይኮ ሀራ ቢታ ዶና ሃሳዮሶና፤ ባንታ ቢታ፥ ይሁዳ ዶና ኦደታናዉ ዳንዳኦኮና። 25 ታኒ ኤንታራ ኦየታስ፤ ኤንታ ባዳስ፤ ኤንታፈ እሶታ እሶታ ደቻዳ፥ ኤንታ ሁጵያ ብናና ሾዳስ። ሄሳ ፃላላ ግዶናሽን፥ ኤንቲ ባንታ ማጫ ናይታ ኤንታ አደ ናይታስ እሞናዳ፥ ኤንታ ማጫ ናይታ ባንታዉነ ባንታ አደ ናይታስ ኤኮናዳ ፆሳ ሱንን ጫቅሳስ። 26 ቃስ ኤንታኮ፥ "ካዎይ ሶሎሞነይ ናጋራ ኦዳይ አላጋ ቢታ ማጫሳታ ኤኮይሳና ግደኔ? ሶሎሞነ መላ ካዎይ ሀራ ቢታ ካዎታ ግዶን ባዋ፤ ፆሳይ እያ ዶስዳ ግሾ፥ እስራኤለ አሳ ኡባ ቦላ ካዎይስ። ሽን፥ ሀራ አቶሽን እያካ አላጋ ቢታ ማጫሳት ሀይሳ መላ ናጋራ ኦስስዶሶና። 27 ያትን፥ ኑካ ህንተና ስእድ፥ አላጋ ማጫሳ ኤክድ ሄሳ መላ ኢታባ ኦድ ፆሳ ናቃነዬ?" ያጋስ።

28 ካህነ ሀላቃ ኤልያሴባ ናይታፐ እሶይ ዮያዳ። ሽን እያ ናይታፐ እሶይ ቤት-ሆሮና ካታማ አስ ግድዳ ሳንባላፃ ናእዉ ማቾ ኤክስ። ያትን፥ ታኒ ዮያዳ የሩሳላመ ካታማፐ ጎዳስ።

29 "ታ ፆሳዉ፥ ሀይሳቲ ካህነተ ዎጋነ ካህነታራነ ሌወታራ ጫቅዳ ጫቁዋ ዋት ቱንስዳኮ በአ" ያጋዳ ዎሳስ።

30 ኤንታ አላጋ ቢታ ቱናተፈ ጌሽዳፐ ጉየ ካህነታስነ ሌወታስ ኤንታ ኦሱዋ ኦሱዋ እማስ። 31 ያርሾስ ኤያ ምይ ዎደን ዎደን ያና መላነ አሳይ ባዉ አይፍዳባፐ ኮይሮ አይፍያ እሞታ ኦድ ኤሀና መላ ዎጋ ዎስ።

"ታ ፆሳዉ፥ ነ ኬሀተን ታና ቆፓ" ያጋዳ ዎሳስ።