1 GODAY Dawite iza morkketa ubbaa kusheppenne Sa7oole kusheppe ashshida wode Dawiti hayssafe kaalliza mazamure GODAA bonchchos yexxides;

2 «GODAY taas zaalla,

taas miixanne tana ashshizaade.

3 Ta Xoossay ta geemettiza zaalla,

taas gondallenne atoteththa kace;

izi taas mino miixa;

taas zempponne

tana ashshizaade;

ne tana makkallanchchatappe

ashshaasa.

4 Galatay bessiza GODAA ta xeygays;

tani ta morkketappekka attays.

5 «Hayqo dambalay

tana giddoththides;

dhayssiza di7oy tana mittides.

6 Si7oole wodoroy

ta bolla xaaxettides;

hayqo woximadey

taas waaxettides.

7 Ta ceecida wode GODAA xeygadis;

ta Xoossaako waassadis.

Izi ba Keeththan dishe

ta cenggurssaa siyides;

ta waasoy iza hayththan gelides.

8 «Izi hanqettida gishshas biittaya

kokkoradussinne shirotadus;

salota yochchi

za7idessinne qaaxxides.

9 Iza siidheppe hanqo

cuway cuwattides;

iza doonappe xuuggiza

tamay eexxides;

tama bonqoyka kezides.

10 Salota daakki wodhdhides;

iza toho garsan dhippi gida

shaaray dees.

11 Izi kirube bolla uttidi piradhdhides;

carko qefe bolla uttidi

pude paallides.

12 Dhumay iza giddoththides;

dhippi gida ira shaaray

iza genththides.

13 Iza sinththan diza poo7ozappe

wawaci giza wolqqanththi kezides.

14 GODAY salotappe guummides;

Ubbaafe Dhoqqa Xoossaa

cenggurs sissides.

15 Ba yiishshaa dukkidi

ba morkketa laallides;

wolqqanth yeddidi istta shirosides.

16 GODAA seerappenne

iza siidheppe keziza hanqo

cuwaappe dendidayssan,

abba giddon diza zulleti beettida;

sa7a yochchati qonccida.

17 «Bollafe ba kushe yeddidi

tana oykkides;

ciimma haaththata giddofekka

tana kessides.

18 Mino morkketappe,

tani isttara eqettana

dandayontta baaligaaratappe

tana ashshides.

19 Ta metotida gallas ta bolla yida;

gido attiin GODAY tana kaafides.

20 Izi tana aakoso kessides;

tanan ufayettida gishshas

izi ashshides.

21 «GODAY taas

ta xilloteththa mala ooththees;

ta xilloteththa mala

taas kushe zaarides.

22 GODAA oge ta naagida gishshas

tani Xoossafe sher7i gaada iita ooththabeekke.

23 Iza woga ubbay ta sinththan dees;

iza maarappeka

haraso simmabeekke.

24 Iza sinththan borey baynda de7adis;

tanakka nagarappe naagadis.

25 GODAY ta xilloteththa mala,

iza sinththan diza

geeshshateththaa mala

taas kushe zaarides.

26 «Ammanettidaytas

nekka ammanettidayssa,

suuretas neni suure

gididayssa bessaasa.

27 Geeshshatas neni geesh gididayssa,

makkalla asas neni makkalla

gididayssa bessaasa.

28 Neni qohettida deraa ashshaasa;

gido attiin ne ayfey

kawushshanaas

otoranchchata xeellees.

29 Abeet GODAWU!

Neni taas xomppe;

GODAY ta dhumaa poo7isees.

30 Ne maadon morkketa ola

sinth suga suga baana;

tani ta Xoossaa wolqqan

gimbeza bollara xaallays.

31 «Xoossa ogey kumeththa;

GODAA qaalay muuruta;

izan ammanettidayta ubbaas

izi gondalle.

32 GODAAPPE attiin

hara Xoossi oonee?

nu Xoossaafe attiin

zaallay oonee?

33 Taas wolqqa immizayssi,

ta ogekka suurisizayssi

izi ta Xoossa.

34 Ta tohota genessa

toho mala pilatisees;

dhoqqasohotan

tana minththi essees.✝

35 Ta kusheta ola

tamaarssees;

ta qeseti xarqimala

wondafe zinqqeettes.

36 Ne atoteththa gondalle

taas immadasa;

ne kaafoy tana gitasides.

37 Ta tanggo aassadasa;

ta tohotikka dhuphettibeettenna.

38 «Ta morkketa yedeththa dhayssadis;

istti dippi gaanaashe gakkanaas

guye gabeekke.

39 Mulera ta istta dhayssadis;

simmidikka eqqanaas

dandaybeettenna;

ta toho garsankka kundida.

40 Olas taas wolqqa immadasa;

tanara eqettizayta ta toho

garsan ne gulbatissadasa.

41 Ta morkketi guye simmi

baqatana mala ooththadasa;

tana ixxizayta dhayssadasa.

42 Istti maado demmanaas waassida;

gido attiin istta

maaddiday deenna;

istti GODAAKKO waassida;

gido attiin izi isttas zaaribeenna.

43 Gudulla mala istta liiqisa gaaccadis;

ogen diza urqqa mala

istta gindadissinne yedhettadis.

44 «Ta derey qoppida daafaappe

tana ashshadasa;

kawoteththatas

tana hu7e histtadasa.

Ta erontta asay taas haarettides.

45 Allagati tana shoobbanaas yida;

istti tana siyida mala

taas azazetteettes.

46 Allagati babbida;

bantta miixappe kokkorishe yida.

47 «GODAY de7o Xoossa;

ta zaallay izi anjjetto;

ta atoteththa zaallay

ta Xoossay dhoqqu dhoqqu go.

48 Ta gishshas halo kessiza Xoossay,

kawoteththata taas haarisizay iza.

49 Izi ta morkketa kusheppe

tana kessees;

ta morkketappe tana

dhoqqu dhoqqu histtadasa;

menxe iitatappe

tana ashshadasa.

50 Abeet ta GODAWU!

Kawoteththata giddon

ta nena galatana;

ne sunththaas galata mazamure

ta yexxana.✝

51 Izi kawozas gita xoono immees;

ba tiyda Dawitesinne

iza zereththas,

ba mernaa kiyateth bessees.»