1 Aaroone nayta cugay hayssafe kaallizayssa; Aaroone nayti Nadaabe, Abihu, El7ezeerenne Itamaare. 2 Nadaabeynne Abihuy naa yelontta ba aawappe kaseti hayqqida; hessa gishshas El7ezeereynne Itamaarey qeese gidida. 3 Dawiti El7ezeere zarkkefe Saadooqenne Itamaare zarkkefe Ahimelekera gididi Aaroone zareta istta ooson ooson maaddana mala shaakki woththides. 4 El7ezeere zare halaqati Itamaare zare halaqatappe daro gidida gishshas El7ezeere zareti tammanne usuppun cugan shaakettiin, Itamaare zareti osppun cugan shaakettida. 5 Xoossa Keeththaa kaaleththizaytinne Xoossa cimati El7ezeere zareta giddoninne Itamaare zareta giddon diza gishshas oonakka maaddontta oosoza saaman shaakkida. 6 Lewe zare Natina7eele naa xaafezi Shama7ey kawoza sinththaninne iza shuumeta sinththan, qeese Saadooqe sinththaninne Abiyaataare naa Ahimeleke sinththan, qeeseta sinththaninne Lewetaso asaa halaqata sinththan istta sunththaa xaafides; histtiin El7ezeere keeththa asata halaqatappe issoynne Itamaare keeththa asata halaqatappe issoy bantta taran taran saama kessida.

7 Ha asati saama kessiin

koyro saamay Yoharibe gakkides;

nam7anththozi

Yaddaya gakkides;

8 Heedzdzanththozi

Harime gakkides;

Oydanththozi

Sa7oorime gakkides.

9 Ichchashanththozi

Malkiya gakkides;

Usuppunththozi

Miyaamine gakkides;

10 Laappunththozi

Haqoxe gakkides;

osppunththozi

Abiya gakkides;

11 Uddufunththozi

Iyaaso gakkides;

tammanththozi

Shakaaniya gakkides;

12 Tamman issinththozi

Elyaasheebe gakkides;

tamman nam7anththozi

Yaaqime gakkides;

13 Tamman heedzdzanththozi

Huppa gakkides;

tamman oydanththozi

Yasheba7aabe gakkides;

14 Tamman ichchashanththozi

Bilga gakkides;

Tamman usuppunththozi

Imere gakkides;

15 Tamman laappunththazi

Hezire gakkides;

tamman osppunththozi

Hafixeexe gakkides;

16 Tamman uddufunththozi

Pattaya gakkides;

nam7u tammanththazi

Hiziqeela gakkides;

17 Nam7u tamman issinththozi

Yaakine gakkides;

nam7u tamman nam7anththozi

Gaamule gakkides;

18 Nam7u tamman heedzdzanththozi

Dallaya gakkides;

Nam7u tamman oydanththozi

Ma7aaziya gakkides.

19 Isra7eele GODAY istta azazida malanne kase istta aawa Aarooney isttas woththida waaga mala istti Xoossaa keeth geliza wode ooththana mala imettida wogay hayssa.

20 Attida hara Lewe zareti

Amiraame naytappe Shebu7eele,

Shebu7eele naytappe Yehidaye.

21 Erahaabiya naytappe bayra naaza Yishiya.

22 Yixihaaretappe Shalomite;

Shalomite naytappe Yahaate.

23 Kebroone naytappe koyrozi Yiriya, nam7anththozi Amaariya, heedzdzanththozi Yahazi7eele, oydanththozi Yoqima7aame.

24 Uzi7eele naytappe Mikiyaasa naa Shamire.

25 Mikiyaasa isha Yishiya naytappe Zakaraasa.

26 Meraare attuma nayti Mahile, Mushenne Yaa7ize. 27 Yaa7ize attuma nayti Benno, Shohaame, Zakurenne Ibire. 28 Mahile attuma nayti El7ezeerenne Qiise; El7ezeeres attuma nay deenna. 29 Qiises Yerahim7eele geetettiza issi attuma nay dees. 30 Mushes Mahile, Edeerenne Yarmoote geetettiza heedzdzu attuma nayti deettes.

Haytanti baso asan asan qoodettida Lewe zareta.

31 Istta isha Aaroone nayti ooththoyssaththo kawo Dawite sinththan, Saadooqe sinththan, Ahimeleke sinththan, hessaththoka qeesetaso asata halaqatinne Lewetaso asata halaqati dizason saama yeggida; bayrazappe biidi wurseth gakkanaas dizaytas issi gina saama yeggida.