1 Xoossay Yihudan eretis;

iya sunthay Isra7eelen gita.

2 Iya dunkaaney Saalemana;

I de7iya bessay Xiyoonena.

3 Yan xongetiya morke dongiya,

gondalle, mashshenne ola miisheta mentherethis. Salaha

4 Abeeti Xoossaw, ne bonchoy ay mela gite!

Neeni ne morketa xoonada zumaape simmiya wode,

ne teemay ay mela yashshi!

5 Gooba tooranchoti bonqetidosona;

enti wolqaama dhisko dhiskidosona;

entafe issoyka ba kushiya denthibeenna.

6 Abeeti Yayqooba Xoossaw, ne seerida wode,

para asatinne parati kundidi attidosona.

7 Shin abeeti Xoossaw, neeni yashshaasa;

ne hanqoy suulliya wode,

ne sinthan oone eqanay?

8 Neeni pirdaa salope sissida wode,

biittay dagaman si77i gis.

9 Neeni biittan qohetida asaa ashshanawunne

entaw pirdanaw dendiya wode hessi hannis. Salaha

10 Ne ase hanqikoka new boncho gidees;

Olape attida asati ne ba7aale bonchana.

11 Godaas hinte Xoossaas qangethi gathite;

hinteno iya matan de7iya kawotethato,

yashshiya iyaw imota ehite.

12 I halaqata ayyaana kawushshees;

wolqaama kawotaka daganthees.