1 Iyyobi haysada yaagidi zaaris;

2 "Taani hessa mela haasaya daro si7as;

hinte minthethoy tana salethis.

3 Go77i bayna hinte odaas wursethi baawee?

taara hintena hessada palanthiya gaasoy aybee?

4 Hinte ta bessan, taani hinte bessan gididaba gidiyako,

taani ta huuphiya qaathashe,

ha77i hinte giyaba ubbaa hinte bolla loythada gaanashin!

5 Ta zoriyan ta hintena minthethanashin!

Ta doonape keyiya oday hintena minthethanashin!

6 "Shin ta haasaykoka ta sahoy decenna;

ta si77i gada danda7ikoka taape kichenna.

7 Abeeti Xoossaw, ne tana ta asatethafe kessadasa;

ta keethaa asa ubbaa dhaysadasa.

8 Shuuqida ta gogay taw marka gidis;

ta gilqatethay tana nagarancho kessis.

9 Xoossay hanqetidi ta asatethaa qanxerethis;

tana ixidi ba acha ta bolla garcis;

ta morkey ba ayfiya ta bolla kessis.

10 Asay ta yuushon shiiqidi tana qelqisidosona;

tana leqidi baqidosona. 11 Xoossay tana nagarachotas aathidi immis;

iitata kushen tana yeggis.

12 Taani kase saro de7as;

shin Xoossay tana tincherethis;

ta mirgaciya oykidi tana mentherethis;

cache loohisiya malla oothis.

13 Iya tooranchoti banta dongen tana teqidosona;

qadhey bayna ta kilahuwa muxerethidosona;

ta ciyaa sa7an gussidosona.

14 I tana zaari zaari madunxisis;

olanchoda toollidi caddis.

15 Taani kayo ma7o ma7as;

ta wolqay wurin baanan uttas.

16 Yeehon ta som7oy gabbis;

ta ayfey zo77is.

17 Shin he ubban ta balidabay baawa;

ta geeshsha wozanan woossayis.

18 Biittaw, tana gakida qohuwa kammofa;

ta waasoy shempiya soo demmofo.

19 Heko ta markay salona;

ta xabaqay bollana.

20 Ta laggeti tana kadhidi xeelloosona;

ta ayfey Xoossa sinthan afuthi tigees.

21 Ase asara sigethiya asi de7eysada,

tana Xoossara sigethiya asi de7idaba gidernishin.

22 Ta laythay wurana hanees;

guutha wodepe guye ta simmonna soo baana.