1 Sameela Maxaafa 29

Ankusi Dawita Xiqlaaga Zaaris

1 Filisxeemeti banta olanchota ubbaa Afeeqan shiishidosona. Isra7eeleti Izira7eelen de7iya pulto haatha matan dunkaanidosona. 2 Filisxeeme halaqati banta olanchota xeetaninne mukulu cugan salpisidosona; Dawitinne iya asay Ankusara issife gididi guye baggara salpidosona. 3 Filisxeeme halaqati enta be7idi, "Ha Ibraaweti haysan ay oothona?" yaagidosona.

Ankusi, "Haysi Isra7eele kawa Saa7ola aylliya Dawita gidennee? I daro wode taara aathis; I Saa7ola kaddidi keyoodepe hachi gakanaw taani iyape bala demmabike" yaagis.

4 Shin Filisxeeme halaqati Ankusa bolla hanqetidi, "Ha addiya neeni iyaw immida katamaa guye zaara. Olay goobiya wode I nu bolla simmidi dendonna mela I nuura olaa boopo. I ba godaara sigetanaw nu asata qoodhiya qaanxofe attishin, haraa ay oothanee? 5 Haysafe kase maccasay, ‘Saa7oli mukulata wodhis; Dawiti tammu mukulata wodhis’ yaagidi durishenne yexishe sabbiday Dawita gidennee?" yaagidosona.

6 Hessa gisho, Ankusi Dawita xeegidi, "De7o Goday eriya mela, neeni ammanthiya asi; neeni taara olas beysa ta dosayis. Neeni taako yoosape hachi gakanaw taani ne bolla bala demmabike. Shin halaqati neeni olas beysa dosokona. 7 Neeni guye simmada saro ba; Filisxeeme halaqata ufaysonnaba aykoka oothofa" yaagis.

8 Dawiti, "Taani ay oothadina? Taani neera de7oodepe hachi gakanaw ne taape ay bala demmadii? Yaatin, kawa, ta godaa morketara ayis oletikinaa?" yaagis.

9 Ankusi, "Xoossa kiitanchoda neeni taw lo77o gideysa taani erayis. Shin Filisxeeme halaqati, ‘I nuura ola boopo’ yaagidosona. 10 Nenne neera yida ne godaa aylletara wonto guura dendidi biite" yaagis.

11 Hessa gisho, Dawitinne iya asati Filisxeeme simmanaw wonta guura dendidosona; Filisxeemeti Izira7eele bidosona.