1 Xoossay nu qosetidi attiya,

bessenne nu wolqaa.

Nuna metoy gakiya wode,

I nuna maaddanaw ubba wode nu matan de7ees.

2 Hessa gisho, biittay qaaxiyakoka,

dereti abban kundiyakoka,

nuuni yayyoko.

3 Abbay guummidi gopontikoka,

iya wolqaama zuliyan dereti kokoriyakoka,

nuuni dagammoko. Salaha.

4 Ubbaafe Dhoqa Xoossay de7iya, Xoossaa katamaa,

geeshsha bessaa, ufaysiya issi shaafi de7ees.

5 Xoossay iya giddon de7iya gisho,

he katamay qaaxenna;

wonta guura Xoossay iya maaddana.

6 Derey dagammis; kawotethati qaaxoosona;

Xoossay ba qaala sissis; biittay til7is.

7 Ubbaafe wolqaama Goday nuura de7ees;

Yayqooba Xoossay nu qosetidi attiya besse. Salaha

8 Haa yiite; Godaa oosuwa xeellite;

biitta waatidi dhaysidaako be7ite.

9 I biitta bolla de7iya olaa ubbaa teqees;

dongenne toora menthees;

gondalliya* taman xuuggees.

10 Wopu giite; taani Xoosse gideysa erite;

taani kawotethata giddon dhoqu dhoqu gaana;

biitta bollaka dhoqu dhoqu gaana.

11 Ubbaafe Wolqaama Goday nuura de7ees;

Yayqooba Xoossay nu qosetidi attiya besse. Salaha.