ሶፎናሳ ማፃፋ 2

1 ህንተኖ፥ ዬል ባይና አሳዉ፥ አነ እስፈ ሺቅተ! 2 ጫርኮይ ፑንድ ኤፍያ ባናዳ ሀኖና ደእሽን፥ ያሽያ ጎዳ ሀንቆይ ህንተ ቦላ ዎና ደእሽን፥ ጎዳ ሀንቆ ሱላ ጋላሳይ ህንተ ቦላ ዮና ደእሽን ጎዳኮ ስምተ። 3 ህንተኖ፥ ቢታን ደእያ አሽከቶ፥ እያ ኪታ ናግያ ኡባቶ፥ ጎዳ ኮይተ፤ ፅሎተ ኮይተ፤ አሽከተ ኮይተ። ኦን ኤር ጎዳ ሀንቆ ጋላስ ህንተ አቶና አገከታ።

ፍልስፄመ ቦላ ያና ፕርዳ

4 ጋዛ ካታማይ ኦና ግዳና፤ አስቃሎና ካታማይ ባይሳ ግዳና። አሽዶዳ ካታማ አሳይ ሴታ ጋላስ ጎደታና፤ ኤቅሮና ካታማይ ሾደታና። 5 ህንተኖ፥ አባ ጋፃን ደእያ ከልታወቶ፥ ህንተና አየ! ነኖ፥ ፍልስፄመት ደእያ ካናነ ቢታዉ፥ ጎዳ ፕርዳይ ነ ቦላ ዬስ። ታኒ ነና ይሳና፤ እስ አስካ አተና። 6 አባ ጋፃን ደእያ ህንተ ቢታይ መሄ ሄመትያ በሲ፥ ሄንንቾት ደእያ በስነ መሄ ዳራ ግዳና። 7 ይሁዳ አሳፐ አትዳይሳት አባ ጋፃን ደእያ በሳ ላታና፤ ኤንቲ ያን ሄማና። ሳአይ ቃምያ ዎደ ኤንቲ አስቃሎና ካታማን ደእያ ኬታን አቃና። ጎዳይ ኤንታ ፆሳይ ኤንታባ ቆፓና፤ እ ኤንታ ዛሪድ ናንሳና።

ሞአበነ አሞነ ፕርደተ

8 ኡባፈ ዎልቃማ ጎዳይ፥ እስራኤለ ፆሳይ፥ "ታኒ ሞአበ ቶሽያነ አሞነ ጫሻ ስአስ። ኤንቲ ታ አሳ ዋትድ ቶችዳኮነ ኤንታ ቢታ ኤካናዉ ዋትድ ማንድዳኮ ታ ኤራይስ። 9 ሄሳ ግሾ፥ ታ ደኦ ሱንን ጫቃይስ፤ ሞአበይ ሶዶመዳ ሀናና፤ አሞነይ ጋሞራዳ ሀናና። ኤንቲ መርናዉ ማፅነ ኦላነ አጉን ማእዳ ባዞ ግዳና። ታ አሳፐ አትዳይሳት ኤንታ ሻሉዋ ቦንቃና፤ ኤንታ ቢታ ላታና" ያጌስ።

10 ኤንቲ ኡባፈ ዎልቃማ ጎዳ አሳ ቶችዳ ግሾነ ጫይዳ ግሾ፥ ኤንታ ቦላ መቶይ ጋካና። 11 ኤንታ ቢታን ደእያ ፆሳታ እ ይስያ ዎደ ጎዳይ ኤንታና ያሽሳና። ሳአን ደእያ ካዎተታን ደእያ አሳ ኡባይ ባ ደእያ በሳን እያ ጎይናና።

12 ህንተኖ፥ ቶጰ አሳዉ፥ ህንተ ታ ማሻን ሀይቃና።

ሶረ ቦላ ያና ፕርዳ

13 እ ባ ኩሽያ ፑደሀ ባጋ የድድ አሶረ ቢታ ይሳና። ቃስ ናናወ ካታማ መላ ባዞዳ ባይሳ በሲ ኦና። 14 መሄ ዉደይነ ቢታን ደእያ ዶአት ኡባይ ያን ሄመታና፤ ጉቶይነ ቁፃረይ ላለትዳ ግምብያ ግዶን ዳና። ኤንታ ቃላይ ማስኮተራነ ፐንግያራ ስኤታና፤ ዝጋ ቱቀት ካሎታና። 15 "ታፐ አትሽን፥ ሀር ባዋ" ያግድ ኦቶርትድ ደእዳ ካታማይ ሀእ ዋንድ ዶአት አቅያ በሲ ግድዴ? እያ ማታራ አያ ኡባይ ባንታ ኩሽያ ባቅሸ፥ "ፖራ!" ጋና።