Luqaasa Wongela 8

Hayqida Na7iwunne Hargetiya Maccasiw

40 Asay naagidi gam7ida gisho Yesuusi simmiya wode moki ekidosona. 41 Ayhude woosa keetha halaqa gidida Iyaroosa geetetiya uray ba soo yaana mela Yesuusa tohuwa bolla wodhidi woossis. 42 Iyaw tammanne nam7u laythi gidida macca na7i saketada hayqos gakada de7awusu. Yesuusi biya wode asay iya un7ethees. 43 Tammanne nam7u laythi suuthi goggishe gam7ida maccasi de7awusu. Iya baw de7iya miishiya aakimetas immada ongasu. Shin paxanaw danda7abuku. 44 Iya Yesuusas guye baggara shiiqada, iya afilaa macaraa bochasu, iiraka goggiya suuthay eqi aggis.

45 Yesuusi, "Tana bochiday oonee?" yaagis. Ubbay, "Nu bochibooko" yaagin, Phexroosi, "Astamaariyaw, daro asay kaallishininne un7ethishin be7ashe waanada, ‘Tana bochiday oonee?’ gay" yaagis.

46 Shin Yesuusi, "Issi asi tana bochis; ayis giiko, wolqi taape keyoysi taw eretis" yaagis.

47 Maccasiya, ibay qoncidaysa erida wode kokorashe yada Yesuusa tohuwa bolla kundasu. Ayis bochidaakonne waanada ellesada paxidaako asaa ubbaa sinthan markatasu. 48 I, "Ta naate, ne ammanoy nena pathis; saro ba" yaagis.

49 Yesuusi oda ongonna de7ishin, ayhude woosa keetha halaqaa, Iyaroosa soope issi asi yidi, "Iyaroosa, ne na7iya hayqasu; astamaariya mela daabursofa" yaagis.

50 Shin Yesuusi hessa si7idi Iyaroosako, "Babofa! Ammana, ne na7iya paxana" yaagis.

51 Yesuusi Iyaroosa soo gakida wode Phexroosape, Yohaanisape, Yayqoobape, na7e aawapenne aayepe attishin, hari gelana mela koybeenna. 52 He bessan de7iya asa ubbay na7ees mishetidi yeekishin, Yesuusi, "Yeekofite Na7iya dhiskasupe attishin, hayqabuuku" yaagis.

53 Asay na7iya hayqidaysa eriya gisho, iya oda leqidi miicidosona. 54 Shin Yesuusi na7e kushiya oykidi, "Naatte denda" yaagis. 55 Na7ees shempoy simmin denda eqasu. Yesuusi entako, "Iwu miyaba immite" yaagis. 56 Na7ee aawaranne aayera malaaletidosona. Shin Yesuusi haysa, "Oodeska odopite" yaagis.