1 Godaa galatoy lo77o;

Ubbaafe Dhoqa Xoossaw,

ne suntha saboy lo77o.

2 Wonta wonta ne siiquwa odoy,

qamma ne ammanetetha awaajoy lo77o.

3 Tammu shayan waaxetida diithan

maasinqo kaa7ishe nena galatoy lo77o.

4 Taani ne oosuwan ufaytida gisho,

ne kushe oosuwa gisho nena galatayis.

5 Godaw, ne oosoy ay mela gite!

Ne qofay ay mela ciimmo!

6 Eeya asi eranaw danda7enna;

wozani bayna asi akeekanaw danda7enna.

7 Iitati maatada diccikoka,

iita ootheysati daaykoka,

enti merinaw dhayana.

8 Shin abeeti Godaw,

neeni merinaw ubbaafe dhoqa.

9 Abeeti Godaw, tuma ne morketi dhayana;

iita oothiya ubbay piski gaana.

10 Ta kaciya mentha kaceda dhoqu oothadasa;

lo77o zayte ta huuphen tiyadasa.

11 Ta morketi xoonetishin ta ayfen be7as;

tana un7etheysati waassishin ta haythan si7as.

12 Xilloti zambada diccana;

Libaanose zigada daayana.

13 Enti Godaa keethan toketida mitha mela;

enti nu Xoossaa dabaaban daana.

14 Enti ceeggidika ayfana;

enti irxanne cil7o gididi daana.

15 Enti, "Goday suure;

I ta zaalla; iyan iitatethi baawa" yaagana.