Dogodogoro 19

Na Vatarazae pa Noka

1 Pana ligudi ari za qa nongoro veini ara na mamalaingina maka varikamu minete lavata za pa noka, ari qari gua vei,

<<Vatarazaea na Tamaza!

Na inaalo, na vinalavata, beto na neqi

za tana na nada Tamaza!

2 Ura qari tuvizi beto qari zozoto ria nana varituti!

Za tori pitua tu aza za na reko tugele lavata

aza za toka vaselai na guguzu pa pezo

pana nana uana bosina.

Ko za vakilasia na Tamaza aza,

ura za vaukeria na nana nabulu,>> za gua.

3 Beto qari maka velavela viva vei mule ari,

<<Vatarazaea na Tamaza!

Na tulana na iku za vurungia na guguzu lavata aza

zake koroto zae kamua na kamua,>> qari gua.