1 Ego za jola zara za vei za qa batia mule za maka goto mateana za lagere vei pa noka. Za izongia na neqi lavatana jola aza beto na malakapina za vakaberia za na kasia guguzu. 2 Za velavela viviva vei ari aza,

<<Za lotu tajegara! Lotu tapiara!

I Babiloni, na kuta guguzu lavata!

Ko koviria na dia ia suvesuverena na tomete,

na dia guguzu suvesuverena ria na ongu ikikeredi,

na suvesuverena tadiria na manugu tatavadi,

nake liosodi beto qarike tatavaragua.

3 Ura na vaini bisibosina

za vabuku digeredi doru pukupuku tinoni.

Beto ria na bangabangara pa pezo

za qari roiti vabosi tavitia aza.

Beto ko ria na tinoni qari varivavai lao lame

za qari izizongo taleni za na roiti vabosi tana,>> za gua.

4 Beto qa nongoria mule ara za maka mamalaingi za lagere vei pa noka, ari za gua vei,

<<Mu votu taloi lame pana guguzu aza

za gamu na qua tinoni,

ko muke somanani

na uana ikikerena tana,

ko muke somana gozoria

na vinakilasa tana!

5 Ura qari varitotopare zae pa noka

za na sela tana,

beto ko zake koroto roquria na Tamaza

ria na roiti ikikeredi tana.

6 Mu roiti laoni tana

aza vei za roiti laoni aza tadiria goto,

vatamo vinorini padana nana roiti

za na vinakilasa tana,

na nana kapa za mu vatamo vinorini

na neqina na buku za varivabuku vadigereni.

7 Maka moqaza vei za valavata muleni makana

beto za suvere valeleanagana,

nari za ao ba mu vani tugu

na vitigi beto na takulanga.

Ura pa bulona ari za gua vei aza,

<Na kalao qa nyumu bangara ara, nake nabonaboko ara,

beto ko na takulanga manake izongo gozoria,> za gua.

8 Ko za vei za na oja mina gozororia aza

za mari makarai raja pana maka rane gu:

na uke, na takulanga, beto na songe.

Beto mina tavurungu pana iku,

ura na Bangara na Tamaza mina vakilasia aza

za na vivana jola,>> za gua za na mamalaingi pa noka.

9 Beto ria na bangara pa pezo, ria qari somana roiti vabosi tavitia aza beto qari suvere valeanadia vei aza, za mari lukana beto mari lukana takulangani aza, tonai mari batia na tulana na iku za gania aza. 10 Ria pala mari turu pa zouna tu, ura qari matagutu keta mari somana tavavitigi qari gua, beto ari mari gua vei,

<<Varivatakulanga jola! Varivatakulanga jola!

Na kuta guguzu lavata!

Babiloni, na kuta guguzu neqina jola!

Pana maka totozo papakana gu

za kamugo na vinakilasa!>> mari gua.

11 Ria na tinoni vavai pa pezo mari lukana takulangani aza, ura kepore mule na tinoni bi vaitekuria na dia zakazava. 12 Kepore tugu bi vairia na dia qolo, na siliva, na patu poreveveidi beto na patu kilakilangadi, beto ko vei tugu ria na poko lineni, na poko jemejemeredi, na kala davala, na silika. Na suvege omanga leadi qarike boka vavaidi, na barasi, na aeana, na patu dekolai za zae na vaidi qarike boka vairia, beto maka zava qari gigalani na aivori za taroiti pana livo manugu, beto na suvege poreveveidi. 13 Beto na oela omanga leana na vuruvurunguna, na pepiumu omanga leana. Beto ko vei tugu na vavavui ruqa omanga leana, na moa. Beto na vaini, na oela olive, na palava, na vuiti, beto vei tugu na bulumakau, na sipi, na hose beto na topitopili qari ragataria beto vei tugu na pinauzu qari tavai teku.

14 Qari paranga lao pana tana ria na tinoni vavai,

<<Ria doru zakazava qu nyonyorogua joladi ria ao

za qari tateku pale pana tamu.

Beto doru zakazava qari bata leana beto qari kilanga

za qari murimuri pana tamu,

ko koviria munake izongo bati sogaria!>> qari gua.

15 Ko ria na tinoni vavai qari izizongo taleni na kole roiti vavai pana guguzu lavata aza za mari turu pa zouna ura qari matagutu keta mari somana gozoria na vitigi tana, za mari lukana takulangani aza, 16 ari mari gua vei,

<<Varivatakulanga jola! Varivatakulanga jola!

Za na kuta guguzu lavata!

Za tavapokopokoni na poko poreveveidi,

na poko davalana beto na jemejemerena,

za tavasarini na qolo, na patu poreveveidi,

beto na patu kilakilangadi!

17 Ba pana maka totozo papakana gu

za qari murimuri betodia ria na izizongo ari!>> mari gua.

Ko ria doru kapini pana vaka, ria qari tuti pa vaka, beto ria na boe, ria qari roiti teku poata pa vaka, za mari turu pa zouna, 18 ko mari lukana za totonai mari batia na tulana na iku za vurungia na guguzu, ko ari mari gua vei, <<Kepore zozoto za maka guguzu bi poreveveina jolani na kuta guguzu lavata zana!>> mari gua. 19 Beto mari repo taridi kavuru pezo na batudi beto mari lukana takulangani vei ari,

<<Varivatakulanga jola! Varivatakulanga jola!

Na kuta guguzu lavata!

Ria doru poredia vaka qari rerege pa ivere

za qari izizongo pana izizongo tana!

Ba pana maka totozo papakana gu

za qari murimuri betodia ria doru zakazava!

20 Mu suvere qeraqera za gamu pa noka,

beto gamu na tinoni tana Tamaza,

na tinoni tagarunumiu beto na tinoni korokorotai.

Ura za tori vakilasani tu na Tamaza aza

ria na ngangangulu za roiti lameni aza tadigamu,>> mari gua, za gua za na mamalaingi.

21 Beto za ovulu tekua tu maka mateana neqineqina za maka patu doa lavata, ko za gona goreni pa ivere lavata, beto za paranga,

<<Zara mina tavakilasa vei

i Babiloni na kuta guguzu lavata.

Mina tagona gore valupi vei na patu pa kolo,

ko minake izongo tabata soga.

22 Ko minake tanongoro soga pana tamu

za na mamalaingidi na mike hapu, na keradi na tinoni, na kuvili!

Ria na bokabokadi pana okokoto roiti pa lima

za marike tabata soga pana tamu.

Beto ko na mamalaingidi na patu doa vavakovuru palava

za marike izongo tanongoro pana tamu.

23 Na kaberena na juke

minake izongo tabata soga pana tamu,

beto marike izongo tanongoro soga

za na mamalaingidi ria na marene na reko koni varielavadi.

Ria na mua tinoni vavai

za qari tinoni poreveveidi jola pa kasia guguzu,

beto ria doru pupuku tinoni

za qari tatoka vapiru pana potana ikeredi tamu,>> za gua.

24 Ko za tavakilasa i Babiloni, ura za tajutuni aza za na orungudi ria doru tinoni tana Tamaza, ria na tinoni korokorotai, beto ko ria doru qari tavauke pa kasia guguzu!