1 Sameela Maxaafa 2

Haanni Woosaa

1 Haanna haysada yaagada woossasu;

"Ta wozanay Godan ufaytees;

ta kacey*2:1 Kacey: Ha bessaaninne hara bessan acey minotetha malla. Godan dhoqu gis.

Ta morketa bolla taani ceeqetayis;

ne ashoy tana ufaysees.

2 Godaa mela geeshshi baawa;

ne meli oonika baawa.

Nu Xoossaafe attishin,

hara Zaalli baawa.

3 Otoro haasaya aggite;

otoro qaali hinte doonape keyopo.

Godaa Xoossay ubbaa erees;

asa ooso yiggidi xeellees.

4 Olanchota dongey meqis;

shin daaburanchoti wolqa demmidosona.

5 Kallidaysati koshatidi unetidosona;

shin koshatidaysati ha77i kallidosona.

Maynthiya laapun nayta yelasu;

shin daro nayta yelidaara barka attasu*2:5 Barka attasu: Hara birshethay daaburasu guussu.

6 Goday wodhees, pathees;

Si7oolen yeggees, yaape kessees.

7 Goday dureyees; Goday manqethees;

kawushshees; dhoqu oothees.

8 I manqota baanape denthees;

metootanchota bidope denthees.

Enta boncho asaara utisees;

boncho araata laatisees.

Biittaa baasoti Godaasa;

enta bolla alamiya essis.

9 "I geeshshata tohuwa naagees;

shin iitata dhuman si77i oothana;

asi ba wolqan xoonenna;

10 Godaara eqeteysati liiqana;

Goday salope enta bolla dadada dechana.

Goday sa7an de7iya ubbaa pirdana;

I ba kawas minotethi immana;

I ba tiyidaysas xoono immana."