1 Goday kawotida gisho kawotethati kokoro;

araata bolla Kiruubeta giddon uttida gisho;

biittay qaaxo.

2 Goday Xiyoonen gita;

kawotethaa ubbaafe

I dhoqu dhoqu gis.

3 Yashshiya iya gita sunthaa ubbay galato;

I geeshshi.

4 Neeni, wolqaama kawoy suure pirda dosaasa.

Neeni Yayqooba suuretethan minthadasa.

Xillotethi essadasa.

5 Godaa, nu Xoossaa dhoqu dhoqu oothite;

iya tohoy yedhiya bessan iya goyinnite;

I geeshshi.

6 Museynne Aaroni iya kahineta giddofe koyrota;

Sameeli iya woossidaysatape issuwa.

Enti Godaako waassidosona;

I enta si7is.

7 I shaara tuussaa giddora entaw haasayis;

I immida higgiyanne wogaa naagidosona.

8 Abeeti Godaw, nu Xoossaw,

ne enta woosa si7adasa.

Ne entana maaradasa;

gidoshin, enta nagara gisho enta seeradasa.

9 Goday nu Xoossay, geeshshi gidiya gisho,

iya dhoqu dhoqu oothite;

iya geeshsha zumaa bolla iya goyinnite.