1 Na kuta ginugua poreveveina gami korapa vavakatoni gami za na veveina gu na kuta iama lavata, aza za korapa nyumu pa kale matuana na Tamaza lavatana pa noka, pana nyumunyumuna poreveveina jola. 2 Aza za roitini na roiti tana kuta iama lavata pa ia madina jola pana aqaqo tabuna zozotona na Bangara Tamaza tu za vaturua, nake tinoni. 3 Ura doru iama za qari tamijata ko mari valaoria na dia varivana beto na vavavui manugu lao tana Tamaza. Ko za vei aza za nada kuta iama lavata ba mina kolenana tu za na nana varivana lao tana Tamaza. 4 Vei bi korapa pa pezo aza nari za bike boka iama aza, ura koledia ria na iama qari taudukuni pana vavanau ko mari valaoria ria na varivana. 5 Na roiti qari roitini ria na iama za na kirena beto na onguna gu aza za roitini na Karisito pa noka. Za maka moqaza podeke vei pana totozo tonai mi vaturua na aqaqo tabuna za gua i Mosese nari za paranga vabalaua na Tamaza, ari za guni vei, <<Muna kopuni ko doru zakazava za muna roiti tuti putaputani tugu za na veveina qa vabatinigo ara pa kubokubo,>> za guni.✝ 6 Ba koviria za na Karisito za tori tekua tu za na roiti tana iama za poreveveina jolani tadiria na iama, maka moqaza podeke vei na vinaego za vaturua aza pa varikorapaina na Tamaza beto na tinoni ba za leana jola, ura na vinaego aza za kolea na taringutinguti leana jola.

7 Vei bi kepore selana za na vinaego momoe nari za bike tanyaqo mule za na vinaego vinaorina. 8 Ba qarike tutia ria nana tinoni za nana vinaego momoe ko za juturia na Tamaza ria tonai za paranga vei ari pana Kutikuti Tabuna,

<<Pa rane qari korapa lame rari

za mana vaturua ara

za maka vinaego koregana

tadiria na butubutu Izireli

beto tadiria na tinoni pa Jiudia,

za gua za na Bangara.

9 Ko na vinaego koregana ani

za minake vei na vinaego

qa roitini pana tadiria na dia tite pa moa

totonai qa aru tamania na limadi

ko qa toka votu valeadi ara pa Ijipi.

Qari daidia tutia ria za na vinaego

qa roitini ara pana tadiria,

ko za vei za qake pavu galadi ara ria,

za gua za na Bangara.

10 Ko ani za na vinaego

mana roitini ara

pana tadiria na tinoni Izireli

pana rane qari korapa lame,

za gua za na Bangara:

Mana vakolea pana roqudi ria na qua vavanau

beto mana kutidi pa bulodi.

Ara za mana dia Tamaza ria,

beto ko ria za mari qua tinoni ara.

11 Ko kepore maka mina kilu vagigalaia

maka goto turana pa maka dia guguzu

babi ule vani za maka tavitina, ari bi guni vei,

Mu gilagilai na Bangara, bi gua.

Ura ria doru qua tinoni

mari gilagila betoziu ara,

podalai pa pekina

ko mi kamu pa lavatana.

12 Mana taleozodi ara

ria na dia sela

beto manake izongo roquroquria ara

ria na dia roiti ikikeredi,>>

za gua za na Tamaza.✝

13 Ko tonai za pojai na Tamaza za na veveina na vinaego koregana, nari za valelua za na vinaego momoena. Ko na zakazava za lelu beto za taunyara za pala minake kole lalaonana.