1 Gibxe kawoy Gaaza olidi oykanaape kase, Filisxeemeba Godaape nabiya Ermiyaasako yida qaalay haysa: 2 Goday haysada yaagees;

"Heko, pudeha baggafe haathi dhuuqana;

di7oy gelida kixa haathada goggana.

Biittanne biittan de7iyaba ubbaa,

katamatanne enta giddon de7iya asa ubbaa muukana.

Asay waassana;

biittan de7iya ubbay yeekana.

3 Parata girsaa,

para gaareta kooshincha,

gaareta gondorsa girsaa si7ana.

Aawata kushey argaacida gisho,

banta nayta maaddanaw guye simmokona.

4 Filisxeeme asa dhaysanaw,

Xiroosanne Sidoona maaddanaw attiya

asaa dhaysanaw wodey gakis.

Goday Filisxeemepe attidaysata,

Haathan teqetida de7iya Kaftoorape yida kochata dhaysana.

5 Gaazi kayotada ba huuphiya meedasu;

Asqalooni ba kushiya doonna bolla wothasu.

Hinteno, abba gaxan attidaysato,

awude gakanaw hinte asatethaa gaaretii?

6 Hinte, ‘Godaa mashshaw, neeni si77i goonna ixey awudesee?

Ne bessaa simmada gela;

si77i gada utta’ yaageeta.

7 Shin Goday iya kiittin, I waanidi si77i gaanee?

Asqaloonanne abba gaxan de7iya biitta

olana mela kiittas" yaagis.