1 Beella geetetiya Babiloone eeqay hokis;

Nebo geetetiya eeqay gufannis.

Enta misileti caana mehe bolla caanetidosona;

daaburida mehetas deexo tooho gididosona.

2 Deexuwape dendidaysan caana meheti,

caanara issife kundidosona.

Eeqati bantana ashshanaw danda7onna gisho

bantaw di7etidi bidosona.

3 Hinteno, Isra7eelepe attidaysato, Yayqooba kochato,

hinte qanthatida wodepe doomada naagiday,

hinte yeletida wodepe doomada tookiday,

taani odeysa si7ite.

4 Hinte cimana gakanaw,

puulumana gakanaw taani tana;

ta hintena maaddana.

Taani hintena medhas; ta hintena naagana;

ta hintena tookananne ashshana.

5 Tana oodera gaaddeyeetii?

woyko oodera likiseetii?

Enti woli daanees gaanaw

tana oodera ginayetii?

6 Asay worqanne bira banta qarxiitape qolidi,

xoosse oothidi medhana mela worqa sheesheysas immoosona.

I oothidi simmin

enti eeqa sinthan gufannidi goyinnoosona.

7 Enti iya denthidi, banta hashiyan tookidi,

iya bessan iya wothin, I he bessan eqi aggees.

Ba de7iya bessaafe qaaxenna;

asi iyako waassiko iyaw zaaro immenna;

iya metuwape iya ashshena.

8 Hinteno nagaranchoto,

haysa hassayite; qopite;

hinte wozanan wothite.

9 Beni wode hanidabata hassayite;

taape attishin, hara Xoossi baawa; taani Xoosse;

ta meli oonika baawa.

10 Ta qofay minnana;

taani ta halchuwa ubbaa polana.

Wursethan hananaba doomethan,

sinthafe hananaba koyrottada erisayis.

11 Doloha baggafe bonqiya kafo,

haaho biittafe ta qofaa poliya asi xeegana.

Taani qopidaba polana;

taani halchidaba oothana.

12 Hinteno wozani muumidaysato,

xillotethafe haakidaysato tana si7ite.

13 Taani ta xillotethaa matayana;

ika haahona gidenna.

Ta atotethay gam7enna; ta atotetha Xiyoones,

ta bonchuwa Isra7eeles immana" yaagees.