1 Haathi taw qoodhe gakida gisho,

abeeti Xoossaw, tana ashsha.

2 Eqiya bessi bayna ciimmon mitettas;

ciimmo haatha giddo gelas;

haatha zuley ta bollara aadhis.

3 Maado demmanaw waassashe daaburas;

ta kottonoy melis.

Ta Xoossaa xeellishin,

ta ayfey teljumis.

4 Tana coo ixeysati

ta huuphe binaanape daro;

Wordon tana morkeysatinne

dhaysanaw koyeysati daro;

ta kaysotonnaba zaara gidoosona.

5 Abeeti Xoossaw, ta eeyatetha ne eraasa;

ta balay neepe geemmibeenna.

6 Abeeti Ubbaafe Wolqaama Godaw,

nena ufaysan naageysati

ta gaason yeellatopo.

Abeeti Isra7eele Xoossaw,

nena minthidi koyeysati

ta gaason kawuyofo.

7 Ta ne gisho cashshe danda7as;

ta som7oy yeella ma7iday ne gishosa.

8 Taani ta ishatas imathe,

ta aaye naytas allaga gidas.

9 Taani ne keethas mishetiya mishay

tana tamada xuuggees;

nena cayiya cashshay ta bolla wodhis.

10 Taani xooman tana kawushida wode,

tana cayidosona.

11 Taani kayo ma7o ma7ida wode,

entaw kaassas attas.

12 Katama pengen utteysatas zigrisas attas;

mathoteysati tabaa yethi kessidosona.

13 Shin Godaw, ta nena woossayis;

abeeti Xoossaw, ne dosiya wode,

ne merinaa siiquwan,

ne atotethan taw zaaro imma.

14 Silimon mitettonnaada tana ashsha;

ta morketape tana ashsha,

ciimmo haathan mitetethafe tana ashsha.

15 Di7o haathay tana muukofo;

ciimmo haathay tana mittofo;

ziqa ollay ba doona ta bolla gordofo.

16 Abeeti Godaw, ne merina siiquwa lo77otethan,

taw zaaro imma;

ne gita maarotan taako simma.

17 Ne aylliyafe ne som7uwa genthofa;

taani un7an de7iya gisho

taw elle zaaro imma.

18 Taako shiiqa; tana woza;

ta morketape tana la77a kessa.

19 Ta cashshaa, yeellaanne

kawushatethaa ne eraasa;

ta morketa ubbaa ne be7aasa.

20 Cashshay tana hargancho oothis;

taw qadhetiya asi koyas.

Shin issi asika demmabike;

tana minthethiya asi xeellas; shin bentibeenna.

21 Ta kathan ciiye walakidosona;

ta saamuwas caala ushshi immidosona.

22 Enta gaytay entaw xihe gido;

enta yarshoy entaw xihe gido.

23 Xeellonnaada enta ayfey goozeto;

enta zokoy kuuno.

24 Ne hanquwa enta bolla tiga;

suulliya ne sheney enta yedetho.

25 Enta kambey kaysi gido;

enta dunkaaniyan de7iya asi dhayo.

26 Ne seeridaysata enti yedethidosona;

ne madunxisidaysata enti yeessosona.

27 Enti nagaraa bolla nagara gujana mela aggaaga;

ne maarotethaafe enta aybika gakofo.

28 Enti de7o maxaafape qusheto;

xillo asaara mazgabetofo.

29 Ta waayeninne un7an de7ayis;

abeeti Xoossaw, tana ashshada,

saro bessan wotha.

30 Taani Xoossaa sunthaa mazmuren galatana;

galata imon iya gitayana.

31 Hessi boora yarshofe,

woyko kacaama korma yarshofe,

aadhidi, Godaa ufaysees.

32 Naaqetidaysati hessa be7ana; ufaytana;

hinteno, Xoossaa koyeysato,

hinte wozanay minetto.

33 Goday manqota si7ees;

qasho keethan de7iya ba asaa kadhenna.

34 Saloy, sa7inne abbay,

iya giddon de7iya woxi qaaxiya ubbay Godaa galato.

35 Xoossay Xiyoone ashshana;

Yihuda katamaa zaaridi keexana;

asay yan daananne biittayka entaba gidana.

36 Iya aylleta nayti he biitta laattana;

iya sunthaa doseysati yan daana.