አብድዩ ማፃፋ 1

ኤዶመ ኦቶሩዋነ ፕርደተ

1 አብድዩይ በእዳ ቆንጨ። ጎዳ ፆሳይ ኤዶመባ ሀይሳዳ ያጌስ:

ኤዶመባ ጎዳይ፥ ባ ኪትያ አድያ ቦላ ካዎተታስ ኪትዳይሳ ኑኒ ስእዳ፤ "ደንድተ! ኤዶመ ኦላናዉ ቦስ" ያግስ። 2 "ሄኮ፥ ታ ነና ካዎተታ ግዶን ላፋ ከሳና፤ ኔኒ ዳሮ ካትዳይሳ ግዳና። 3 ነኖ፥ ዛላ ቆጶ ግዶን ደኤይሶ፥ ነ ኬ ቃ ደረታ ቦላ ኬፅዳይሶ፥ ነ ዎዛናን፥ ‘ታና ሀይሳፈ ሳአን ዎሳናይ ኦኔ?’ ያገይሶ፥ ነና ነ ዎዛና ኦቶሮይ ጭምስ። 4 ነ አርጋንዳ ፑደ ሃካዳ ፕራኮካ፥ ነ ኬ ፆልንቶታ ግዶን ኬፅኮካ፥ ታ ነና ያፐ ዱገ ዎሳና" ያጌስ ፆሳይ።

5 "ካይሶይ ዎይኮ ባንቅያ አስ ቃማ ዪኮ፥ ባንታዉ ግደይሳ መላ ፃላላ ካይሶቶኮናዬ? ዎይነ ማፀይሳት ማፅሸ፥ ፖሽለ አሾኮናዬ? ሽን ነ ሞርከት ነና ፖሎ ይሳና። 6 አቤት ኤሳዌይ ዋንድ ቦንቀታንዴ? ቆሳን ደእያ እያ ሻሎይ ዋንድ ኤከታንዴ? 7 ኔራ ጫቅዳይሳት ኡባይ ነና ነ ቢታፈ ጎዳና፤ ቃስ ነ አማነትዳ ላገት ጭምድ ነና ፆናና። ነ ካ ምዳይሳት ነ ኦገን ግተ የጋና፥ ሽን ኔኒ ሄሳ አኬካካ" ያጌስ።

8 "ሄ ጋላስ ታኒ ኤዶመፐ ጭንጫታነ ኤሳዌ ዙማፐ አኬካ ይሳና። 9 ህንተኖ፥ ተማና አሳቶ፥ ህንተ ኦላንቾት ዳጋማና፤ ኤሳዌ ዙማ ቦላ ደእያ አሳ ኡባይ ጎይረታና" ያጌስ ጎዳይ።

ኤዶመ ዎዛና ምኖተ

10 ነ እሻ ያይቆባ ቦላ ነ ኦዳ ኢታባ ግሾ፥ ነ ዬላ ማአና፤ ነ መርናዉ ያና። 11 እማትነ አላጋት እያ ሻሉዋ ቦንቅያ ጋላስ ኔኒ ጋፃ ከያዳ ኤቃ ፄላዳሳ። ቃስ እያ ፐንገራ ገልድ፥ የሩሳላመ ካታማ ቦላ ሳማ የግያ ዎደ ኔኒ ኤንታፈ እሱዋ መላ ግዳዳሳ። 12 ኔኒ ነ እሻይ መቶትያ ጋላስ እያ መቱዋን ኡፋይታናዉ በሰናሽን፤ ይሁዳ አሳ ቦላ ዋየይ ጋክያ ጋላስ ሀሹ ጋናዉ በሰናሽን። ኤንታ ኡንአ ጋላሳን ኦቶሮን ኦደታናዉ በሰናሽን! 13 ኔኒ ኤንታ መቱዋ ጋላስ ታ አሳይ ደእያ ካታማ ገላናዉ፥ ኤንታ ዋያን ኔኒ ኡፋይታናዉነ ኤንታ መቱዋ ጋላስ ኤንታ ሻሉዋ ቦንቃናዉ በሰናሽን! 14 ባቃተይሳታ ዎናዉ ኔኒ ዳጋላ ኦገን ናጋናዉነ አትዳይሳታ ኤንታ ኡንኣ ጋላስ ሞርከታስ አዳ እማናዉ በሰናሽን!

እስራኤለይ ፆናና

15 ጎዳ ፕርዳ ጋላሳይ ካዎተታ ኡባ ቦላ ማትስ። ነኖ ኤዶመ፥ ኔኒ ሀራታ ቦላ ኦዳባይ ነ ቦላ ኦሰታና፤ ነ ኦሶይ ነ ቦላ ስማና። 16 ታ ጌሻ ዙማ ቦላ ነ ኡይዳይሳ መላ ካዎተ ኡባይ ቃንፆና ኡያና፤ ጉጅድካ ኡያና፤ ኤንቲ ካሰ ሀን ኤሮናባ ሀናና።

17 "ሽን ፅዮነ ዙማን ከስ ኤክዳይሳት ዳና፤ ፅዮነይ ጌሽ ግዳና፤ ያይቆባ ኮቻይ ባንታ ቢታ ዛር ላታና። 18 ያይቆባ ኮቻይ ታማ ግዳና፤ ዮሰፋ ኮቻይ ላጮ ግዳና፤ ኤሳዌ ኮቻይ ቡረ ግዳና። ታም ቡረ መይሳዳ፥ ያይቆባ ዘረይነ ዮሰፋ ኮቻይ ኤሳዌ ኮቻ ምድ ፖሎ ይሳና" ያጌስ ጎዳይ።

19 ነገበ መላ ቢታን ደእያ አሳይ ኤሳዌ ዙማ ላታና፤ ጋ ቢታን ደእያ አሳይ ፍልስፄመ ቢታ፥ ኤፍሬማ ቢታነ ሳማረ ቢታ ላታና። ቃስ ብንያመ ኮቻይ ጋላዳ ቢታ ላታና። 20 ድኤተፈ ስምዳ እስራኤለ አሳይ፥ ካናነፐ ብድ ስራፍታ ጋካናዉ ደእያ ቢታ ላታና። የሩሳላመፐ ደኤትድ፥ ሳፋራዳ ጌተትያ በሳን ደእያ አሳት ነገበ ካታማታ ላታና። 21 አሸይሳት ኤሳዌ አሳ ሃራናዉ ፅዮነ ዙማ ቦላ ከያና፤ ካዎተይ ጎዳባ ግዳና።