1 He gallas laapun maccasati issi adde oykidi, "Nuuni nu kathi maana; nu ma7o ma7ana. Ne sunthan xeegetana mela oothada nu kawusha nuupe diggarkii?" yaagidi woossana.

2 He wode Godaa tashey, lo77ananne bonchetana; attida Isra7eele asaas biitta kathay ceeqonne boncho gidana. 3 Xiyoonen attidaysati, Yerusalaamen dhayope kessi ekidaysatinne de7os xaafetidaysati geeshshata geetetana. 4 Goday Xiyoone maccasa qita meeccana; ba pirdaaninne ba ayyaana taman suutha guso Yerusalaamepe diggana. 5 Goday Xiyoone zumaa bollanne yan shiiqiya ubbaa bolla gallas shaara cuyanne qamma tama laco medhana; iya boncho ubbaa bolla kama gidana.✝ 6 I, gallasa mishape ashshiya kuyanne uushopenne irape qosetiya besse gidana.