1 ታ እሻቶ፥ ታ ኩመ ዎዛናን ታ አሞተይነ ፆሰ ዎሰይ እስራኤለይ አታና መላሳ። 2 ኤንቲ ፆሳስ ምሸቶሶናሽን፥ ቱማ ኤራተን ምሸቶናይሳ ታ ማርካታይስ። 3 ኤንቲ ፆሳ ፅሎተ ኦግያ ኤሮና እፅድ፥ ባንታ ሁጰ ፅሎተ ካልዶሶናፐ አትሽን፥ ፆሳ ፅሎተ ኮይቦኮና። 4 አስ ኡባይ አማኖን ፅላና መላ ክርስቶስ ህግያ ፖልስ።

5 አስ ህገ ናግድ ኤክያ ፅሎተባ ሙሰይ ፃፍሸ፥ "ህገ ናግያ ኦንካ ሄ ህግያ ናግዳ መላ ደኤስ"✝ ያግስ። 6 ሽን አማኖን ኤክያ ፅሎተባ ጌተትዳይ ሀይሳ፦ "ነ ዎዛናን፥ ‘ኦን ሳሎ ከያኔ?’ ያጎፓ፤ ሄስ ክርስቶሳ ዎሳናሳ።✝ 7 ዎይኮ፥ ‘ዱገ ሳአ ጋርስ ዎናይ ኦኔ?’ ጎፓ፤ ሄስ ክርስቶሳ ዱፎፐ ከሳናሳ። 8 ሽን ያግድ ፃፈትስ፦ ‘ፆሳ ቃላይ ነ ማታና፤ ነ ዶናንነ ነ ዎዛናን ደኤስ’ ኑኒ ህንተዉ ኦድያ አማኖ ቃላይ ሀይሳ።

9 "የሱሲ ጎዳ" ጋዳ ነ ዶናን ማርካትኮነ ፆሳይ እያ ሀይቆፐ ደንዳይሳ ነ ዎዛናን አማንኮ፥ ነ አታና። 10 አስ ባ ዎዛናን አማንድ ፅሌስ፤ ባ ዶናን ማርካትድ አቴስ። 11 ጌሻ ማፃፋይ፥ "እያን አማንያ ኦንካ ዬላተና"✝ ያጌስ። 12 እስ ፆሳይ ኡባ ጎዳ ግድያ ግሾ፥ አይሁደታ ግዶንነ አይሁደ ግዶና አሳ ግዶን ዱማተ ባዋ። እ ባና ፄግያ ኡባስ ዳሮ ኬሀ። 13 ጌሻ ማፃፋይ፥ "ጎዳ ሱን ፄግያ ኦንካ አታና"✝ ያጌስ።

14 ያትን፥ ኤንቲ አማኖና ደእሸ ዋንድ እያ ፄጋናዉ ዳንዳኦና? ኤንቲ እያባ ስኦና ደእሸ ዋትድ እያ አማናናዉ ዳንዳኦና? ቃስ ኤንታዉ ቃላ ኦድያ አስ ባይና ደእሽን፥ ዋንድ ስአናዉ ዳንዳኦና? 15 ኪተትዳ አስ ባይና ደእሽን፥ ቃላይ ዋንድ ኦደታናዉ ዳንዳኢ? ጌሻ ማፃፋን፥ "ኡፋይሳ ዎንገላ ኦድያ አሳ ቶሆት ዋንድ ሎኦና!"✝ ያግድ ፃፈትስ።

16 ሽን እሳያስ፥ "ጎዳዉ፥ ኑ ማርካተ ኦን አማንዴ?"✝ ያግዳይሳዳ፥ ኡባይ ዎንገላ አማንቦኮና። 17 ሄሳ ግሾ፥ አማኖይ ስሳፈ ዬስ፤ ስስ ክርስቶሳ ቃላፐ ዬስ።

18 ግዶሽን፥ እስራኤለ አሳይ ቃላ ስእቦኮና ጉሰዬ? አካይ፥ ስእዶሶና። ጌሻ ማፃፋን፥

"ኤንታ ቃላይ ቢታ ኡባን ስኤትስ፥

ኤንታ ኦዳይ ሳኣ ጋፃ ጋክስ"✝

ያገትስ። 19 ሽን እስራኤለ አሳይ ኤርቦኮና ጉሰዬ? ሙሰይ ካሰ፥

"ታኒ ህንተና ለቀትዳ አሳን ቂሮይሳና፤

ቃስ ኤያ አሳን ህንተና ይሎያና"✝ ያግስ።

20 ቃስ እሳያስ፥

"ታና ኮይቦና አሳስ በንታስ፤

ታና ኦይችቦና አሳስ ቆንጫስ"✝

ያግድ ያዮና ኦድስ።

21 ሽን እሳያስ እስራኤለታባ ኦድሸ፥

"ኡባ ጋላስ ኪተቶና አሳስነ

ታና እፅያ አሳስ ታ ኩሽያ ምጫስ"✝ ያጌስ።