Salmos 33

Keeha Xoossay Sabeto

1 Hinteno, xilloto Godaas ufaysan ililite;

suure asati iya galatanaw bessees.

2 Maasinqon Godaa galatite;

tammu shayan waaxetida diithan yexite.

3 Ooratha yethi iyaw yexite;

diithi loythidi diixishe ililite.

4 Godaa qaalay tuma;

iya ooso ubbay ammaneteysa.

5 Goday xillotethinne tuma pirda dosees;

iya maarotay sa7aa kumis.

6 Godaa qaalan saloti medhetidosona;

iya doonape keyiya shempuwan

salon de7iya medhetethati yeletidosona.

7 Abba haatha issi bessan eelisis;

ciimmo haatha minja keethan wothis.

8 Sa7a ubbay Godaa yayyo;

asa ubbay Godaa boncho.

9 Iya odan ubbay hanis;

I kiittin minnidi eqis.

10 Goday kawotethata halchuwa hada oothees;

enta qofaa laallees.

11 Godaa halchoy merinaw eqidi de7ees;

iya wozanaa qofay yeletetha ubbaasa.

12 Xoossay entaw Godaa gidida kawotethay,

I babaa oothidi doorida asay anjetidaysata.

13 Goday salon uttidi xeellees;

asa koche ubbaa be7ees.

14 Goday ba araatan uttidi,

sa7an de7iya ubbaa be7ees.

15 Enta wozanaa medhiday iya;

enti oothiyaba ubbaa I erees.

16 Kawoy ba wotaadare darotethan attenna;

olanchoy ba wolqaa minotethan kessi ekenna.

17 Paran xoonana gidi naagoy hada;

I ba minotethan ashshanaw danda7enna.

18 Godaa ayfeti iyaw yayyanne

iya maarotan ufaysi oothiya asaa be7oosona.

19 Hessika enta hayqope ashshanaasanne

kosha wode enta naaganaassa.

20 Nuuni Godaa ufaysan naagoos;

nuna maaddeynne nu gondalley iya.

21 Iya geeshsha sunthan nuuni ammanetiya gisho,

nu wozanay iyan ufaytees.

22 Godaw, nuuni nenan ufaysi oothidaysada,

ne maarotay nu bolla gido.