1 Ta Xoossaw, ta Xoossaw, tana ayis aggadii?

Tana maadda gada ta nena woossiya wode,

ayis taape haakay?

2 Ta Xoossaw, gallas kumethi ta neeko waassas;

shin ne tana allaka.

Qamma ubban neeko waassayis,

shin wopatethi demmike.

3 Gidoshin neeni geeshshi;

Isra7eele galatay ne araata yuushon de7ees.

4 Nu aawati nenan ammanetidosona;

nenan ammanetin, ne enta ashshadasa.

5 Neeko waassidi attidosona;

nenan ammanetidi yeellatibookona.

6 Shin ta ase gidike; guxune;

ta asan kadhetidaysanne boretidaysa.

7 Tana be7iya ubbay qelqisoosona;

banta huuphiya qaathishe dereeqosona.

8 "I Godan ammanetis; ane iya asho;

Goday iya dosiko, ane iya asho" yaagosona.

9 Gidoshin taani ta aaye ulope

suure yeletanaada oothiday nena.

Ta aaye dhantha dhammiya wodeka

tana naagiday nena.

10 Ta yeletoosope doomada nenan diccas;

ta aaye ulope doomin ne ta Xoossaa.

11 Metoy taako matiya gishonne

tana maaddiya asi bayna gisho,

ha77i neeni taape haakofa.

12 Daro morketi qayciya boorada tana teqidosona;

qayciya Baasane kormatada tana oykidosona.

13 Mentherethidi gudiya gaammoda

banta doona ta bolla dooyosona.

14 Taani haathada goggas;

ta meqethay ba kesuwape keyis;

ta wozanay oysada ta gaathan til7is.

15 Ta qoodhey kun7ada melis;

ta inxarsay kottonuwara oyketis;

ne tana hayqida asada baanan yeggadasa.

16 Kanati tana teqidosona;

iita asati ta yuushuwa oykidosona;

ta kushetanne ta tohota caddoosona.

17 Ta meqethati taybetoosona;

ta morketi tana dereeqosona.

18 Ta ma7uwa shaakidi ekoosona;

ta adussa ma7uwa bolla saama yeggoosona.

19 Ta Godaw, ne ta matay taape haakofa;

Ta wolqaw, tana maaddanaw ellesada haaya.

20 Tana mashshafe kessa eka;

ta al7o de7uwa kanatape ashsha.

21 Gaammota doonape tana ashsha;

qayciya bazzo boorata kacepe tana naaga.

22 Taani ne sunthaa ta ishatas odana;

enta shiiquwan nena galatana.

23 Hinteno, Godaa yayyesato, iya galatite;

hinteno, Yayqooba zareto, iya bonchite.

Hinteno, Isra7eele kochato,

yashshan iya dhoqu dhoqu oothite.

24 I un7etidaysa kadhenna;

enta qohuwa be7ishe qelli geenna.

Ba som7uwa entafe genthenna;

enti iyako waassiya wode,

entaw zoko zaaribeenna.

25 Ta ne lo77o oosuwa gisho gita shiiqon galatana;

ta qangetha new yayiya asaa sinthan gathana.

26 Manqoti midi kallana;

Godaa koyeysati iya galatana;

enti merinaw ufaysan daana.

27 Sa7a gaxa gakanaw de7iya asa ubbay,

akeekan Godaako simmana;

asa zare ubbay iya goyinnana.

28 Maati ubbay Godaasa;

I kawotethata haarees.

29 Sa7an de7iya dure ubbay iya goyinnana;

bantanan hayqope ashshanaw danda7onaysatinne

biitta simmiya ubbay iyaw gulbatana.

30 Yaana yeletay iyaw kiitetana;

sintha yeletas Godaaba odana.

31 Buroo yeletiboona asaska,

iya geeshshatetha odana.