1 Taani salon hara gitanne malaalsiya malaata be7as. Xoossaa wursetha hanquwa qoncisiya laapun boshata oykida laapun kiitanchoti de7oosona.

2 Qassi tamara walaketida burcuko abba daaneysa be7as. He abba gaxan do7aa, iya misiliyanne iya sunthaa taybuwa xoonidaysata be7as. Xoossay entaw immida diithaa oykidi eqidosona. 3 Enti Xoossaa aylliya Muse mazmuriyanne Dorsa mazmuriya haysada yaagidi yexoosona.

"Godaw, Ubbaafe Wolqaama Xoossaw,

ne oosoy gitanne malaalsiyaba.

Dere ubbaa kawaw,

ne ogey xillonne tuma.✝

4 Geeshshi ne xalaala gidiya gisho,

Godaw, new yayyonnaynne

ne sunthaa bonchonay oonee?

Ne xillo oosoy asa ubbaas qonce gidiya gisho,

kawotethi ubbay ne sinthe yidi goyinnana"

yaagidi yexoosona.✝

5 Hessafe guye, salon dooyetidi de7iya Xoossa Keethaa, ika Markatetha Dunkaaniya be7as.✝ 6 Laapun boshata oykida laapun kiitanchoti Xoossa keethafe keyidosona. Enti geeshshinne phooliya liino ma7o ma7idosona; banta tiran worqa danco dancidosona. 7 Oyddu medhetethatape issoy, merinaw de7iya Xoossaa hanqoy kumida laapun worqa xuu7ata laapun kiitanchotas immis. 8 Xoossaa bonchuwafenne iya wolqaafe dendoysan Xoossa Keethay cuyan kumis. Laapun kiitanchoti oykida laapun boshati poletana gakanaw Xoossa Keetha oonika gelanaw danda7ibeenna.✝