1 Goday yaagees;

"Taani hinte aayiw yeddida pirima worqatey awun de7ii?

taani ooddes hintena taani bayzadina?

Heko, hinte nagaraa gisho hinte bayzetideta;

hinte naaquwa gisho hinte aayiya yedetasu.

2 Taani yida wode, haysan asi ayis dhayidee?

Taani xeegida wode, ‘Yee!’ gaanaw ayis asi dhayidee?

Taani hintena wozanaw ta kushey qantheyee?

hintena ashshanaw taw wolqi baaweyee?

Taani abba seerada melisayis;

shaafata mela biitta oothayis.

Haathi dhayin entan de7iya moloti wooqosona;

saamoy wodhin hayqoosona.

3 Taani salota dhuma mayzayis;

enta kamay kayo ma7o daanees" yaagis.

4 Daaburidaysa taani qaalan minthetho erana mela,

Ubbaa Haariya Goday taw tamaarida inxarsi immis.

I tana wonta wonta barkisidi,

taani tamaareda si7anaada ta haythaa dooyees.

5 Ubbaa Haariya Goday ta haythaa dooyis;

taani geella gidabike; guye simmabike.

6 Taani ta zokuwa shoceysatas,

ta buuchaa shoddeysatas

ta gacuwa aathada immas.

Ta bolla cutteysatapenne tana kawusheysatape

ta som7uwa genthabike.

7 Ubbaa Haariya Goday tana maaddiya gisho,

taani yeellatike.

Taani ta som7uwa salo shuchu oothas;

taani yeellatonnaysa erayis.

8 Taw pirdeysi matan de7ees;

yaatin, tana mootey oonee?

Ane taara mootetanaw eqo!

9 Ubbaa Haariya Goday tana maaddees;

yaatin, ta bolla pirdey oonee?

Enti ubbay ma7oda cimana;

enta bili maana.

10 Hinte giddofe Godaa yayyey,

iya aylliya qaalas kiitetey oonee?

Dhuman hemeteynne poo7oy baynay I oonee?

He uray Godaa sunthan ammaneto; ba Xoossan zempo.

11 Hinteno tama eethiya ubbato,

laco xompe hintew shiisheysato,

hinte eethida tama poo7uwan hemetite.

Laco xompiyan simeretite;

Hinte ta kushepe ekanaw de7ey haysa;

hinte wolqaama meto seelan zin7ana.