1 I keeha gidiya gishonne

iya siiqoy merinaasa gidiya gisho;

Godaa galatite

2 Goday ashshidaysati,

morke kushepe kessi ekidaysati

haysada yaagidi odeto.

3 Enti Dolohapenne wulohape,

pudehapenne dugehape

biitta ubbaafe shiiqidaysata.

4 Entafe issoti issoti mela biittan yuuyidosona.

Banta de7iya katamaa biya ogiya

demmanaw danda7ibookona.

5 Enti koshatidosona; saamotidosona;

enti un7etidosona.

6 Enti metootida wode,

Godaako waassidosona;

I enta waayiyape enta ashshis.

7 Enti daana katama gakanaw,

enta suure ogen kaalethis.

8 Merina iya siiquwa gishonne

I entaw oothida malaalsiya oosuwa gisho

enti Godaa galato.

9 I saamotidaysata alisees;

koshatidaysata lo77oba kalsees.

10 Issoti issoti sakana dhuman uttidosona;

birata santhalaatan waayidosona.

11 Hessi haniday enti Ubbaafe Dhoqa Xoossaa,

kiita bolla makallida gishonne

iya zoriya kadhida gishosa.

12 I enta waaye ooson daaburisis;

enta maaddiya asi dhayin kundidosona;

13 Enti metootida wode,

Godaako waassidosona;

I enta waayiyape enta ashshis.

14 I enta sakana dhumape kessis;

enti qashetida santhalaata duuthis.

15 Iya siiquwa gishonne

I entaw oothida malaalsiya oosuwa gisho

enti Godaa galato.

16 I naase birata pengeta menthis;

birata kasota qanxis.

17 Issoti issoti eeya gididosona;

banta oothida nagara gaason

banta iitatetha gaason metootidosona.

18 Enti kathi ixida gisho

hayqos gakidosona.

19 Enti metootida wode,

Godaako waassidosona;

I enta waayiyape enta ashshis.

20 I ba qaala kiittidi enta pathis;

duufope enta ashshis.

21 Iya siiquwa gishonne

I entaw oothida malaalsiya oosuwa gisho

enti Godaa galato.

22 Enti iyaw galata yarsho shiisho;

ufaysa yethan iya oosuwa odo.

23 Issoti issoti markaben abba bollara bidosona;

abba bolla banta oosuwa oothidosona.

24 Enti Godaa oosuwa be7idosona;

ciimmo abban oothida malaalsiyaba xeellidosona.

25 I kiitida wode gotey dendis;

abba zuley qaaxis.

26 Enti pude dendidosona;

duge ciimmon wodhidosona;

iita metoy gakin enta wozanay til7is.

27 Enti mathotida asada

dhubetidi gandigaridosona;

enta eray maayis.

28 Enti metootida wode,

Godaako waassidosona;

I enta waayiyape enta ashshis.

29 I gotiya si77i oothis;

abba beeta sirphi oothis.

30 Si77i gida gisho ufaytidosona;

enti koyida katamaa Goday gathis.

31 Iya siiquwa gishonne

I entaw oothida malaalsiya oosuwa gisho

enti Godaa galato.

32 Deriya shiiquwan iya gitatetha awaajo;

cimata duulatan iya galato.

33 Goday shaafata melisis;

pultoti goggonnaada teqis.

34 He bessan de7iya asaa iitatethaa gisho,

aradda biitta quu7e kessis.

35 I mela biittan haathe eelisis;

mela biittan pultoy dhuuqanaada oothis.

36 Koshatida asaa he bessan wothis;

bantaw daana katamaa yan keexidosona.

37 Enti banta goshshan zeridosona;

woyne tokidosona;

daro muruuto shiishidosona.

38 I enta anjin enti daridosona;

enta mehiya taybuwa guuthibeenna.

39 Enti xoonetiya wodenne un7etiya wode,

metoninne azzanon kawuyiya wode,

40 Goday enta halaqata kawushis;

mela biittan toylatana mela oothis.

41 Shin manqota metope kessis;

enta soo asaa dorsa wudeda darsis.

42 Suure asay hessa be7idi ufaytoosona;

shin iita asay yeellatidi si77i goosona.

43 Cincati haysa ubbaa akeeko;

Godaa siiquwa qopo.