1 Ta Xoossaw, ta kawaw, ta nena gitayana;

ne sunthaa merinaw galatana.

2 Taani nena ubba gallas sabbana;

ne sunthaa merinaw galatana.

3 Goday gita; aadho galati iyaw bessees;

iya gitatethay asa qofape aadhees.

4 Issi yeletay hara yeletas ne oosuwa odana;

ne malaalsiya oosota awaajana.

5 Enti ne bonchuwa, ne teemaanne

ne gitatetha odana.

Taani ne malaalsiya oosuwa

zaara zaarada qopana.

6 Malaalisiya gita ne oosuwaba odana;

taani ne gitatetha awaajana.

7 Enti ne keehatetha darotethaa odana;

ne xillotethabaa ufaysan yexana.

8 Goday keehanne qadheteysa;

hanqetanaw ellesenna; siiqon kumidaysa.

9 Goday ubbaas keeha;

I ba medhetetha ubbaas qadhetees.

10 Godaw, medhetetha ubbay nena galatana;

ne asa ubbay nena sabbana.

11 Enti ne kawotethaa bonchuwaba odana;

ne wolqaaba odana.

12 Hessan enti ne wolqaama oosuwabaanne

ne kawotethaa boncho teemaba erisana.

13 Ne kawotethay merina kawotethi;

ne maatay yeleta ubbaa haarees.

Goday ba gida qaala ubban ammanetees;

ba ooso ubban keeha.

14 Goday kundanaw gedgadeyisata katisees;

kundidaysata denthees.

15 Ubbaa ayfey nena xeellees;

entaw koshshiya woden kathi immaasa.

16 Neeni ne kushiya miccada,

medhetetha ubbaa amo alaasa.

17 Xoossay ba oge ubban xillo;

ba ooso ubban keeha.

18 Goday bana xeegiya ubbaas,

tuman bana xeegiya ubbaas matan de7ees.

19 I baw yayyeyisata amuwa kunthees;

enta waasuwa si7idi ashshees.

20 Goday bana doseyisata ubbaa naagees;

shin iitata ubbaa dhaysana.

21 Taani ta doonan Godaa galatana;

Medhetetha ubbay iya geeshsha sunthaa

merinaw galato!