1 Taani ta yethaa kawas sissana;

ta wozanay lo77o qofa pultees;

ta inxarsay lo77o xaafiya asa bi7ire mela.

2 Asa ubbaafe neeni mala lo7o;

ne mettershay aadho keehatetha qaalan kumis;

Xoossay nena merinaw anjis.

3 Wolqaama kawaw, ne mashshaa danca;

bonchonne teema ma7a.

4 Ne tumatethaa, ne aadatethanne ne xillotetha gisho,

ne teema ma7ada xoonanaw denda;

ne ushacha kushey malaalsiyaba besso.

5 Ne toorati qara;

enti kawa morketa wozanaa caddo;

kawotethati ne tohuwa garsan kundo.

6 Xoossaw, ne araatay merinaw de7ees;

ne kawotethaa xam7ay xillotetha xam7aa.

7 Neeni xillotethi dosada geellatethi ixaasa;

Hessa gisho, Xoossay, ne Xoossay,

ne laggetape aathidi,

nena ufaysa zayten tiyis.

8 Godare uuthan, karbeninne

burguden walaketida shitton, ne ma7oy puuketis.

Dangarsa zaalen alleeqetida,

ne kawo gadhon diixetiya diithay nena ufaysees.

9 Kawo keethan de7iya maccasata giddon;

kawota macca nayti de7oosona.

Kawiya Ofira worqan alleeqetada,

neepe ushacha baggan eqasu.

10 Ta naatte, si7a; wozanan wotha;

ne haytha haa zaara;

ne deriyanne ne aawa keethaa doga.

11 Kawoy ne malan ufaytis;

ne godaa gidiya gisho iya boncha.

12 Xiroosa asay new woyto ekidi yaana;

dureti nena aaddashana.

13 Kawa na7iya,

kawo keethan waanna lo77ay!

I yaagano ma7oy worqan alleeqetis.

14 Ba alleeqo ma7uwa ma7ada,

kawako moyzetasu.

I geela7o laggeti iyo kaallidi,

iya sinthe ekidi yidosona.

15 Enti ufaytishe yidi,

kawo gadho geloosona.

16 Kawaw, ne aawata bessaa ne nayti laattana;

biitta ubban ne enta shuumana.

17 Ta ne sunthaa yeleta ubban,

hassayetanaada oothana.

Hessa gisho, asay merinaw nena galatana.