1 Goday yaagees;

Saloy ta araata,

sa7i ta tohoy yedhiya besse.

Yaatin hinte taw keexiya keethay,

ay mela keethee?

Ta shempana bessay awusee?✝

2 Haysa ubbaa ta kushey oothis;

entika hanidosona.

Shin taani bana ziqi oothiya uraa,

ba ayyaanan meqida uraanne

ta qaalan kokoriya ura xeellana.

3 Korma yarshey ase wodhiya asa mela;

urge dorsi yarshey kana yarshiya asa mela;

katha yarsho yarshey,

guduntho suuthi yarshiya asa mela;

qofiso ixaane cuyisey eeqa goyinniya asa mela.

Asa ubbay baw injetiya oge dooridosona;

enta shempoy enta tunatethan ufaytees.

4 Hessa gisho, taani enta metos aatha immana;

enti yayyidaba enta bolla ehana.

Taani xeegida wode oonika koybeenna;

taani odiya wode oonika si7ibeenna.

Enti ta sinthan iitabaa oothidosona;

tana ufaysonnaba dooridosona.

5 Hinteno, Godaa qaalas kokoreysato

iya qaala si7ite:

"Hintena ixiya hinte ishati, ta sunthaa gisho,

hintena kureysati, ‘Hinte ufaytin nuuni be7ana mela

ane Goday boncheto’ " yaagidosona;

shin enti yeellatana.

6 Katamaape yaa waasuwa si7ite;

xoossa keethafe keyiya girsaa si7ite.

He girsay ba morketas enta oosuwada

kushe zaariya Godaa girsaa.

7 "Iqetonna na7a yeliya maccas de7ii?

Bannakonna adde na7a yeliya maccas de7ii?✝

8 Haysa melaba oone si7iday?

Hessa melaba oone be7iday?

Issi derey issi gallas yeletanaw danda7iyee?

issi kawotethi qiphi zaaron medhetiyee?

Xiyooney buroo iqethi oykonna,

ellesada ba nayta yelasu.

9 Yelana wode gathiya taani

enti yelanaada oothikinaayee?

Yelanaada oothiya taani

yeliya ulo gordaynaayee?

Haysa giday tana, Godaa, ne Xoossaa.

10 Hinteno Yerusalaamo dosiya ubbaw, iira ufaytite;

I gisho ufaysan noocu giite.

Hinteno iw yeekiya ubbaw,

iira ufaytite.

11 Hinte, iya minthethiya dhantha dhammidi kallana;

I daro bonchuwafe loythi uyidi, ufaytana."

12 Goday yaagees;

"Taani iw sarotethaa shaafada darsana;

iw kawotethata duretetha kixa shaafada ehana.

Hinte hessa dhammana; I hashiyan tooketana;

I ki7on uttidi baalotana.

13 Aayiya ba na7a minthetheysada

taani hintena minthethenna;

hinte Yerusalaamen minettana.

14 Hessa hinte be7iya wode hinte wozanay ufaytana;

hinte meqethay maata mela aacana.

Godaa kushey iya aylleta bolla de7eysin

iya hanqoy iya morketa bolla de7eysi eretana.

15 Heko, Goday tamara yaana;

iya para gaareti gote mela.

Ba sheniya hanqon;

ba seeraka tama lacon qoncisees.

16 Goday asho ma7ida ubbaa

tamaninne mashshan pirdana;

daroti Godaa mashshan hayqana.

17 "Banta eeqa goyinnanaw atakilte gade baanaw,

bantana dummayeysatinne geeshsheysati;

guduntho, ecerenne hara tunabata meyisata giddofe

issuwa kaallidi beysati ubbay dhayana.

18 "Taani enta oosuwanne enta qofaa eriya gisho,

kawotethatanne dumma dumma doonan odeteyisata,

issife shiishana; enti shiiqidi, ta bonchuwa be7ana.

19 Taani enta giddon malaata oothana;

entafe attidaysata giddofe

ta gitatetha si7iboonanne

ta bonchuwa be7iboona kawotethatako,

Tarsesako, Liibeko, Liideko, Tubaalako,

Yawaanakonne yuushoy abban teqetidi haaho biittatako kiittana;

enti ta bonchuwa kawotethata giddon awaajana.

20 Isra7eele asay katha yarshuwa

geeshsha miishen wothidi xoossa keethi eheysada,

enti hinte ishata ubbaa kawotethata giddofe,

paratan, para gaaretan, gimaletan, baqulotaninne

caane gaaretan utisidi, Godaas imo oothidi

ta geeshsha zumaa bolla Yerusalaame ehana.

21 Entafe issota issota kahinenne Leewe oothana"

yaagees Goday.

22 "Taani medhida ooratha salotinne

ooratha sa7i ta sinthan minnidi de7eysada,

hinte kochaynne hinte sunthay minnidi daana.✝

23 Ageena xeerope bidi ageena xeero gakanaw,

Sambaatape bidi Sambaata gakanaw

asa ubbay ta sinthan goyinnanaw yaana.

24 Enti keyidi bishe,

ta bolla makallida asaa aha be7ana.

Enta miya guxuney hayqenna;

enta xuuggiya tamay to7enna;

enti asa ubbaas shaatiyaba gidana"✝

yaagees Goday.